Jeremías 5 - Chuj San Sebastian Bible

A smul Jerusalén yet' Judá

¹ Xyaln Jehová 'ayn 'ixtic: B'eyn̈ 'ec' 'a scayeal Jerusalén, tza maclni wal el si'mb'il. Tz'ec' a saync el 'a 'aj 'ay smasnil chon̈, tzelni toto 'ay mach caw tojl tas tzb'o'o, caw yeln̈j tas tzyala. Toto tz'ilchj junc o'oj, to 'ixta', 'oj wac' niwnc'ojlal 'a Jerusalén.

² 'Ay cob' eb' tzin b'inan an Jehová in tic, palta tzin sb'inej eb' 'a ya'm 'esal, xchi.

³ 'Ix waln 'a 'ixtic: Mamin, a wal mach tza sayq'ui, atn wal eb' 'anma caw yeln̈j tas tzyala. 'Ix a'ch wal yailal 'a yib'n̈ eb' a chon̈ab', palta may jac yel'ch 'a sat eb'. Xlaj a'ch syailal eb', palta ma'ix nachj 'el yuj eb'. Yel xo wal pit snab'en eb', 'ec'b'al stzatzl snab'en eb' 'a yib'n̈ q'uen q'ue'en. Ma'ix snib'j xon eb' xyactjcan stu b'eyb'al, xin chi.

⁴ An tic, xin na 'ixtic: Cojn am eb' meb'a', eb' may tas tztac' yu'uj, cojn am eb' 'ixta tzyutj sb'a yuj sman̈ nab'enal, yujto man̈ yojcoc eb' tas tznib'j Jehová sDiosal eb' 'a 'a, yet' tas tzyala.

⁵ 'Oj in 'at paxtinc yet' eb' 'anma caw niwn yel'chi. A eb' cha, tecn yojc eb' tas tznib'j Jehová sDiosal eb', yet' tas tzyal 'a eb', xin chi cob'i'. Palta smasnil jun tzo'n̈ eb' cha, an̈jtona x'och eb' tenmtacl 'a Dios, ma'ix syiclj eb' tas 'ix yala.

⁶ Yuj ton wal cha, 'oj 'eltoc no león 'a scal niwc te', ax smiln cham no eb'. Ax no 'ocs 'a lum cusltac lu'um, a no 'oj ch'iychtanc eb'. 'Oj c'och no leopardo 'a sti schon̈b' eb'. Toto 'ay eb' 'oj 'eltoc, caw choc' 'oj yutc no sch'iychtan can 'at eb', yujto caw niwn smul eb' x'ochi. Caw niwn 'ejm xyactj can eb' Dios, xin chi 'a in nab'en.

⁷ Yuj cha, tzyaln Jehová 'ixtic: ¿Tas to wal 'oj wutc wa'n niwnc'ojlal 'ayex? A eb' eyunnal, caw in yactj can eb', tzb'inan eb' jun tzo'n̈ sdiosal to man̈ diosoc. 'Ix wac' b'ut'joc eb' si'mb'il, palta ma'ix syiclj eb' 'ayin. An̈ja sb'on eb' 'ajmulal, axn̈ej 'a yatut eb' 'ix 'ajmul 'ix tzlaj syam sb'a eb'.

⁸ Lajn eb' 'icha no man̈cron chej caw wach' tz'aj yajx servil, amancotn yeq'ui. Tzanxn̈ej eb' winc tz'och tza'n 'a spatquil yistzil yit wincal.

⁹ ¿Tom ma'oj wa'ch yailal 'a yib'n̈ eb' yuj jun tzo'n̈ sb'eyb'al cha? A junc chon̈b' 'ixta wal sb'eyb'al, ¿tom ma'oj wac' spac 'a 'icha wal tas smoj schani?

¹⁰ ¡'Och cab' eb' 'ajc'ojl satl te uva, palta man̈ smasnilc te tzsatl eb'! ¡Sb'ijl cab' eb' sc'ab' te' cha, yujto man̈x wico'oc te'!

¹¹ An Jehová in, an tzwala to 'ixta 'oj 'ajoc, yujto in yactj can eb' 'aj Israel yet' eb' 'aj Judá, xchi Dios.

Alb'il yuj jun yailal 'oj jawoc

¹² A eb' 'aj chon̈b' Israel yet' eb' 'aj Judá, man̈ yelc tas xyal eb' 'a spatquil Jehová. Yaljnac eb' 'ixtic: A Dios toc 'ay tas tzna 'a quib'n̈ec. May yailal 'oj jawc 'a quib'n̈ec, may owal, may pax wejl 'oj jawoc.

^13-14 A eb' schecb' Dios cha, caw may yel'ch tas tzyal eb', man̈oc spaxti Dios tzyal eb', xchi eb'. Palta a Jehová Dios, jun tzta'n̈j yuj smasnil, a 'ix aln 'ayn 'ixtic: Yujn̈ej to 'ix yal eb' jun tzo'n̈ paxti cha, yuj cha, 'ixtc wal tas 'oj jawc 'a yib'n̈ eb'. A 'in paxti 'oj 'eltoc 'a a ti', lajn 'oj wutc 'icha te c'ac', ax eb' chon̈b' tic, lajn 'oj 'aj eb' 'icha te c'atzitz. Ax jun c'ac' chi 'oj 'a'nc lajwc 'ejm eb' smasnil, xchi Dios.

