Jeremías 51 - Chuj San Sebastian Bible

'Emnc chon̈b' Babilonia

¹ Tzyaln Jehová 'ixtic: 'Oj wa' cot wal junc 'icha niwquil 'ic' caw ow 'a Babilonia yet' 'a eb' cajn ta', 'oj satxoc 'el eb' yu'uj.

² 'Icha wal tz'aj schayx 'ixm trigo 'a 'ic', 'ixta wal 'oj 'aj eb' 'aj Babilonia yuj eb' 'ajc'ojol, man̈x 'a junc mach 'oj can cajn 'a slum yuj eb'. A wal yic 'oj c'och sc'ul slajw 'el eb', tzanxn̈ej lugaril 'aj 'oj cot eb' chuc chon̈b'al wul yac' owl yet' eb'.

³ Ya' cab' lista eb' julwjum sjul-lab'. Ya'ch cab' eb' smacl sn̈i sc'ojol. Man̈ 'o'ch cab' sc'ojl eb' 'a eb' quelmtac winc 'a Babilonia, sat cab' 'el eb' soldado 'a jun 'ejmn̈ej.

⁴ 'Oj can t'ocn eb' 'aj Babilonia 'aj 'oj lajwc eb', 'oj cham eb' 'a yoltc scayeal schon̈ab'.

⁵ Wach'xam a eb' 'aj Israel yet' eb' 'aj Judá, caw 'ix 'och smul eb' 'ayin, palta an̈ja mantzac wij 'el in c'ojl 'a eb' an Jehová in, tztac' wuj smasnil, sDiosal in eb', to Cojxn̈ in.

⁶ 'Ixquec 'elc 'a Babilonia tic, sec ma'oj eyamchj c'och e cham yuj smul eb'. Atn wal yorail tic in pacn 'a eb' 'a 'icha wal tas smoj schan eb'.

⁷ 'Ix in c'anlb'ej Babilonia yuj wa'n 'och yowl in c'ojl 'a yib'n̈ smasnil nacion̈. A Babilonia tic, lajn wal x'ajc' 'a yol in c'ab' 'icha junc vaso nab'a oro 'aj xwac' 'u'wc 'an̈ smasnil eb' cajn 'a yolyib'n̈q'uinl tic. A yic xyu'n eb' nacion̈ jun 'an̈ cha, caw 'ix q'ue 'a sjolm eb'.

⁸ Palta wal 'a yajn̈ej xlan̈chj 'ejm Babilonia tic. 'O'n̈ec yu'uj, 'ijec cot remel yic tzeyan̈tni, ax quilni, toto 'oj b'oxc sc'ojl eyu'uj, xchi Dios.

⁹ A eb' chuc nacion̈al cajn ta', a eb' tzaln 'ixtic: Tox 'ix ca'ch cob' remel 'a Babilonia tic, palta man̈xtzac 'an̈tx yu'uj. Can cab'i', pax coyc junjn on̈c 'a qui chon̈ab', yujto caw 'ix q'ue'ch smul jun chon̈b' tic 'a satcha'an̈, caw 'ix q'ue'ch 'a scal 'asun, xchi eb'.

¹⁰ Tzyal eb' 'aj Israel yet' eb' 'aj Judá 'ixtic: Wan spacn Jehová 'a eb' yuj tas on̈ yutjec eb'. Coyec, 'at calc 'el 'a Sión, yuj tas wan sb'on Jehová qui Diosalec, xchi eb'.

¹¹ A Jehová 'ix 'a'n sb'o eb' sreyl chon̈b' Media jun cha, yujto nab'ilx xon yu'uj to 'oj satl Babilonia. 'Ixta wal 'oj yutc ya'n spac yuj tas 'ix 'aj yixtx 'el yatut yuj eb'. Tzalx 'a eb' soldado: 'A'c lista e jul-lab', 'a'c 'och tas tzmacn sat jul-lab' 'ayex.

¹² 'Ijec chan̈ e bandera, yic tzex 'at eyac' owl 'a 'aj 'ay smuroal Babilonia, xchi. Wach' cab' tz'ajch oyn eb' soldado 'a 'a, 'och cab' stan̈mal. Jeln cab' tzeyutj e b'a 'a 'ajtil tze c'ub'j 'el e b'a yic tze miln cham eb' soldado tz'elt wul yac' owl eyet'oc, yujto wan sb'on Jehová tas nab'il sb'on 'a yib'n̈ eb' cajn 'a Babilonia.

