Jeremías 6 - Chuj San Sebastian Bible

Eb' 'ajc'ojl 'a Jerusalén

¹ ¡Ex yin̈tl can Benjamín, sayc 'aj tz'at e col e b'a, 'eln̈ec 'a yol chon̈b' Jerusalén! 'Utz'jec q'uen trompeta 'a chon̈b' Tecoa, 'a'c 'och tab' ch'oxnb'ilal 'a Bet-haquerem, yujto 'ay wal jun niwquil yailal tzcot 'a stojlal norte, til wal tas tzjuw 'el yu'uj.

² Tic wal tzsatl chon̈b' Sión, jun man̈x jantcoc cob' swach'l yilxi.

³ 'Ix jaw eb' rey yet' eb' soldado 'a jun chon̈b' cha, xoj sb'on chan̈ eb' scamplamento 'a spatquil 'eli. Junjn mach tzb'o 'ejm sb'a 'a 'aj tzcani.

⁴ A eb' 'ajc'ojl 'ayx cha, tzyal eb' 'ixtic: ¡Ca'c lista qui b'a, ca'c owl yet'oc! ¡Cotn̈ec, 'a caw chimc'ual, tzqui yamnec 'och ca'nec owl yet'oc! ¡Palta wan yem c'u, caw najtxo s'at wewen.

⁵ Ax ticnec jun, at 'a 'ac'wl tzon̈ 'ochc ca'c owl yet'oc, tzqui ma'c lan̈chjoc jun tzo'n̈ sniwc torre eb', 'oj xchic eb'.

⁶ A Jehová jun tztac' yuj smasnil, a 'ix aln 'ixtic: ¡Ch'acc 'el eb' te te'! tzeya'n 'och eb' te e b'achte'oc 'a spatquil 'el jun chon̈b' tic, yic 'oj eya'nc owl yet' eb' 'aj Jerusalén! A jun chon̈b'al eb' 'anma tic, 'oj wa'ch yailal 'a yib'n̈ eb', yujto cojxn 'ixtj 'anma tzb'o eb'.

⁷ A wal 'a Jerusalén chi tzpitzw chan̈ maysch'olnilal, 'icha wal spac' junc a a'. Cojxn 'ixtj 'anma', miljb'a'il. Axn̈ej yab'il yet' lajwel tzwiln̈j 'a scal eb' chon̈ab'.

⁸ B'oc e b'eyb'al ex 'aj Jerusalén, sec wach' ma'oj wi'l in nab'en 'ayex, to ma'ay, 'oj wa'cn 'och e lum 'a cusltaquil. Man̈x 'a junc mach 'oj cajnoc, xchi Dios.

'Ix alx can yuj yailal

⁹ A Jehová tztac' yuj smasnil, a 'ix aln 'ayn 'ixtic: A wal chon̈b' Israel tic, caw lajn 'oj 'aj 'icha tz'ajcn te snun uva to si'smtac tz'aj sch'inx sat. Yuj cha, ya' sb'a mantzac uj jun tic, colcn 'el jantc eb' tztac' yelcni, 'icha tz'aj yec' sc'ab' junc ch'inm uva 'a scal sc'ab'te', xchi 'ayin.

¹⁰ In ta'w 'ixtc 'a 'a: ¿Mach 'ajtil 'oj wala', sec 'oj yab' jun 'ab'x 'oj wal 'a tic? Mamin, 'icha wal to macn schicn eb', caw matz yab' eb'. Ton̈j tzb'uchwj eb', matz chaj sc'ojl eb' a paxti'.

¹¹ Mamin, lajn tzwutj wab'n syal yowl a c'ojl yet' jun chon̈b' tic. Caw man̈xtzac techj in yamn 'och wa'an, xin chi 'a 'a. 'Ix yaln Jehová 'ayn 'ixtic: Sec 'ejm yowl in c'ojl chi 'a yib'n̈ eb' 'unn tzlaj 'ec' 'a yoltc caye, yet' 'a yib'n̈ eb' quelmtac 'aj jun b'uln̈ yaj eb' syamn sb'a. 'Oj 'ijxoc 'at eb' winc yet' yistzil 'a preso, yet' eb' 'ichm 'anma caw 'ayx sq'uinl si'mb'il.

¹² A yatut eb', slum eb', yet' yistzil eb', chucx mach 'oj 'ica'anoc. An Jehová in, an tzwala, to 'oj wi' chan̈ in c'ab', ax wa'n 'och syailal eb' 'anma cajn 'a jun chon̈b' tic.

¹³ Smasnil eb' niwc yel'chi, yet' eb' may yel'chi, cojxn̈ej tas tzyac' ganar eb' 'a maysch'olnil, axn̈ej chi tzna eb'. An̈jtona eb' in checab', yet' eb' ya'mal 'och sti eb' 'anma 'ayin, cojxn̈ej 'elc'l tzb'o eb' smasnil.

¹⁴ 'Ixta pax eb' tzb'on yaj syailal eb' in chon̈ab', tzyaln eb' chajtlto wach'x yaj smasnil, tic pax to yel xo caw tu yaji.

¹⁵ ¿Tom 'ix q'uixw eb' sb'on jun tzo'n̈ maysch'olnil cha? Wal yel, caw ma'ix q'uixw xon wal eb' jab'oc, ¡toxn man̈ yojcoc eb' sq'uixwi! Yuj cha, an Jehová in, an tzwala to a wal yic 'oj wa'nc 'och yailal 'a yib'n̈ eb', 'oj satcn 'el eb', xchi Dios.

