Jeremías 7 - Chuj San Sebastian Bible

Spaxti Jeremías 'a yatut Dios

¹ 'Ix yaln Jehová 'ayn an Jeremías in 'ixtic:

² 'Ochn̈ lin̈n 'a sti spuertail watut an Jehová in tic, tzlajw cha, tzaln 'a eb' 'anma chi ta', to an tzwac' al 'ixtc 'a eb': E masnil ex cajn ex 'a chon̈b' Judá, ex tzex 'och 'a jun puerta tic, yic tz'at eya'nc 'emmquilal 'a Jehová, macljec eyab' jun tzo'n̈ spaxti tic.

³ A Jehová tztac' yuj smasnil, atn qui Diosalec an̈ israel on̈c tic, a tzaln 'ixtic: Toto 'oj e b'o e b'eyb'al, to 'ixta', 'oj ex wa'x can cajn 'a sat lum lum tic.

⁴ Man̈ eya'ch e nab'en 'a eb' 'a'm 'es, eb' tzaln 'ixtic: Cojc wal si'mb'il to may tas 'oj qui'ni, yujto a 'a tic 'ayc' yatut Jehová, atn wal yatut tic, xchi cob' eb'.

⁵ Ax xo tic b'oc e b'eyb'al. Wach' tzeyutj e b'a 'ayx junjn ex.

⁶ Man̈x eyixtc eb' chuc chon̈b'al, eb' meb'a 'unn chamnc smam yet' eb' 'ix 'ix chamnc yichmil. Man̈x e mil cham eb' 'anma may smul. Man̈x eyac' 'emmquilal 'a jun tzo'n̈ comn dios tzex jun 'eli.

⁷ Toto 'ixta tzeyutj e b'a', 'oj ex wa'x can cajn 'a sat lum lum tic, atn lum xwac' 'a eb' e mam eyichm 'a jun 'ejmn̈ej.

⁸ A wal jun tzo'n̈ paxti may xon jac yel'chi, a xeya'ch yipc e c'ojol.

⁹ Tzex 'elc'wi, tzex milw cham 'anma', tze b'on 'ajmulal, tzeya'n cob' e ti 'a tas man̈ yeloc, tzeya'n tz'a incienso 'a jun comn dios tzcuch Baal, tzeya'n 'emmquilal 'a jun tzo'n̈ xo comn dios to may 'aj 'ix colwj 'ayex.

¹⁰ Tzlajw cha, tzex jab'x 'a wojltac 'a in cajnub', tzeyaln 'ixtic: May 'oj qui'nec, xe chi. Tzeyamn 'och e b'on pax smasnil maysch'olnil to caw matz chaj in c'ojol.

¹¹ Am tze na'a, to a jun watut tic, lajn 'icha junc n̈aq'uen 'aj tzc'ub'j 'el sb'a eb' 'elc'um. An Jehová in, an tzwala, to an tic tzwil smasnil tas tze b'o'o.

¹² 'Ixquec 'a chon̈b' Silo, 'a 'aj 'e'nc in cajnub', atn jun in si'jnac 'el 'a yic b'ab'el 'a 'aj 'e'nc in cajan. Ax eyilni tas wutjnac can yuj smul eb' e mam eyichm cha.

¹³ An Jehová in, an xwal 'ayx 'a b'ab'el, yet' 'a schalal yuj e b'eyb'al cha, palta ax tic, ma'ix e chaj eyab' tas xwala.

¹⁴ Yuj cha, 'icha wal wutjnac can watut 'a Silo, 'ixta 'oj wutc can pax jun watut 'aj tzin b'inax tic, atn jun wa'jnac can 'a eb' e mam eyicham yet' 'ayex, atn jun cob' tzeya'ch yipc e c'ojl ticnec.

¹⁵ 'Oj ex in pechcn 'el 'a wojltac 'icha wutjnac eb' eyican, atn eb' yin̈tl can Efraín, xchi Dios, xa chi a eb'.

Smaysch'olnilal eb' israel

¹⁶ Ach Jeremías, man̈ ach leslwoc yuj jun chon̈b' tic. Man̈ al 'ayin, man̈ ach 'och tecn 'ayin, man̈ ach tewc 'ayn yu'uj, yujto ma'oj in ta'w 'ayach.

¹⁷ 'In tzel tas tzb'o eb' 'a yoltc jun tzo'n̈ chon̈b' 'a yol yic Judá, yet' 'a yoltc scayeal chon̈b' Jerusalén.

¹⁸ A eb' 'unnab'il tzsayn cot te c'atzitz, ax eb' mamb'il tzecn 'och te c'ac', ax eb' 'ix nunb'il tzb'on 'ixm c'oxox, yic tzya'n eb' ofrendail 'a jun comn dios tzcuch syajlil satcha'an̈. Caw tzuntzj cot eb' yowl in c'ojol, yic tzya'n eb' yal uva 'a jun tzo'n̈ chuc diosal.

¹⁹ An Jehová in, an tzwala to man̈ cojnoc in tzin yixtj eb', palta mun tzyixtj 'el sb'a eb', mun tzyij 'el eb' sq'uixwel.