¹³ Ax wal ax tic ex 'aj Babilonia, a 'a sti eb' a niwc a cajn ex, yuj cha, caw wal niwc rico ex. Palta 'ix c'och stiempoal e satl 'a jun 'ejmn̈ej.

¹⁴ A Jehová tztac' yuj smasnil, tox 'ix yac' sti 'ixtic: 'Oj wac' b'ut'joc 'el yol e nacion̈ tic yuj eb' soldado, 'icha no c'ulub', 'oj ya'l eb' yaw yuj ex ya'n ganar eb', xchi.

B'it yic 'alj wach' paxti 'a Dios

¹⁵ A Jehová 'ix b'on lum lum tic yet' spoder, yet' sjelnal 'ix sb'on yolyib'n̈q'uinl tic, yet' swach' nab'enal, 'ix sb'on satcha'an̈.

¹⁶ A tzalni, yuj cha, tzn̈il-li sc'an̈ c'u yic tzcot n̈ab'. A tz'i'n chan̈ 'asn 'a 'aj tzlajw c'och lum lum tic. A tz'a'n 'ec' copljoc raya 'a scal niwc yaxn̈ab', a tzjacn pax 'elt 'ic' 'a 'aj molb'il yu'uj.

¹⁷ A wal eb' 'anma', yel xo may jac snab'en eb', toc tzq'uixw eb' jac yuj jun tzo'n̈ yechl tzlaj sb'o'. A jun tzo'n̈ yechl cha, man̈ pitznoc, ton̈j tzyac' satc sb'a eb' 'anma chi yuj eb'.

¹⁸ A jun tzo'n̈ cha, caw may jac yopiso. Smoj wal ton̈j tzb'uchx eb'. A wal yic 'oj jawc jun c'ual, 'oj satl Jehová jun tzo'n̈ cha.

¹⁹ Caw wal chuc yel sDiosal Jacob, a xb'on smasnil tas. A si'jnac 'el Israel yic tz'och schon̈b'oc. A Jehová tztac' yuj smasnil, 'ixtnta ton sb'i.

A Babilonia*r* yamc'ab' yic yailal yaj yuj Jehová

²⁰ 'Ix yaln Dios 'ixtic: A Babilonia 'icha to in niwquil martillo yaji, in yamc'ab' yic owal, yic xin satl jun tzo'n̈ nacion̈ yet'oc, yet' jun tzo'n̈ eb' 'aych reyal.

²¹ Xin mil cham no chej yet'oc, yet' eb' 'ay q'ue 'a yib'n̈ no', yet' jun tzo'n̈ caruaje, yet' pax eb' 'aych 'a yojol.

²² Xin mil cham eb' winc yet'oc, eb' 'ix 'ix, eb' 'icham, eb' quelem, yet' eb' 'ix cob'stac 'ix.

²³ Xin mil cham eb' 'ilm calnelu yet'oc, yet' no calnelu cha. 'Ix in satl eb' munljum yet' no mam wacax. 'Ix in satn 'el eb' gobernador, yet' pax eb' 'aych 'a yopiso.

²⁴ An Jehová in, an tzwala: Q'ueln ex wal 'ochi ax wa'n spac 'a Babilonia yet' 'a smasnil eb' cajn 'a 'a 'icha wal smoj schan eb', yuj jantc smaysch'olnilal eb' sb'o 'a Sión.

²⁵ An Jehová in, an tzwala: An tic, 'ajc'ojl wajch 'a Babilonia. A jun cha, lajn wal 'icha junc niwquil witz tzsatn 'el smasnil sat lum lum tic. A yet' in poder ax in ma'n 'ejm lan̈chjoc, sactzicnac 'oj 'atcn 'a sat pac'an. Yuj cha, a Babilonia cha, lajn 'oj 'ajcn 'icha junc witz tz'anac.

²⁶ An Jehová in, an tzwala, to a smasnil q'uen q'uen 'oj 'eltoc 'a scal jun tzo'n̈ 'oj lan̈chjoc cha, man̈x 'a xon junc q'uen 'oj stac' sc'anx 'a junc xo n̈a tot 'oj b'o'oc. Caw cusltac 'oj 'ajcn Babilonia 'a jun 'ejmn̈ej.

