Jeremías 4 - Chuj San Sebastian Bible

Tennb'ilal yic tz'och najb'ail

¹ A Jehová tzaln 'ixtic: Toto tze nib'j tzeyactj can maysch'olnilal ex israel, cotn̈ec 'ayin. Toto tzeyij 'el jun tzo'n̈ e diosal caw yajb'entac cha, 'ochn̈ec tza'n wu'uj.

² Toto caw yel tzin e b'inej an Jehová in tic, wal 'a stojlal yet' wal 'a swach'il. To 'ixta', 'oj scha smasnil nacion̈ in yaxilal, ax yi'n chan̈ pax eb' in b'i, xchi Dios.

³ Tzyaln pax Jehová 'ixtc 'a eb' 'anma 'aj Judá yet' 'a eb' 'aj Jerusalén: 'Awjec lum lum mant 'a xon 'aj tz'awxi, man̈x eyawc eyawb'en 'a scal te q'ui'ix.

⁴ Ex 'aj Judá yet' ex 'aj Jerusalén, yicljec in trato. 'A'c 'och wal 'a e c'ojl eyiclni yechl in trato cha. 'Ojquejec 'eli to an ton Jehová in. Ax to laj x'aji yuj e mul cha, ax wa'n cot yowl in c'ojl 'a eyib'n̈ 'icha te c'ac' caw ow sn̈ilchji, man̈x 'a mach tztac' sma'n tupoc.

'Emnc chon̈b' Judá yuj owal

⁵ Alc 'el jun tzo'n̈ tic 'a eb' 'aj Judá yet' eb' 'aj Jerusalén, alc 'el yet' sjajl q'uen trompeta 'a smasnil jun nacion̈ cha. Caw 'ip eya'n 'el eyaw tzeyaln 'ixtic: ¡Coyec, qui yamc qui b'a 'a jun tzo'n̈ niwc chon̈b' caw wach' yajch smuroal! xe chi.

⁶ 'Ijec chan̈ e bandera, yic tzch'oxni to tz'at sc'ub'c 'el sb'a eb' cajn 'a Sión. Sayc 'aj tz'at e col e b'a, man̈ ex 'och wa'an. Yujto a 'a stojlal norte, ata 'oj wi' cot jun niwquil yailal 'oj satnc 'el smasnil.

⁷ 'Icha tz'aj yelt no león 'a 'aj 'ay swaynub', 'ixta tz'aj scot eb' 'oj wul satnc 'el jun tzo'n̈ nacion̈ tic. Tox 'ix 'elt eb' 'a yol schon̈ab', yic tzwul satxoc 'el e chon̈b' yuj eb'. Caw 'oj sma'cn 'ejm lan̈chjoc eb', man̈x 'a xon junc mach 'oj can cajn 'a 'a, xchi Dios.

⁸ Yuj cha, 'ix wal 'a eb' wit chon̈b' 'ixtic: Ca'c 'och qui pichl n̈achtac sat, 'oc' coyec, c'acw coyc cab'n syail, yujto a yowl sc'ojl Jehová, mantzac sat 'ejm 'a qui calec, xin chi.

⁹ A Jehová tzaln pax 'ixtic: A yic 'oj jawc jun c'u cha, a wal win rey yet' eb' yajl 'aych yet'oc, caw 'oj 'ib'xoc eb' yuj xiwlal. A eb' ya'mal 'och sti eb' 'anma 'ayin, toxn̈ej 'oj satcn sc'ojl eb', ax eb' in checab', caw 'oj xib'tc sb'a eb', xchi Dios.

¹⁰ 'Ix waln 'a 'ixtic: ¡'Ay, Mamin Jehová! ¿tas yuj 'ix extj paxti eb' 'anma 'aj Jerusalén? 'Ix ac' a ti a'n junc'ojlal 'a eb', palta ax ticnec, a q'uen espada tecn 'och 'a spixn eb' o'oj, xin chi 'a 'a.

