Jeremías 39 - Chuj San Sebastian Bible

'Emnc Jerusalén

¹ A 'a yic slajn̈il 'uj, yic sb'aln̈il ab'il yoch Sedequías reyl 'a Judá, ata 'ix jaw Nabucodonosor sreyl Babilonia yet' eb' soldado 'a Jerusalén, 'ix 'och oyn eb' 'a 'a.

² Ax 'a yic sb'aln̈il c'u yoch schan̈l 'uj, yic yuxlchil ab'il yoch Sedequías yajlil, a yic cha, 'ix yoln eb' soldado yic Babilonia jun oln 'a smuroal chon̈b' cha.

³ Ata 'ix 'oxt smasnil eb' soldado to niwc yopiso yic win sreyl Babilonia. Axta x'och wan eb' 'a jun puerta 'a spacl snan̈l chon̈ab'. A eb' niwc yajl cha, atn eb' tic: Nergal-sarezer, Samgar-nebo, yet' Sarsequim, yet' pax junx win Nergal-sarezer.

⁴ A yic xyiln win rey Sedequías yet' eb' soldado yuj tas wan yuji, yuj cha, 'ix 'at eb' 'elc 'a 'ac'wal. Ata 'ix 'el eb' 'a scal yawb'ente eb' rey, axta x'el'ch eb' 'a jun puerta 'ay 'a snan̈l chab' muro. 'Ixta x'aj eb' sc'och 'a jun b'e tzc'och 'a span̈nil sti a Jordán.

^5-6 Palta ax eb' soldado Babilonia cha, 'ix 'ochn̈j tza'n eb' yuj eb', axta xyamchj Sedequías yuj eb' 'a ya'lical Jericó. 'Ix yi'n 'at eb' 'a win rey Nabucodonosor. Ata 'ayc' win 'a chon̈b' Ribla 'a yol yic Hamat. Ata 'ix yal winac tas tz'aj winac. Wal 'a sat Sedequías cha, 'ix ya'n win rey chi milxoc cham eb' yunnal Sedequías cha, yet' pax smasnil eb' niwc winc yaj 'a Judá.

⁷ Xlajw cha, xya'n win rey 'ijxoc 'elt yol sat Sedequías, 'ix jalx win yet' cadena. Xlajw cha, 'ix 'ijx 'at 'a Babilonia.

⁸ Ax eb' 'aj Babilonia cha, 'ix sn̈usn can eb' despacho, yet' smasnil n̈a 'ay 'a Jerusalén. 'Ix sma'n lan̈chjoc eb' smuroal chon̈ab'.

⁹ Ax 'a slajub', a Nabuzaradán scomandanteil eb' stan̈mal win sreyl Babilonia, a 'ix 'i'n 'at smasnil eb' 'anma 'aj chon̈b' chi 'icha presoal, atn eb' xcant can 'a yol chon̈b' cha, yet' pax eb' xya'ch sb'a yet' eb' 'aj Babilonia.

¹⁰ Cojxn eb' caw meb'a 'ix yactj can win 'a yol yic Judá cha, atn eb' caw may jac tas 'ay 'a 'a. A yic cha, 'ix 'ajx slum eb' 'aj tzyawj yuva, yet' jun tzo'n̈ xo yawb'en eb'.

'Elnc Jeremías 'a libre

¹¹ A win Nabucodonosor sreyl Babilonia, 'ix yac' win jun checnb'il 'a Nabuzaradán scomandanteil eb' tztan̈wni win rey cha, yuj tas tzin 'aji, 'ix yal win 'ixtic:

¹² 'Ij 'at Jeremías, tza tan̈wni, man̈ extc winac, a wal smasnil tas tzc'an 'ayach, 'ac' 'a 'a, xchi win rey cha.

¹³ Yuj cha, a Nabuzaradán, yet' Nabusazbán, yet' Nergal-sarezer yet' pax jun tzo'n̈ xo ewin caw niwc yel'ch yopiso 'a win sreyl Babilonia,

¹⁴ a ewin in 'at 'a'nc 'ijxoc cot 'a 'amc' 'a 'aj 'ayn 'och 'a preso. In ya'n can 'och eb' 'a yol sc'ab' win Gedalías yunnal Ahicam win yixchicn Safán, sec tzin ya'ilx yu'uj. In ya'n win 'ijxoc 'at 'a yatut, 'ixta in 'aj in can cajn 'a scal eb' wit chon̈b' 'aycn 'a Judá.

Ya'jnac Dios sti 'a Ebed-melec

¹⁵ A yic 'ayn to 'ec' presoal 'a 'amc' 'a 'aj 'ayc' eb' tztan̈wni despacho, ata 'ix yal Jehová 'ixtc 'ayin:

¹⁶ Al yab' win Ebed-melec 'aj Etiopía 'ixtic: A Jehová tztac' yuj smasnil, atn sDiosal Israel, a tzaln 'ixtc 'ayach: 'Oj wac' 'el'choc tas waljnac can 'a yib'n̈ jun chon̈b' tic. 'Oj jawc yailal, man̈oc wach'ilal. A yic 'oj ujc jun tzo'n̈ cha, caw 'oj el yet' a sat.

¹⁷ An Jehová in, an tzwala, to 'oj ach in tan̈woc, yic wach' ma'oj ejm yuj jun tzo'n̈ 'anma 'aj tzach xiw cha.

¹⁸ An tzwala, yujto in a'ch yipc a c'ojol, yuj cha, 'oj ach in col-l 'a yol sc'ab' eb', sec ma'oj ach smil cham eb', xchi Dios, xa chi 'a winac, xchi 'ayin.