²⁷ Ch'oxc chan̈ jun senya yic owl 'a Babilonia. 'Utz'jec q'uen trompeta, sec tzjaw smasnil nacion̈ yac' owl 'a 'a. Cot cab' eb' 'aj Ararat, yet' eb' 'aj Mini, yet' pax eb' 'aj Askenaz yac' owl yet'oc. Si'c 'och junc general tzjucb'tzan eb' soldado 'a owal. 'At cab' no chej 'a owal, niwn cab' no 'icha no c'ulb' man̈x jantcoc sb'isul.

²⁸ Ya' cab' lista sb'a eb' nacion̈ yic tz'och eb' 'a owal. Cot cab' eb' sreyl Media, yet' eb' gobernador, yet' eb' to niwc yel'ch yopiso, yet' pax smasnil eb' 'anma cajn 'a yol smacb'en, xchi Dios.

²⁹ A lum lum tic, caw 'oj 'ib'xoc lu'um, 'oj tzicb'tan̈xoc, yujto 'oj 'el'choc tas nab'il yuj Jehová. A yic 'oj 'ochcn Babilonia tic 'a cusltac lumal, man̈x 'a mach 'oj cajnoc.

³⁰ A eb' soldado yic Babilonia, man̈x 'a tas 'oj yal eb'. Toxn̈ej 'oj smacn 'och sb'a eb' 'a yol scuartel. Man̈x 'a yip eb', lajn xoj 'oj 'ajcn eb' 'icha eb' 'ix 'ix. Ax 'oj yilnc cot eb', wan xo slan̈chj 'ejm schon̈b' eb', wan sn̈usx can pax yatut eb'.

³¹ Tzoltzni 'oj jawc eb' checb' wul yal 'a win sreyl Babilonia chajtlto wan yejm schon̈b' chi 'a jun 'ejmn̈ej.

³² A eb' 'ajc'ojol, 'oj 'och eb' smac 'a 'aj tzc'axw 'ec' eb' 'anma 'a a a'. 'Oj n̈usxoc jun tzo'n̈ cuartel, yuj cha, caw 'oj 'och eb' soldado 'a xiwc'ojlal.

³³ A Jehová tztac' yuj smasnil, atn sDiosal Israel, a tzaln 'ixtic: A eb' 'aj Babilonia, lajn wal eb' 'icha 'ixm trigo lista xo yaj 'a yol te'lab', wan sjaw stiempoal ste'xi, xchi Dios.

^34-35 A eb' 'aj Jerusalén yet' eb' 'aj chon̈b' Sión, tzyal eb' 'ixtic: A Nabucodonosor sreyl Babilonia, caw choc' on̈ yutjec on̈ satn 'eli, caw mesmni xyutj yol qui chon̈ab', 'icha junc 'uc'b' may sb'a'al. On̈ b'u'x 'ejm yu'uj, 'icha tzyac' junc no niwc noc' 'ay 'a yojl 'a mar. 'Ix yac' wal b'ut'joc sc'ojl yet' smasnil tas 'ay 'ayon̈, ax tas man̈x 'ic schaj sc'ojol, 'ix sjulcn 'eli. Stoj lajwc cab' eb' 'aj Babilonia 'icha wal smoj on̈ yutjec eb'. Stoj lajwc cab' eb' yuj eb' 'anma smiljnac eb' 'a qui calec, xchi cab' eb'.

A tas alb'il 'a eb' 'aj Jerusalén

³⁶ Tzyal Jehová 'ixtc 'a eb' 'aj Jerusalén: An 'oj in b'eyc'ojlwi 'a stojlal, an 'oj wac' spac 'a eb' 'ajc'ojl yajch 'ayex. 'Oj wac' tup chan̈ a a tzb'eyi, yet' a spac'b'a 'ay 'a yol yic Babilonia.

³⁷ 'Oj q'uecn b'uln chon̈b' Babilonia slan̈chj 'ejmi, cojxn no 'ocs 'oj 'aj cajn ta', man̈x 'a mach 'oj cajnoc. Ax smasnil eb' 'anma', caw 'oj xiw eb' yiln 'ochi, ax sb'uchwj can pax eb' 'a 'a.

³⁸ 'Oj 'el yaw eb' 'aj Babilonia 'icha no león, 'oj 'el yaw pax eb' 'icha no cotc león.

³⁹ An Jehová in, an tzwala: Ya' sb'a wan sq'uixnj chan̈ eb' yuj tzaljc'ojlal, to oj wac' wa eb', ax wa'n 'u'wc 'an̈ eb', 'oj 'el yaw eb' yuj tzaljc'ojlal. 'Oj lajwc cha, ax sway eb' 'a jun 'ejmn̈ej, man̈x 'a b'a'n̈ 'oj 'el swayn̈ eb'.