¹¹ A wal 'a yic jun tiempoal cha, 'oj yal Dios 'a eb' 'anma 'aj Jerusalén 'ixtic: 'Ay jun tacn̈ 'ic' tzcot 'a lum jolmctac witz 'ay 'a lum cusltac lu'um. A 'a stojlal in chon̈b' tzcot jommoc, a jun 'ic' cha, man̈ lajnoc 'icha junc 'ic' tzc'anlb'ax 'a yic tzchayx 'ixm trigo.

¹² A jun 'ic' tzwa' cot cha, yel xo 'ec'b'al yowl 'a yib'n̈ jun cha. A jun 'ic' tzb'inax tic, atn yailal tzwa' cot 'a yib'n̈ eb' in chon̈ab', xchi Dios.

'Ochnc oyn eb' 'ajc'ojl 'a Israel

¹³ 'Ix yaln pax Jehová 'ixtic: 'Iltec wal scot eb' 'ajc'ojol, lajn wal scot eb' 'icha junc 'asun. A wal scaruaje eb', lajn sb'ey 'icha junc chacxuxm 'ic'. 'Ec'b'al sb'ey schej eb' 'a no salt'iw. Alc 'ixtic: ¡'Oltacn̈ec wal an̈ec tic, caw wal 'oj qui satc 'eli! xe chi.

¹⁴ Ex 'aj Jerusalén, 'ijec 'el smasnil tas tu 'ayc' 'a e nab'en, sec 'ixta 'oj eyaj e colchji. ¿B'a'n̈ wal 'oj eyactc e nan jun tzo'n̈ maysch'olnil?

¹⁵ Caw tzc'och yab'xil owl 'a yol yic Dan yet' 'a lum jolmctac witz 'ay 'a yol yic Efraín.

¹⁶ Alc 'a jun tzo'n̈ nacion̈ yet' 'a Jerusalén, chajtlto a 'a jun nacion̈ 'ay 'a caw najat, ata tzcot eb' 'ajc'ojol. Caw tzya'l eb' yaw scot yac' owl 'a jun tzo'n̈ chon̈b' 'ay 'a yol yic Judá.

¹⁷ 'Oj 'och oyn eb' 'a spatquil chon̈b' Jerusalén, 'icha yajch oyn eb' stan̈mal junc munljel 'ay 'a b'esan. An Jehová in, an tzwala, to 'ixta 'oj 'aj eb', yujto caw tenmtac xyutj sb'a eb' 'ayin.

¹⁸ Yuj e b'eyb'al yet' yuj tas xe b'o'o, yuj cha, tzjaw jun tzo'n̈ tic 'a eyib'an̈. Yuj wal e maysch'olnilal, yuj cha, caw tu ex 'aj 'el'chi, caw tzeyab' syal yu'uj, xchi Dios.

Cusnc Jeremías yuj schon̈ab'

¹⁹ Caw wal tzin cumcn 'ec' wab'n syail. Caw tz'ib'x in pixn yuj tas tzlaj uji. Man̈xtzac stac' sictac tzin 'aji. Tox 'ix wab' yoc' q'uen trompeta, yet' jun 'aw yic owal.

²⁰ Caw tzoltzni sjaw yab'xil yailal tzlaj uji. Smasnil jun nacion̈ tic, caw tox 'ix 'ixtx 'eli. Wal 'a yajn̈ej xma'x 'ejm lan̈chjoc watut, caw x'ixtx 'el 'aj tzin 'ec' cajan.

²¹ ¿Jantcto wal tiempo 'oj wil jun tzo'n̈ bandera, yet' jun tzo'n̈ q'uen trompeta tzlaj 'utz'xoc yuj eb' soldado? xin chi.

