Jeremías 52 - Chuj San Sebastian Bible

'Ochnc Sedequías reyal

¹ A Sedequías junschawinquil ab'il sq'uinal yic yoch reyal, uxlche ab'il ya'jnac reyl 'a Jerusalén, Hamutal sb'i snun, yisl win Jeremías 'aj Libna.

² Palta yel xo tu tas 'ix 'el sb'on 'a sat Jehová, lajn wal 'icha tas sb'ojnac Joacim.

³ Caw tenmtac xyutj sb'a 'a win sreyl Babilonia. A eb' 'aj Judá yet' eb' 'aj Jerusalén caw 'ix stzuntzj cot eb' yowl Jehová, yuj cha, 'ix yi'n 'el eb' 'a yojltac. Yuj jun tzo'n̈ cha, tz'ec' jun tzo'n̈ niwc yailal tic 'a yib'n̈ eb'.

'Emnc Jerusalén

⁴ A 'a yic slajn̈il c'u yoch slajn̈il 'uj yic sb'aln̈il ab'il yoch Sedequías reyal, 'ix cot Nabucodonosor sreyl Babilonia yet' smasnil eb' soldado wul yac' owl 'a Jerusalén. 'Ix 'och oyn eb' 'a 'a, 'ix sb'on chan̈ eb' scamplamento 'a yojltac 'at chon̈b' cha. 'Ix sb'on 'och eb' sb'achte 'a spatquil 'elt chon̈ab' yic tzya'n eb' owl yet'oc.

⁵ Oyb'iln̈ej jun chon̈b' cha, masnto stz'acw yuxlchil ab'il yoch Sedequías reyal.

⁶ Caw 'ix niwtj wal wejl 'a jun chon̈b' cha, man̈x 'a jac tas wach' sc'uxn eb' 'anma'. A 'a yic sb'aln̈il c'u yoch schan̈l 'uj yic jun ab'il cha,

⁷ a eb' soldado 'aj Babilonia, 'ix yoln eb' jun oln 'a smuroal chon̈b' Jerusalén cha. Yuj cha, ax 'a 'ac'wal, 'ix 'el win rey Sedequías chi yet' eb' soldado smasnil wach'xam oyb'il jun chon̈b' chi yuj eb' soldado 'ajc'ojl cha. Ata tojl x'el'ch eb' 'a scal yawb'ente eb' rey, ax ta 'ix 'el'ch eb' 'a jun puerta 'ay 'a snan̈l chab' muro. 'Ixta 'ix 'aj eb' sc'och 'a jun b'e tz'atn̈j 'a span̈nil sti 'a Jordán.

⁸ Palta 'ix pechx win rey Sedequías yuj eb' soldado yic Babilonia cha. Ata 'ix yamchj win yuj eb' 'a ya'lical Jericó. 'Ix 'actx can win yuj smasnil eb' soldado, 'ix sactzic can 'at eb'.

⁹ 'Ix yamchj win rey Sedequías chi yuj eb' soldado yic Babilonia, xyi'n 'at eb' win 'a win sreyl Babilonia 'ayc' 'a Ribla 'a yol yic Hamat. Ata 'ix yal Nabucodonosor tas tz'aj Sedequías.

¹⁰ Q'ueln 'och wal Sedequías cha, 'ix milx cham eb' yunnal, yet' smasnil eb' niwc winc 'aj Judá.

¹¹ Ax pax Sedequías cha, 'ix 'ijx 'elt yol sat, 'ix jalx yet' q'uen cadena, 'ix 'ijx 'at presoal 'a Babilonia. Ata xchami.

Satxnac 'el yatut Dios

¹² A 'a yic slajn̈il c'u yoch yol 'uj yic sb'aln̈lajn̈il ab'il yoch Nabucodonosor reyl 'a Babilonia, 'ix c'och Nabuzaradán 'a Jerusalén, sat yajl yaj yuj win Nabucodonosor, comandante pax yaj 'a eb' soldado tztan̈wni win rey cha.

¹³ A win xwul n̈usnc yatut Dios yet' sdespacho eb' rey, yet' yatut eb' niwc winc 'a Jerusalén cha.

¹⁴ Ax smasnil eb' soldado ajun yet'oc, 'ix ma'n can 'ejm lan̈chjoc smuroal.

¹⁵ Xlajw cha, xyi'n 'at Nabuzaradán eb' 'anma 'a Babilonia, atn eb' xcant can 'a jun chon̈b' cha, yet' pax eb' xya'ch sb'a yet' win sreyl Babilonia, yet' pax jun b'uln̈ xo eb' chon̈ab'.

¹⁶ Cojxn jun tzo'n̈ eb' caw meb'a xcani, sec tzmunlj eb', tzyawn pax eb' uva.

¹⁷ 'Ix sma'n poj eb' soldado chi smasnil yamc'ab' nab'a bronce 'ay 'a yatut Dios, atn yoyal, sb'achnub'al yich, yet' jun niwquil pila yic a'. 'Ix yi'n 'at eb' smasnil bronce chi 'a Babilonia.