²⁰ Yuj cha, an Jehová in, Yajl in, an tzwala, to 'oj wa' cot wal yowl in c'ojl 'a yib'n̈ jun lugar tic, 'a yib'n̈ eb' 'anma', 'a yib'n̈ no noc', 'a yib'n̈ te te', yet' 'a yib'n̈ smasnil 'awb'en. Lajn wal 'oj 'aj jun tic 'icha junc c'ac' to man̈x 'a tz'aj stupi, xchi Dios.

Yailal yuj stenmtacl Judá

²¹ A Jehová jun tztac' yuj smasnil, atn sDiosal Israel, a 'ix aln 'a eb' schon̈b' 'ixtic: 'A'c e nab'en e chin no xajmb'al tzeyac' tz'aoc, yet' jun tzo'n̈ xo xajmb'al.

²² A yic 'ix wi'n 'elt eb' e mam eyichm 'a Egipto, may tas xwal 'a eb' yuj xajmb'al, yet' yuj ofrenda.

²³ A tas 'ix wal pax 'a eb', to yiclum cab' eb' 'ayin, to 'ixta', an ton sDiosal in eb', ax eb' tz'ochcn in chon̈b'oc. 'Ix walni to tzyiclj eb' tas 'ix wal 'a eb' sec wach' tz'aj 'el'ch eb'.

²⁴ Palta ma'ix schaj eb' yab'i'. A yic eb', to caw pit xyutj sb'a eb', syiclni eb' sb'on tas tu xjaw 'a snab'en. Caw 'ix yixtj 'el sb'a eb', man̈x 'ic sna sb'a eb' jab'oc.

²⁵ Yictax yelt eb' e mam eyichm 'a Egipto, masnto 'a jun c'u tic, 'ix in checn̈j 'at eb' in checb' eyet'oc.

²⁶ Palta ax xo tic, ma'ix eyiclj tas 'ix wala, tenmtac xeyutj e b'a, yel xo wal tu xeyutj e b'a 'a yib'n̈ eb' e mam eyichm cha.

²⁷ Ach xo tic Jeremías, al smasnil jun tzo'n̈ tic 'a eb', wach'xam ma'oj scha eb' yab' 'ayach.

²⁸ Al 'a eb' 'ixtic: Ax tic, jun 'ejmn̈ej caw tenmtac ex, matz e nib'j tzex 'ajx cuenta yuj Jehová qui Diosalec. Man̈x 'a 'aj tzb'inax yiclumal 'a e cal, xa chi 'a eb'.

²⁹ ¡Ex 'aj Jerusalén, joxc 'el xil e jolm yuj cusc'ojlal, tze juln can 'eli! ¡'Ixquec 'a lum tzalctac to caw cusltac, tze b'itnan jun tzo'n̈ b'it yic cusc'ojlal! Yujto an Jehová in, caw xcot wowl 'ayex, tox ex wactj cani, xchi Dios.

Lum pan̈n yic eb' milb'il chamoc

³⁰ 'Ix yaln Jehová 'ixtic: A wal eb' 'anma 'a chon̈b' Judá, caw tu tzyutj sb'a eb' 'a in sat. A wal jun tzo'n̈ scomn diosal eb' to caw yajb'entac, caw 'ix ya'ch eb' 'a yol jun watut to wicn̈ej yaji, 'ixta 'ix 'aj sjuw 'el yuj eb'.

³¹ Ax 'a lum span̈nil lum Ben-hinom, ata sb'o eb' jun yet'l xajmb'al yic Tofet yic tzya'n tz'a eb' yunnal yet' yisl ta'. Palta man̈oc in xwac' sb'o eb', may 'aj 'ix 'ec' 'a in nab'en jab'oc.

³² Yuj cha, an Jehová in, an tzwala: 'Ay jun c'ul 'oj jawoc, to a jun pan̈n cha, man̈x 'oj sb'ic Tofet, man̈x 'oj sb'ic pax span̈nil Ben-hinom, palta 'oj 'ajxoc sb'ic Lum span̈nil yic eb' milb'il chamoc. Yujto 'oj mucxoc eb' 'anma 'a Tofet cha, masnto 'oj b'ut'joc 'eli, man̈x 'a 'aj 'oj stac' smucx eb'.

³³ A sniwnal eb' 'anma 'oj cham 'a jun chon̈b' tic, 'oj 'och schib'joc no 'usej, yet' no calte'al noc'. Man̈x 'a mach 'oj xib'tnoc 'el no 'a eb'.

³⁴ 'Oj wac' sat chan̈ eb' 'anma 'a yoltc chon̈b' Judá. Ax 'a yoltc scayeal Jerusalén, man̈x 'a b'it yic q'uin̈ 'oj 'ochoc, man̈x 'a tzaljc'ojlal. Man̈x 'a pax b'it yic nupnel 'oj 'ochoc, 'icha wal lum cusltac lu'um, 'ixta 'oj 'ajcn jun chon̈b' tic, xchi Dios.