Jeremías 49 - Chuj San Sebastian Bible

A tas alb'il 'a yib'n̈ Amón

¹ A spaxti Jehová yaljnac can 'a yib'n̈ chon̈b' Amón yic yaln can 'ixtic: ¿Tom may yunnal Israel tztac' yi'n can smacl lum tic? ¿Tas yuj a jun tzo'n̈ 'anma tz'och 'emmquilal 'a dios Milcom, a eb' tzcajn lum slum eb' yin̈tl Gad? ¿Tas yuj a eb' amonita cajn 'ec' 'a jun tzo'n̈ schon̈b' eb' cha?

² Palta an Jehová in, an tzwala: 'Ay wal jun c'u 'oj jawoc, caw 'oj 'ab'xoc yel 'aw yic owl 'a chon̈b' Rabá, atn sniwquil chon̈b' eb' amonita. Jun b'uln̈ 'oj 'ajcn chan̈ sma'x 'ejm lan̈chjoc. Smasnil jun tzo'n̈ yaldeail, 'oj tz'a yuj c'ac'. An Jehová in, an tzwala, to 'ixta 'oj yutc eb' israel yi'n can pax 'ec' slum jun 'ejm xo.

³ 'Ochn̈ec 'a cusc'ojlal ex 'aj chon̈b' Hesbón, yujto a chon̈b' Hai, tox 'ix lajw 'ejmi. Ex 'ix 'aj chon̈b' Rabá, 'ochn̈ec wal 'a cusc'ojlal. 'A'c 'och e pichl n̈achtac sat, 'o'n̈ec. 'Oyb'xan̈c 'ec' 'a yol e chon̈b' yuj e somc'ojlal. Ma'c lajwc e niwnal, yujto a jun e diosal tzcuch Milcom, 'oj 'ijxoc 'at 'icha presoal, yet' eb' ya'mal 'och e ti 'a 'a, yet' pax eb' 'anma to niwc yel'ch yopiso.

⁴ Ex chon̈b' to caw wal pit, ¿tas yuj tze b'an̈ e b'a yet' eyip? A jun eyip cha, tox 'ix lajw 'ejmi. A wal e ricoal xe molb'tzej, a 'aych yipc e c'ojol, yuj cha, tzeyaln 'ixtic: ¿Mach wal 'oj stac' ya'n owl quet'ec? xe chi.

⁵ Yuj cha, an Jehová in, tztac' wuj smasnil, an tzwala: To 'oj wa' cot xiwc'ojlal 'a eyib'an̈, yujto smasnil eb' chon̈b' cajn 'a e tz'ey, 'oj 'och eb' yac' owl eyet'oc. Junjn ex ax tic, 'oj e pechx b'eyc'oc, man̈x 'a mach 'oj e molb'tzan cot jun 'ejm xo.

⁶ Palta an Jehová in, an tzwala: To a 'a yic 'oj lajwc ye'cn jun tzo'n̈ tic, 'oj wi'xq'ue'ch chon̈b' Amón tic jun 'ejm xo, xchi Dios.

A tas alb'il 'a yib'n̈ Edom

⁷ A Jehová tztac' yuj smasnil, yaljnac can 'el spaxti 'ixtc 'a yib'n̈ chon̈b' Edom: ¿Tom man̈x 'a jelnal 'a chon̈b' Temán? ¿Tom man̈xtzac nachj tas tzyutj sb'a eb' jeln snab'en? ¿Tom tox 'ix satl smasnil sjelnal eb' cha?

⁸ Ex 'aj chon̈b' Dedán, 'ixquec 'eloc, c'ub'jec 'el e b'a 'a yoltc n̈aq'ue'en, yujto 'oj in satl schon̈b' Esaú tic. 'Ix c'och stiempoal wa'n 'och syailal.

⁹ A 'a yic tzch'inx sat te uva, 'ay 'aj tzcan junjn xo c'ojlab' sat te'. A yic tzc'och eb' 'elc'm 'a 'ac'wal, cojn tas 'ay tz'och yuj eb', cojn tzyij eb'.

¹⁰ Palta an xo tic, man̈x 'a xon jac tas 'oj wactc can 'a schon̈b' Esaú. Wojc wali to man̈x 'a 'aj wach' e c'ub'n 'el e b'a. A smasnil eb' eyunnal, eb' eyican, yet' pax eb' cajn 'a e tz'ey, c'uxn 'oj lajwc 'el eb'. Man̈x 'a junc mach 'oj canoc.

¹¹ Can cab' eb' eyunnal meb'a'il, an 'oj in tan̈wc eb', ax eb' 'ix 'ix chamnc yichmil, tztac' in ya'n 'och eb' 'ix yipc sc'ojol, xchi Dios.