¹⁸ 'Ix yi'n pax 'at eb' 'aj tz'em stan̈il c'ac', sluchlab'il, jun tzo'n̈ xo q'uen 'icha texlex, jun tzo'n̈ niwc vaso, jun tzo'n̈ niwc cuchara yet' smasnil yamc'ab' to nab'a bronce, jun tzo'n̈ tzc'anx 'a yic tz'och 'emmquilal 'a Dios.

¹⁹ An̈jtona win comandante cha, 'ix yij 'at win yamc'ab' to nab'a oro, nab'a plata: atn palagan, yet'l stzac'ac, jun tzo'n̈ niwc vaso, yet'l 'aj tz'em stan̈il c'ac', jun tzo'n̈ yet'l cantil, jun tzo'n̈ niwc cuchara, jun tzo'n̈ 'aj tzchax yal uva tz'ajx ofrendail.

²⁰ Ax jun tzo'n̈ nab'a bronce ya'jnac can rey Salomón b'o 'a yatut Dios, atn chab' 'oy yet' jun niwquil pila 'aj tz'ejm a a', yet' lajchwan̈ yechl mam wacx nab'a bronce b'achjnac chan̈ yich jun pila cha, man̈xtzac stac' yechtaxi jantc yalil.

²¹ Junjn 'oy cha, 'ec'b'al wajxque metro ste'il, jab'xoj man̈ nan̈loc swacl metro sb'aln spatic, palta can̈cni yaj yojol, uque centímetro spimal.

²² A junjn 'oy cha, 'aych chab' metro bronce smacloc sjolom. Axta b'ac'b'il 'och jun q'uen maya 'icha chim, ax 'a q'ue'en, ata 'aych jun tzo'n̈ yechl sat granada yelwnub'loc. Nab'a broncen̈ej jun tzo'n̈ cha, lajnn̈ej yaj sb'o chab' 'oy cha.

²³ A 'a jun 'icha chim cha, ata 'aych junjn ciente yechl sat granada, 96 'aych 'a 'aj caw checl quilni.

'Ijxnac 'at eb' 'aj Judá*r* 'icha presoal

²⁴ A win comandante Nabuzaradán, a win 'ix yamn cot Seraías, atn win sat ya'mal 'och sti eb' 'anma 'a Dios, yet' win Sofonías win schab'l ya'mal 'och sti eb', yet' pax 'oxwn̈ xo eb' tztan̈wni sti yatut Dios.

²⁵ Ax 'a scal eb' 'anma xcant can 'a Jerusalén, 'ix 'ijx 'at jun win syajlil eb' soldado, yet' ucwn̈ xo eb' winc 'aych yopiso ya'w servil 'a win rey 'a jun chon̈b' cha, yet' pax jun win 'ajtz'ib' sat yaj 'a eb' soldado, yujto a 'a yol sc'ab' win 'ay slistail eb' 'anma', yet' pax junx 60 eb' 'aj chon̈b' chi to niwc yel'ch yopiso 'a yol schon̈b' cha.

^26-27 Xlajw cha, xyi'n 'at Nabuzaradán smasnil jun tzo'n̈ eb' tic 'a yojltac win sreyl Babilonia, yic 'ayc' win 'a chon̈b' Ribla 'a yol yic chon̈b' Hamat. Axta xyac' win sreyl Babilonia chi milxoc cham eb'. 'Ixta 'ajnc eb' 'aj Judá yijx 'el 'a yol snacion̈.

²⁸ A sb'isl eb' 'anma yijnac 'at win Nabucodonosor, atn eb' tic: A yic yucl ab'il xo yoch win reyal, 'ay 3,023 sb'isl eb' 'anma 'aj Judá yijnac 'at winac;

²⁹ ax 'a yic swajxclajn̈il xo ab'il yoch winac, 'ix 'ijx 'at pax 832 eb' 'aj Jerusalén yu'uj;

³⁰ ax 'a yic 23 ab'il xo yoch win reyal, 'ix yi'n 'at Nabuzaradán junx 745 eb' 'aj Judá. Yuj cha, a sb'isl smasnil eb' 'anma 'ix 'ijx 'at cha, 'ix q'ue'ch 'a 4,600.

'Elnc rey Joaquín 'a libre*r* 'a Babilonia

³¹ A 'a yic 25 yoch slajchwil 'uj yic 37 ab'il xo yijx 'el rey Joaquín 'a Judá, 'ix 'och Evil-merodac reyl 'a Babilonia. A win tic, 'ix sch'ox swach'c'ojlal 'a Joaquín cha, 'ix yi'n 'elt 'a preso.

³² Caw wach' xyutj snab'en 'a win 'a yib'n̈ pax jun tzo'n̈ xo eb' rey 'aych presoal 'a Babilonia chi yet'oc.

³³ 'Ixta to b'i'an, 'ix sjeln 'el Joaquín spichl tzc'anlb'ej 'a yol preso, axn̈ej yet' win rey chi xwa 'a smasnil tiempo.

³⁴ 'Ix ya'n̈j win sreyl Babilonia chi sgasto winac, masnto xchami.