⁴⁰ 'Oj wi't eb' 'aj 'oj milxoc chamoc, 'icha wal tz'aj yijx 'at no quelm calnelu, no mam chiwo, yet' no mam calnelu 'a 'aj tzmilx chamoc, xchi Dios.

'Emnc chon̈b' Babilonia

⁴¹ A Babilonia, caw wal b'inab'il 'a yolyib'n̈q'uinal, palta 'oj 'emoc. Caw 'oj xiw jun tzo'n̈ nacion̈ yic 'oj yilnc 'ochi.

⁴² 'Icha wal to a a mar 'oj 'at secnjoc 'a yib'n̈ Babilonia cha, 'oj mucchjoc can yuj a'.

⁴³ Caw cusltac 'oj 'ajcn yol schon̈ab', tacn̈ lum 'oj 'ajcni, man̈x 'a mach 'oj cajnoc, man̈x 'a pax mach 'oj b'eyc'oc 'a sat.

⁴⁴ 'Ix yaln Dios 'ixtic: 'Oj wa'ch wal yailal 'a yib'n̈ Bel, atn sdiosal Babilonia. 'Oj wac' xejc q'uet tas b'uc'b'il 'ejm yu'uj, man̈x 'oj wul 'ilxoc yuj jun tzo'n̈ xo nacion̈. 'Oj lan̈chjoc 'ejm smuroal Babilonia cha.

⁴⁵ Ex in chon̈ab', 'eln̈ect ta', colc 'el e b'a 'a yowl in c'ojl tzjaw 'a yib'n̈ jun chon̈b' cha.

⁴⁶ Man̈ ex 'och 'il, man̈ ex xiw yuj jun tzo'n̈ 'ab'x tzalx 'a yol chon̈b' cha. 'A junjn ab'il, chucchc tas tzb'inaxi, cojxn tas 'et'jnac yailal tzb'inaxi, 'ayxn̈ej 'och eb' yajl 'a owal.

⁴⁷ 'Ixta wal 'oj 'aj sjaw sc'ul wa'n 'och yailal 'a yib'n̈ jun tzo'n̈ sdiosal eb' 'aj Babilonia. Smasnil jun nacion̈ cha, caw 'oj 'el sq'uixwel, 'oj b'ut'joc 'el yol chon̈b' chi yuj sniwnal eb' chamnac.

⁴⁸ An Jehová in, an tzwala: A satcha'an̈ yet' yolyib'n̈q'uinl tic yet' smasnil tas 'ay 'a 'a, caw 'oj tzaljoc cha'an̈, yic 'oj 'ejmc Babilonia cha, yic 'oj cot eb' soldado 'a stojlal norte 'oj wul satnc 'eli.

⁴⁹ 'Oj 'ejmc Babilonia, yujto caw niwn xo 'anma smiljnac cham 'a chon̈b' Israel, yujto niwn xo pax 'anma smiljnac cham 'a smasnil yolyib'n̈q'uinal, xchi.

A tas alb'il 'a eb' israel*r* 'ayc' 'a Babilonia

⁵⁰ Tzyal Jehová 'a eb' israel 'ayc' 'a Babilonia: A machx 'oj eyac' ganar e yel 'a jun chaml 'oj ujc cha, 'ixquec 'eloc. Man̈ ex cancn ta'. Wach'xam najt 'aycn e lu'um, palta 'a'c 'och wal e nab'en 'ayn an Jehová in tic, nac cot pax Jerusalén.

⁵¹ Palta ax tic tzeyal 'ixtic: Caw tzon̈ q'uixwi, yic tzcab'n tas tzyal eb' 'ayn̈ on̈. Caw q'uixweltac caj tzcab'i, yujto a eb' chuc chon̈b'al, tox 'ix 'och eb' 'a yol yatut Dios, 'intax 'ix 'och pax eb' 'a yol jun tzo'n̈ cotc cuarto to cojn Dios 'ay yico', 'oj e chioc.

⁵² Palta an Jehová in, an tzwala: 'Oj jawc wal jun c'ual yic 'oj wa'nc 'och yailal 'a yib'n̈ sdiosal eb' 'aj Babilonia, yet' 'a smasnil yol smacb'en, a eb' 'anma 'oj lajwc cha, caw 'oj 'el yaw eb'.