¹² 'Ix yaln Jehová 'ixtic: 'Ay eb' man̈ smojc yab'n syail, a ticnec, yowlal 'oj yab' eb' syal yuj yowl in c'ojol, 'icha to 'oj yuc' eb' yal uva jawnc sti'. Ax xo ax tic, ¿tom ma'oj eyab' syal e nani? Yowlal 'oj eyab' syal yuj yowl in c'ojol.

¹³ An Jehová in, an tzwac' in ti': A chon̈b' Bosra, 'oj cancn 'a cusltaquil, caw 'oj xiw eb' 'anma yiln 'ochi, 'oj b'uchxoc yuj eb', ax scatb'tzan can eb'. Ax jun tzo'n̈ xo chon̈b' 'a yol yic Edom, 'oj ma'xoc can 'ejm lan̈chjoc eb' 'a jun 'ejmn̈ej, xchi.

¹⁴ 'Ix jaw jun 'ab'x 'ayn yuj Jehová: Wan schecn cot jun schecab', yic tzwul yalnc 'a eb' nacion̈ 'ixtic: Molb'tzejc e b'a, tzlajw cha, tzex 'at 'a Edom, 'a'c lista e b'a yic tzex 'at 'a owal, xchi.

¹⁵ Ex 'aj Edom, yel xo wal may yel'ch 'oj ex wutc can 'a yib'n̈ smasnil chon̈ab'. Man̈x 'a yel'ch 'oj eyaj 'a sat smasnil 'anma'.

¹⁶ Mun ax tzeyixtj 'el e b'a yuj e b'an̈quintaquil, toc 'ay mach tzxiw 'ayx 'icha cob' yaj e nani. A 'a yoltc sjatlil q'uen niwn tenm 'ay 'a jolmctac witz, ata tzex can cajan. An Jehová in, an tzwala, wach'xam ata tzex 'aj cajn 'a 'aj yel xo caw cha'an̈, 'icha 'aj tzb'o no salt'iw so', palta yowlal 'oj ex wic' 'emt ta'.

¹⁷ A smasnil mach 'oj 'ec' 'a stz'ey Edom, caw 'oj xiw eb' yiln 'ochi, caw 'oj sat sc'ojl eb' yuj jun niwquil yailal 'oj jawc 'a yib'n̈ cha.

¹⁸ An Jehová in, an tzwala: To caw lajn 'oj 'aj satl Edom 'icha 'ajnc satl Sodoma yet' Gomorra yet' pax jun tzo'n̈ xo eb' chon̈b' 'ay 'a stz'ey. Man̈x 'a junc mach 'oj c'ochx cajn ta', man̈x 'a pax mach 'oj b'eyc'oc 'a 'a.

¹⁹ 'Icha wal junc no león tz'elt 'a swaymtacl sti a Jordán, wal 'a yajn̈ej tzc'och no 'a lum pan̈n 'a'lic 'aj tzwa no calnelu, tzsactzic can e no yu'uj, 'ixta wal 'oj waj in c'och 'a chon̈b' Edom. A eb' 'anma cajn ta', 'oj 'at eb' 'eloc, ax jun mach sic'b'il 'el wu'uj, a 'oj wa'cn 'och yajlilc ta'. ¿Mach wal junc 'oj stac' slajb'tzan sb'a wet'oc? ¿Mach wal 'oj stac' sten sb'a wet'oc? ¿Mach wal junc yajl 'oj stac' ste'wtzan sb'a 'a wojltac?

²⁰ 'Ab'c wal tas tox xin na 'an Jehová in tic 'a yib'n̈ chon̈b' Edom, a wal tas xin na 'a yib'n̈ eb' cajn 'a Temán, to 'oj 'ijxoc 'at yunnal eb', ax slan̈chj 'ejm yatut eb' 'a yib'an̈.

²¹ Caw 'oj 'ib'xoc lum lum tic, yic 'oj 'ejmc junnjoc Edom cha. 'Oj 'el yaw eb' sc'ann colwal, 'oj c'och yel yaw eb' 'a sti a Chac Mar.

²² A eb' 'ajc'ojl cha, caw yajn̈ej ax sc'och eb' yac' owl 'a chon̈b' Bosra, 'icha sc'och jen̈n̈oc junc no c'uc'um. A wal 'a jun c'u cha, a eb' soldado 'aj Edom, caw 'oj 'ib'xoc eb' yuj xiwlal 'icha junc 'ix 'ix wan yalj yune', xchi Dios.

A tas alb'il 'a yib'n̈ Damasco

²³ 'Ix yaln pax Dios yuj eb' 'aj Damasco 'ixtic: A eb' 'aj chon̈b' Hamat yet' Arfad, caw man̈x 'anmac yaj snab'en eb', yujto caw tu sc'och 'ab'x 'a eb'. Caw xniwtj xiwc'ojlal 'a eb', man̈xtzac stac' yajc' eb' 'a tzaljc'ojlal.