Stenmtacl chon̈b' Israel

¹⁶ 'Ix yal Jehová 'a eb' schon̈b' 'ixtic: 'Ochn̈ec wan lin̈n 'a 'aj tzchaj sb'a jun tzo'n̈ b'e, tze maclni eyila'. Tze c'anb'n 'ec' jun tzo'n̈ 'ichm b'e yet' 'ajtil 'ay b'e wach'. A 'a yol jun b'e caw wach' cha, ata tzex 'ati, sec wach' 'oj eyilji, xin chi. Palta 'ix eyaln 'ixtic: Ma'ay, matz qui nib'j tzo'n̈ 'at ta 'on̈, xe chi.

¹⁷ 'Ix wa'n 'och jun tzo'n̈ eyilmal, 'ix waln 'ayx 'ixtic: Macljec eyab' 'aj 'oj 'utz'xoc q'uen trompeta yuj jun tzo'n̈ eyilmal cha, xin chi. Palta 'ix eyaln 'ixtc 'ayin: Ma'ay, matz yal qui c'ojl tzcab'i, xe chi.

¹⁸ Yuj cha, xwaln 'ixtic: Macljec eyab' ex nacion̈, 'ojquejec 'eli, tas 'oj jawc 'a yib'n̈ jun in chon̈b' tic.

¹⁹ 'Ab'c ex cajn ex 'a sat lum tic. 'Oj wi' cot yailal caw maysch'olnil 'a yib'n̈ jun chon̈b' tic, yuj tas tu tzna eb' sb'oni; yujto ma'ix schaj eb' yab' in paxti'. A yic eb', to 'ix spatquilj can 'el eb' in checnb'il.

²⁰ Ex in chon̈ab', ¿tas to yuj tzeyij cot incienso yic chon̈b' Sabá 'ayin, yet' jun tzo'n̈ xo te c'ultc caw su'q'ui sjab' tzcot 'a jun tzo'n̈ nacion̈ 'ay 'a caw najat? A jun tzo'n̈ e xajmb'al tzeyac' tz'a'oc, caw man̈xtzac schaj in c'ojol, yet' jun tzo'n̈ xo xajmb'al tzeyac'a, xin chi, xchi Dios.

²¹ Yuj cha, xyaln Jehová 'ayn 'ixtic: 'Oj wac' 'ejm junc tas 'aj 'oj stench eb' chon̈b' tic yoc, sec 'oj telwc eb' yu'uj. Eb' mamb'il, eb' 'unnab'il, eb' cajn 'a stz'ey eb', yet' eb' swach'c'ojl eb', lajnn̈ej 'oj 'aj scham eb' smasnil, xchi.

Jun owl tzcot 'a stojlal norte

²² 'Ix yaln Jehová 'ixtic: A wal 'a caw snajtil lum lum 'ay 'a stojlal norte, ata 'ay jun niwquil nacion̈ caw jelan, wan ya'n lista sb'a scoti.

²³ Yet' eb' sjul-lab', yet' slanza, caw yel xo tu eb', man̈xtzac 'o'ch sc'ojl eb'. 'Icha sc'an̈ a mar 'ixta sc'an̈ sb'ey eb' 'ay q'ue 'a yib'n̈ chej. Lista xo yaj eb' scot wul yac' owl eyet' ex cajn ex 'a Jerusalén, xchi Dios.

²⁴ A eb' 'anma 'a Jerusalén, tzyal eb' 'ixtic: Tox 'ix cab' jun 'ab'x cha, caw wal tz'el quip yuj xiwc'ojlal, on̈ 'och 'a cusc'ojlal cab'n syail, 'icha wal yab'n junc 'ix 'ix syail 'a yic tz'alj yune'.

²⁵ ¡Man̈x ex 'at munljoc, man̈x ex 'ec' b'eyc'oc 'a yoltc b'e! ¡Yujto a eb' 'ajc'ojl yajch 'ayn̈ec, 'ayx 'ec' eb' yet' syamc'ab' yic owal. 'Ayxn̈ej xiwc'ojlal 'a smasnil lugar! xchi eb' 'anma cha.

²⁶ Ex wit chon̈ab', 'a'c 'och te pichl n̈achtac sat yuj e ch'oxn 'el e cusc'ojlal. 'E'n̈ec b'alb'noc 'a scal stan̈il c'ac', 'ochn̈ec 'a niwquil cusc'ojlal, 'o'n̈ec wal si'mb'il, 'icha yic tzcham junc eyunnal to jun c'otn̈ wali, yujto a jun mach 'oj qui satnec 'eli, caw jab'xoj sjaw 'ayn̈ec.

²⁷ 'Ix yal Jehová 'ixtc 'ayin: Tzach wa'cn 'och 'ac' prowal eb' in chon̈b' tic. B'eyc'ojlej eb' si'mb'il, tzeln wal tas sb'eyb'al eb'.

²⁸ Caw tenmtac eb' smasnil, may snab'en eb', alm peclal eb'. 'Ix pitb' 'el eb', lajn eb' 'icha wal stzatzl q'uen bronce mto q'uen hierro.

²⁹ A yic tzwalx te c'ac' yet' junc wal-lab' 'a caw 'ip, caw tzn̈ilchj te c'ac' chi si'mb'il, tz'ulb'x 'el q'uen plomo 'a scal q'uen plata yuj te'. Ax eb' in chon̈ab', wach'xam xwa'lj in b'on sb'eyb'al eb', palta caw may jac yel'chi, yujto a eb' maysch'olnil sb'eyb'al, caw matz satl eb' 'a scal eb'.

³⁰ 'Oj alxoc yuj eb' to lajn eb' 'icha q'uen plata julb'ilx 'eli, yujto an Jehová in tic, an xin patquilj can 'el eb', xchi 'ayin.