⁵³ An Jehová in, an tzwala: Wach'xam tzq'ue'ch Babilonia 'a satcha'an̈, chan̈ tzyutj sb'on smuroal, palta 'oj wa'tn̈ej eb' 'ajc'ojl ta', sec tzsatx 'el yuj eb', xchi Dios.

Satnc 'el Babilonia

⁵⁴ 'Oj 'ab'xoc yel yaw eb' 'anma 'a Babilonia, 'oj 'ab'xoc slajw 'ejm smasnil tas 'a schon̈b' eb' cajn ta'.

⁵⁵ A wal Jehová, a 'oj satnc 'el Babilonia, 'oj lajwc 'ejm sb'an̈jb'ail. A eb' 'ajc'ojol, 'oj c'an̈ sc'och eb' 'icha sc'an̈ a niwc a', caw 'oj c'an̈ yejm eb' 'a yib'n̈ chon̈b' cha.

⁵⁶ Tzyal Jehová 'ixtic: 'Oj jawc eb' wul yac' lajwc 'el Babilonia. 'Oj yamchjoc smasnil eb' soldado, ax sma'x can wecchjoc sjul-lab' eb'. Yujto an Jehová in, an ton Dios in, tzwac' spac 'a junjn eb' 'a 'icha wal smoj schani.

⁵⁷ An Rey in, Jehová tztac' wuj smasnil, 'ixtnta ton wal yalx in b'i, an tzwal 'ixtic: 'Icha wal to 'oj wac' 'u'wc 'an̈ eb' yajl 'a Babilonia, eb' 'a'm nab'en, eb' gobernador, eb' niwc yel'ch yopiso, yet' pax eb' soldado. 'Oj cotcn swayn̈ eb' 'a jun 'ejmn̈ej. Man̈x b'a'n̈ 'oj 'el swayn̈ eb', xin chi.

⁵⁸ An Jehová in, tztac' wuj smasnil, an tzwala: To a jun smuroal Babilonia caw wal pim yaji, 'oj lan̈chjoc can 'ejm 'a jun 'ejmn̈ej, yet' jun tzo'n̈ spuertail to caw wal niwac, c'uxn 'oj tz'aoc. Nab'an̈ej wal munljnac 'och jun tzo'n̈ nacion̈ 'a 'a. A jantc munljel 'aj c'unb'nac eb', ton̈j 'oj tz'aoc, xchi.

'Ijxnac 'at spaxti Jeremías*r* 'a Babilonia

⁵⁹ A 'a yic schan̈l ab'il yoch Sedequías reyl 'a Judá, a yic cha, 'ix yaln Jeremías win schecb' Dios jun tzo'n̈ paxti tic 'a win Seraías yunnal Nerías, win yixchicn Maasías. A win Seraías cha, ajun win yet' win rey Sedequías yic 'ix 'at eb' 'a Babilonia, a win 'ajcuenta sayn yet'l win rey 'aj wach' scani yic tz'ec' win 'aj tz'eq'ui.

⁶⁰ An Jeremías in, an xin molb'tzej smasnil tas 'ix alxi to 'oj jawc 'a yib'n̈ Babilonia, 'ix in tz'ib'n can 'a jun ch'an̈ u'un̈.

⁶¹ 'Ix waln 'ixtc 'a Seraías: A yic 'oj a c'och 'a Babilonia, caw tzcham wal awtn smasnil jun tzo'n̈ paxti tic.

⁶² Xlajw cha, tzaln 'ixtic: Mamin Jehová, ach 'ix ala to 'oj a mac' lan̈chjoc jun chon̈b' tic, man̈x 'a 'anma 'oj jawc cajn 'a 'a, man̈x 'a pax junc no noc' 'oj 'ec' 'a 'a, palta to 'oj cancn 'a cusltacl 'a jun 'ejmn̈ej o'oj, xa chi.

⁶³ A yic tzlajw awtn jun tzo'n̈ paxti tic 'a ch'an̈ un̈ tic, tza jaln 'och junc q'uen q'uen 'a ch'an̈, tzlajw cha, tza juln can 'at 'a yojl a niwn a Éufrates,

⁶⁴ tzaln 'ixtic: 'Ixtc wal 'oj 'aj yejm Babilonia. Man̈x 'a b'a'n̈ 'oj q'uex wan jun 'ejm xo, yuj jantc yailal 'oj jawc 'a yib'n̈ yuj Jehová, xa chi, xchi Jeremías. Atn 'a tic tzlajw can c'och spaxti Jeremías.