²⁴ A eb' 'aj Damasco, caw man̈x 'a yip eb', wan snan eb' to 'oj 'at eb' 'eloc. Cojxn̈ej xiwc'ojlal, b'ilc'ojlal, yet' yailal 'ay 'a scal eb', 'icha junc 'ix 'ix wan yalj yune'.

²⁵ A jun chon̈b' b'inab'il cha, jun chon̈b' to 'aychn̈ej 'a stzaljc'ojlal, tox 'ix 'actx can sch'ocoj.

²⁶ An Jehová in, tztac' wuj smasnil, an tzwala: A wal 'a jun c'ul cha, toxn̈ej t'ocquixtac 'oj 'ajcn eb' quelmtac 'a yoltc caye, smasnil eb' soldado, 'oj cham eb'.

²⁷ 'Oj in n̈uscn tz'a smuroal chon̈b' Damasco, ax jun c'ac' chi 'oj satnc 'el jun tzo'n̈ sdespacho Ben-adad, xchi Dios.

A tas alb'il 'a yib'n̈*r* Cedar yet' Hazor

²⁸ Atn jun tzo'n̈ tic yaljnac can Jehová 'a yib'n̈ eb' 'ay 'a yol yic Cedar yet' 'a eb' yajl yaj 'a chon̈b' Hazor, atn eb' x'ejm yuj Nabucodonosor sreyl Babilonia: Ex 'aj Babilonia, 'ixquec, 'at 'a'c owl 'a chon̈b' Cedar, 'at satc 'el eb' 'anma cajn 'a stojlal 'aj tzq'uel c'u.

²⁹ 'Ijec 'ec' scalnelu eb', smantiado eb', yet' jantcn̈ej syamc'ab' eb'. 'Ijec 'ec' pax scameyo eb', tzlajw cha, tzeya'n 'el eyaw, tzeyaln 'ixtic: Caw 'ayxn̈ej xiwc'ojlal 'a smasnil lugar, xe chi.

³⁰ An Jehová in, an tzwala: 'Ixquec 'elc 'a caw najat, ex to cajn ex 'a chon̈b' Hazor. 'At c'ub'jec 'el e b'a, yujto a win Nabucodonosor sreyl Babilonia, tox 'ix sna winac tas 'oj ex yutoc.

³¹ An Jehová in, an tzwal 'a eb' 'aj Babilonia chi 'ixtic: 'Ixquec, 'at 'a'c owl 'a jun chon̈b' to caw may jac tas tzna'a, caw tzaljc'ojlaln̈ej yajq'ui, may spuertail schon̈ab', may tas macjnac, caw cojn 'ayc' sch'ocoj.

³² 'El'jec cot scameyo eb' yet' swacx eb', xin chi. Tzanxn̈ej 'aj 'oj wa' cot yailal 'a yib'n̈ eb' tzjoxn 'el xil sjolm 'a spac'b'il sjolom, yuj cha, 'oj sactzic can 'at eb'.

³³ A chon̈b' Hazor, 'oj can 'a cusltacl 'a smasnil tiempo, cojxn̈ej no 'ocs 'oj cajnoc. Man̈x 'a xon mach 'oj cajnoc, man̈x 'a pax junc mach 'oj b'eyc'oc ta', xchi Dios.

A tas alb'il 'a yib'n̈ Elam

³⁴ A yic schan 'el Sedequías yich ya'n reyl 'a Judá, a yic cha, 'ix yal Jehová 'ixtc 'a 'ayn an Jeremías in tic yuj chon̈b' Elam.

³⁵ An Jehová in, tztac' wuj smasnil, an tzwala: 'Oj in mac' wecchjoc jun tzo'n̈ sjul-lab' eb' soldado yic Elam, atn syamc'ab' eb' yic owl to caw niwn yel'chi.

³⁶ 'Oj wa' cot owl 'a jun chon̈b' tic, 'icha junc niwquil 'ic' to caw ow, tzanxn̈ej 'aj tzcoti. Tzanxn̈ej 'aj 'oj 'ijxoc 'at eb', man̈x 'a junc nacion̈ 'ajtil ma'oj c'och eb' 'at sc'ub'c 'el sb'a.

³⁷ An Jehová in, an tzwala: 'Oj 'ib'xoc eb' 'aj Elam 'a yojltac eb' 'ajc'ojl 'oj milnc chamoc. 'Oj wa't yailal 'a yib'n̈ eb', 'oj satl eb' yuj yowl in c'ojol. 'Oj wa't owl 'a scal eb', masnto 'oj satl eb' smasnil.

³⁸ An Jehová in, an tzwala: To 'oj wac' Yajlil ta'. 'Oj wac' milxoc cham eb' rey, yet' eb' yajl yaj 'a 'a.

³⁹ Ax 'a slajub', 'oj wi'xq'ue'ch chon̈b' Elam tic jun 'ejm xo, xchi Dios.