²² 'Ix yaln Jehová 'ixtic: A eb' in chon̈ab', caw wal may jac snab'en eb', caw matz in yojquej 'el eb' jab'oc. Lajn eb' yet' eb' 'unn caw may jac snab'en, matz nachj 'el jac yuj eb'. Caw jeln eb' sb'on maysch'olnil, palta man̈ yojcoc eb' sb'on tas wach', xchi Dios 'ayin.

A tas 'oj 'aj slajw 'ejm chon̈ab'

²³ An Jeremías in tic, ch'oxb'il wal wila' tas 'oj 'aj lum lum tic. Caw 'oj 'och lum cusltac lumal, man̈x 'a junc mach 'oj can cajn 'a sat lu'um. 'Ix wiln q'ue pax satcha'an̈, man̈x 'a sacq'uinl 'a 'a.

²⁴ 'Ix laj wilnc 'at eb' lum witz, caw wal tz'ib'x eb' lu'um, 'ixta pax eb' lum tzalan, caw wal tzicb'tan̈x eb' lu'um.

²⁵ Ax xwilni, man̈x 'a junc 'anma 'a sat lu'um, a smasnil no ch'ic, 'ix 'at no 'eloc.

²⁶ 'Ix wiln pax te 'awb'ente 'awb'il, cusltac xoj yilx 'aj 'ayc' te cha, ax smasnil jun tzo'n̈ chon̈ab', c'uxn 'ix lan̈chj can 'ejmi. Yuj yowl sc'ojl Jehová, yuj cha, 'ixta 'ix 'aji.

²⁷ 'Ix yaln Jehová 'ixtic: Caw 'oj juwc lum lum tic si'mb'il, palta ma'oj in satl lum 'a jun 'ejmn̈ej smasnil.

²⁸ Caw cusltac 'oj 'ajcn lum lum tic, an̈jtona', caw cusltac yilx 'oj 'ajcn satcha'an̈. 'Ixta 'oj 'ajoc, yujto 'ixta tas 'ix in na'a. 'Ix waln can pax 'eli, to man̈x 'oj jelmjoc, yowlal 'oj 'el'choc.

²⁹ A yic tzyab'n eb' 'anma yel yaw scot eb' soldado 'ay q'ue 'a yib'n̈ chej, yet' eb' sjul-lab', ax smasnil eb' 'anma cha, tz'at eb' 'eloc. Tz'at sc'ub'nc 'el sb'a eb' 'a 'aj caw chitc 'a calcte', yet' 'a 'aj caw satq'ue'en. Yuj cha, smasnil jun tzo'n̈ chon̈b' cha, caw sictac x'ajcn eb', man̈x 'a junc mach xcan cajn 'a eb'.

³⁰ A Jerusalén, tox 'ix 'ixtx 'eli. Lajn tzyutj sb'a 'icha junc 'ix 'ix to nab'axoj tzb'o sb'a yet' te pichl nab'a púrpura. Tzya'n 'och 'ix q'uen oro caw wach' yilx 'a 'a, caw q'uic' tzyutj 'ix ya'n 'och yan̈l yol sat. Wach'xam caw wach' yilx tzyutj ton 'ix sb'on sb'a, palta man̈x 'a jac yel'chi, yujto a ewin winc chamc'ojlb'il cob' yuj 'ix, tox xyajx can 'el 'ix yuj ewinac. A tas tzna ewinac, to tzsay ewin tas 'oj yutc smiln cham 'ix. 'Ixta wal yaj Jerusalén yet' jun tzo'n̈ xo nacion̈.

³¹ A eb' 'aj Sión tz'el yaw cha. Caw tzwab' yel yaw eb' 'icha wal yel yaw junc 'ix 'ix 'a yic tz'alj junc sb'ab'l 'une'. Caw tzc'acw eb', tzlaj sjilnc 'at eb' sc'ab', tzyaln eb' 'ixtic: ¡'Ay, 'oltacn̈ec wali! ¡Caw 'oj on̈ smilc cham eb' milm cham 'anma'! xchi eb'.