Jeremías 41 - Chuj San Sebastian Bible

Milb'il cham Gedalías

¹ Ax 'a yic yucl 'uj, 'ix cot Ismael yunnal Netanías yet' lajn̈wan̈ eb' soldado 'a Mizpa yic tzc'umn sb'a eb' yet' Gedalías. Axta xmol wa eb' yet'oc. A Ismael cha, yixchicn Elisama, yin̈tl can pax eb' rey, niwn yel'ch yopiso 'a sreyl Judá 'a yaln̈taxi.

² A yic wan swa eb' cha, xq'ue wan lin̈n̈joc Ismael yet' eb' lajn̈wan̈ soldado ajun yet' cha, smiln cham eb' Gedalías, win x'ajx 'och gobernadoral 'a Judá yuj win sreyl Babilonia.

³ 'Ix smiln cham pax Ismael chi smasnil eb' 'aj Judá yet' eb' soldado 'aj Babilonia 'ayc' yet' Gedalías 'a Mizpa cha.

⁴ Ax 'a junx c'u, yic tox 'ix cham Gedalías, yic mant 'a mach tz'ojcan 'el tas 'ix 'uj cha,

⁵ 'ix jaw 80 eb' winc xcot 'a Siquem, 'a Silo, yet' 'a Samaria. Joxb'il 'el xil sti eb' yu'uj, tzilquixtac spichl eb' 'aychi, lajwnac sniwnal eb', mun a eb' 'ixta xyutj sb'a. Yet' eb' 'ixm trigo, yet' incienso, yic tzya'n eb' xajmb'al-l 'a Jehová 'a yatut.

⁶ A yic cha, 'ix 'elt Ismael scha sc'och eb' 'a Mizpa cha, xoj yoq'ui; wanto schan sb'a eb', 'ix yaln mu'c 'a eb' 'ixtic: —Cotn̈ec, wul 'iltec Gedalías yunnal Ahicam, xchi.

⁷ Palta cojn wal x'och jun tzo'n̈ eb' winc chi 'a spacl snan̈l chon̈ab', 'ix smiln cham Ismael eb' yet' eb' ajun yet'oc. 'Ix sjuln can 'at sniwnal eb' chi 'a yojl jun niwquil xab'.

⁸ Palta 'ay lajn̈wan̈ eb' 'a scal eb' wan smilx cham chi 'ix aln 'ixtc 'a Ismael: —Man̈ on̈ a mil cham on̈. An̈ tic on̈ 'ay qui trigo, qui cebada, qui aceite. 'Ay pax no yalchab' 'ayn̈ on̈. A jun tzo'n̈ cha, c'ub'b'il 'el cuj 'a spatquil 'el qui chon̈b' on̈, xchi eb'. Yuj cha, ma'ix milx cham eb' yuj Ismael yet' pax yuj eb' ajun yet' cha.

⁹ A jun xab' 'aj xyac' 'ejm Ismael sniwnal eb' 'anma smil cham cha, atn jun 'aj tzyam sb'a a a 'ix yac' win rey Asa joyxoc, yic scoln sb'a 'a win Baasa sreyl Israel. A jun xab' cha, caw wal niwquil, palta 'ix b'ut'j yuj sniwnal eb' 'anma smil cham Ismael.

¹⁰ 'Ix yi'n 'at Ismael chi eb' 'ix yisl win rey 'icha presoal, yet' eb' 'anma 'ayc' 'a Mizpa cha, atn eb' x'ajx stan̈wc Gedalías yuj win comandante Nabuzaradán. X'ijx 'at eb' yuj Ismael 'a yol yic Amón.

¹¹ Ax xyab'n sb'a Johanán yunnal Carea yet' pax eb' syajlil eb' soldado 'ayc' yet'oc, yuj tas sb'o Ismael,

¹² 'ix smolb'tzan eb' soldado, 'ix 'at ya'nc eb' owl yet'oc. Axta x'ilchj yuj eb' 'a 'aj 'ay jun niwquil tanque 'ay 'a Gabaón.

¹³ Ax eb' wan yijx 'at 'icha presoal yuj Ismael cha, a yic xyiln sb'a eb' 'a Johanán yet' 'a eb' syajlil eb' soldado, caw wal stzalj chan̈ eb'.

¹⁴ 'Ix meltzj eb', xwul ya'nc 'och sb'a eb' yet' Johanán.

¹⁵ Palta ax Ismael yet' wajxcwan̈ xo eb' ajun yet'oc, 'ix 'at eb' 'eloc, axta xc'och eb' 'a chon̈b' Amón.

¹⁶ A Johanán yet' eb' syajlil eb' soldado ajun yet'oc, 'ix scolcn pax 'el eb' 'ix 'ix, eb' 'unin, yet' eb' caw niwc yopiso yuj eb' rey to wan yijx 'at 'icha presoal yuj Ismael 'a yic tox xchamcn Gedalías yu'uj. Ax Johanán 'ix 'i'n cot eb' 'a Gabaón

^17-18 yic tz'at eb' 'a Egipto. 'Ixta tz'aj eb' s'atcn 'elc 'a eb' 'aj Babilonia yalni. Caw tzxiw eb', yujto xmilx cham Gedaliás yuj Ismael, atn win x'ajx can 'och cob' gobernadoral yuj win sreyl Babilonia. 'Ix 'atn̈j eb', masnto xc'och eb' 'a Gerut-quimam, a jun cha, junn̈j yaj yet' Belén. Ata 'ix 'och wan eb', a wal 'a snab'en eb', masnto tzc'och eb' 'a Egipto.