Jeremías 43 - Chuj San Sebastian Bible

'Atnc eb' 'aj Judá 'a Egipto

¹ A yic xlajw waln smasnil tas 'ix yac' Jehová wal 'a eb',

² ax Azarías yunnal Osías, yet' Johanán yunnal Carea, yet' jun tzo'n̈ xo eb' winc caw ch'a'an, 'ix yaln eb' 'ixtc 'ayin: 'Es paxti jun tzo'n̈ tzal cha. A Jehová qui Diosalec, toc a 'ix aln 'ayach to matz on̈ 'atc cajn 'a Egipto.

³ A win Baruc, yunnal Nerías, a tzaln jun tzo'n̈ paxti chi 'a qui patquec, sec tzon̈ 'ejmec yuj eb' 'aj Babilonia, yic tzon̈ smilnec cham eb', mto tzon̈ yijec 'at eb' 'icha presoal, xchi ewinac.

⁴ 'Ixta x'aj yoch stenmtacl Johanán, yet' eb' syajlil eb' soldado, yet' pax smasnil eb' 'anma', ma'ix can eb' 'a Judá 'icha 'ix yutj Jehová yalni.

⁵ Palta ax x'aji, a Johanán yet' eb' syajlil eb' soldado, a eb' x'i'n 'at eb' 'anma 'aj Judá chi 'a Egipto, atn eb' pucnc can 'at 'a jun tzo'n̈ nacion̈, palta tox 'ix syam sb'a eb' 'a Judá jun 'ejm xo, yic tzcanx cajn eb' ta yalni.

⁶ X'ijx 'at eb' winac, eb' 'ix 'ix, eb' 'unin, eb' 'ix yisl win rey yet' smasnil eb' 'anma', atn eb' 'ajxnac can 'och 'a yol sc'ab' Gedalías yuj win comandante Nabuzaradán. In yij 'at eb' yet' win Baruc.

⁷ Ma'ix syiclj xon eb' jac tas 'ix yal Jehová, 'ix 'at eb' smasnil 'a yol yic Egipto. Atta xc'och cajn eb' 'a jun chon̈b' tzcuch Tafnes.

⁸ A 'a Tafnes cha, ata 'ix yal Jehová 'ayn an Jeremías in tic:

⁹ 'Ij 'at jaye'oc niwc q'uen 'a yojltac eb' et chon̈b' 'aj Judá, tza mucn can 'a yaln̈ lum chab'ic lum 'a 'amc' 'a yojltac sdespacho win sreyl Egipto 'a yojl jun chon̈b' tic.

¹⁰ Tzaln 'a eb' 'ixtic: A Jehová tztac' yuj smasnil, atn qui Diosalec an̈ israel on̈ec tic, a tzalni: 'Oj wi' cot in checb' Nabucodonosor sreyl Babilonia, ata oj wac' sb'o 'ejm sdespacho, ax wa'n sb'o q'ue smantiado yen̈loc 'a yib'n̈ jun tzo'n̈ q'uen 'ix 'a muccn 'ejm tic.

¹¹ A yic 'oj jawoc, 'oj satl jun nacion̈ Egipto tic yu'uj. A mach to a yab'il xon 'oj milnoc, atn yab'il chi 'oj milnoc, a mach to 'oj 'ijxoc 'at xon 'icha presoal, 'oj 'ijxoc 'at 'icha presoal, a mach to a 'a owl xon 'aj 'oj chamoc, atn 'a owl chi 'oj chamoc.

¹² 'Oj n̈usxoc yatutal sdiosal eb' 'aj Egipto tic, ax sn̈usx can pax sdiosal eb' cha, mto 'oj 'ijxoc 'at 'icha presoal. 'Icha tzyutj junc 'ilm calnelu yi'n 'el no sip 'a spichul, 'ixta 'oj yutc Nabucodonosor yi'n 'at sricoal Egipto tic, caw tzaljc'ojlal 'oj 'aj smeltzji.

¹³ Ax sma'n lan̈chjoc can jun tzo'n̈ q'uen tusb'il can chan̈ 'a Heliópolis 'a Egipto tic. 'Ixta 'oj 'aj sn̈usx can smasnil jun tzo'n̈ yatutal sdiosal eb' 'aj Egipto tic, xchi Dios, xa chi 'a eb', xchi 'ayin.