¹⁵ Tzyaln pax Jehová 'ixtic: Ex yin̈tl can Israel, a wal jun chon̈b'al eb' 'anma caw najt 'ay, a eb' 'oj wi' cot 'ayex, atn eb' 'anma caw 'ay yip, eb' 'ayc' xon 'a yictax pecti', eb' man̈ eyojcoc sti', ma'oj eyab' xon tas 'oj yal eb'.

¹⁶ Smasnil jun tzo'n̈ 'anma cha, caw jeln eb' ya'n owal, a syamc'ab' eb' yic owl yet'i, yic chaml yaji.

¹⁷ 'Oj sc'ux 'ejm eb' sat smasnil eyawb'en, yet' tas tze c'uxu. 'Oj smil eb' eyunnal yet' eb' eyisil. 'Oj schi 'ejm eb' e no e calnelu yet' e no e wacax. 'Oj slo 'ejm eb' sat eyuva yet' e higo. Ax syamc'ab' eb' yic owal, a 'oj yac' eb' ma'nc 'ejm lan̈chjoc e chon̈b' 'aych smuroal, jun to 'aych yipc e c'ojol, xchi Dios.

¹⁸ A Jehová 'ix aln 'ixtc 'ayin: A 'a yic jun tiempoal cha, wach'xam niwn yailal 'oj jawoc, palta ma'oj in satl in chon̈b' 'a jun 'ejmn̈ej.

¹⁹ Toto 'ay mach 'oj c'anb'noc 'aych 'ixtic: ¿Tas laj wal yuj tzjaw jun tzo'n̈ yailal tic 'a quib'n̈ec yuj Jehová qui Diosalec? toto xchi eb', tzal 'a eb' 'ixtic: 'Ixta tzex yutej, yujto xeyactj can Jehová Dios, ax jun tzo'n̈ chuc diosal xeyac' servil 'a sat e lu'um. Yuj cha, 'ixta pax 'oj eyutc eya'n servil jun tzo'n̈ chuc 'anmal 'a junc xo chuc lumal, xa chi 'a eb', xchi.

Tennb'ilal 'a chon̈b' Israel

²⁰ 'Ix yaln pax Jehová 'ixtic: Al jun tzo'n̈ tic yab' eb' yin̈tl can Jacob, atn eb' cajn 'a Judá, to an tzwal 'ixtc 'a eb':

²¹ Ex chon̈b' to may jac e nab'en, a ticnec 'ab'c jun tzo'n̈ tic. 'Ay yol e sat, palta matz eyila, 'ay e chiquin, palta matz eyab'i.

²² An Jehová in, an tzwala: Ax tic, caw may jac wel'ch 'a e sat, matz ex xiw xon jac 'ayin. An in b'ojnac 'ejm q'uen arena smacnb'ilc stitc a mar, sec matz 'e't a 'a yib'n̈ q'ue'en. Wach'xam caw ow sq'ue wan chel-loc a', wach'xam caw ow yib'x sat a', palta matz 'ec' a 'a yib'n̈ jun cha. Wach'xam 'ixta in yet' in poder, palta caw matz ex xiw jac 'ayin.

²³ Ax tic, caw tu e nab'en, pit ex; in eyactj cani.

²⁴ Matz e na xon jac 'ixtic: 'Ay cab' yel'ch Jehová qui Diosalec 'a qui sat, yujto a tz'a'n cot n̈ab' 'a 'icha stiempoal, tzya'n pax 'el-lc sat cawb'enec 'a 'icha stiempoal, man̈ xe chioc.

²⁵ Palta a e mul tztenn 'och wan jun tzo'n̈ tic, yuj cha, matz eyac' tzaljoc e c'ojl yet' jun tzo'n̈ yaxilal cha, xchi Jehová, xa chi 'a eb'.

²⁶ Yujto a 'a jun in chon̈b' cha, 'ay wal eb' 'anma caw tu', tzyac' 'ejm eb' ch'an̈ yal 'a yol sb'e junc 'anma', 'icha tzyac' junc mach tzyalan no ch'ic.

²⁷ Caw tzyac' b'ut'joc eb' yol yatut yet' tas tzyelq'uej, 'icha tz'aj sb'ut'j junc jaula yuj nan̈loc no ch'ic tz'ajx 'och 'a yojol. Yuj cha, caw tzq'ue'ch eb', rico xo tz'aj eb'.

²⁸ Caw b'a'ch eb' ya'n servil sb'a. Man̈x yalnb'ilc smaysch'olnilal eb'; matz b'o eb' yaj eb' meb'a 'unn chamnc smam, matz b'o eb' yaj eb' meb'a 'a stojlal.

²⁹ ¿Tom ma'oj wac' syailal eb' yuj jun tzo'n̈ tic? An Jehová in, an tzwala, to 'oj wac' spac yic eb' 'anma tzb'on 'icha jun tzo'n̈ tic.

³⁰ Caw 'ay xiwc'ojlal, 'ay pax smay yilx tas tzuj 'a jun nacion̈ tic.

³¹ Cojn 'es tzyal-l eb' tzcob' yalch sb'a in checb'oc. Ax eb' ya'mal 'och sti eb' 'anma 'ayin, tzyac' eb' yajlil 'icha tas tznib'ej. Ax jun in chon̈b' tic, wach' tzyab' 'ixta'. Palta ¿tas wal 'oj yutc sb'a eb', yic 'oj jawc jun slajb' tiempoal? xchi Dios.