Jeremías 38 - Chuj San Sebastian Bible

X'ajx 'ejm Jeremías 'a yol xab'

¹ A Sefatías yunnal Matán, yet' Gedalías yunnal Pasur, yet' Jucal yunnal Selemías, yet' pax Pasur yunnal Malquías, a eb' tic, caw xyab' eb' tas 'ix wal-l 'a sat eb' chon̈ab' yic xwalni:

² To a Jehová 'ix aln 'ixtic: A mach 'oj can 'a yol chon̈b' tic, 'oj cham yuj owal, yuj wejel, yuj pax yab'il. A pax mach 'oj 'at 'eloc, ax ya'n 'och sb'a 'a yol sc'ab' eb' 'aj Babilonia, a eb' cha, 'oj colchjoc to 'el eb'.

³ 'Oj wa'ch jun chon̈b' tic 'a yol sc'ab' eb' soldado yic sreyl Babilonia. 'Oj yac' ganar eb' yem jun chon̈b' tic, xchi Jehová, xin chi.

⁴ Yuj cha, 'ix yaln eb' yajl chi 'a win rey chi 'ixtic: —Mil cham jun winc tic, yujto tzjaw schab'c'ojlal eb' soldado 'ayt 'ec' 'a yol chon̈b' tic yuj spaxti win tzyala, tzya'n pax win somchjoc snab'en smasnil eb' 'anma'. A wal jun winc tic, caw man̈oc swach'l eb' quit chon̈b' tzsaya, palta to tzjuw 'el snab'en eb' yu'uj, xchi eb'.

⁵ 'Ix ta'w win rey Sedequías 'a eb' 'ixtic: —Tztac' e b'on tas tze nib'j 'a winac. Aln tic, may jac tas tztac' waln 'ayex, xchi winac.

⁶ Yuj cha, in syamn cot ewinac. Xlajw cha, in ya'n 'ejm ewin yet' lasu 'a yojl jun xab' 'a 'aj tzyam sb'a a a'. A jun xab' cha, yic Malquías yunnal win rey cha. Ata 'ay 'a jun 'amc' 'a 'aj 'ayc' eb' tztan̈wni despacho. A jun xab' cha, man̈x a 'a yojol, cojxn b'i'ch 'ay, yuj cha, ax yic in 'emch 'a yich, in 'atcn 'a scal b'i'ch cha.

⁷ A yic wocn 'ejm win rey 'a spuertail chon̈b' Benjamín, 'ix yab'n sb'a win Ebed-melec, chajtlto tox in 'ajx 'ejm 'a yol jun xab' cha. A jun winc cha, 'aj Etiopía, 'ay yopiso win 'a sdespacho win rey.

⁸ 'Ix 'elt win Ebed-melec chi 'a yol sdespacho win rey cha, 'ix yaln 'ixtc 'a winac:

⁹ —Mamin rey, caw wal tu tas 'ix sb'o jun tzo'n̈ winc tic 'a win Jeremías schecb' Dios. 'Ix yac' 'ejm ewin 'a yojl jun xab'. Ata 'oj cham yuj wejel, yic man̈x 'a tas tzc'uxx 'a yol chon̈b' tic, xchi winac.

¹⁰ Xlajw cha, xyaln win rey chi 'a win Ebed-melec 'ixtic: —'Ij 'at junc 30 eb' winc et' 'a tic, tz'at eyi'nc q'uet Jeremías chi 'a yol jun xab' cha, ya' sb'a mantzac chami, xchi winac.

¹¹ Xlajw cha, 'ix 'at Ebed-melec yet' eb' winc chi 'a jun cuarto 'ay 'a yaln̈ 'aj molb'il stumnal despacho. Xyi'n cot jun tzo'n̈ 'ichm pichl ta'. Xlajw cha, x'at eb' 'at yac' 'ejm jun tzo'n̈ nip chi yet' ch'an̈ lasu 'ayn 'a yojl jun xab' cha.

¹² 'Ix yaln win 'ixtc 'ayin: —'A'ch jun tzo'n̈ nip chi 'a yaln̈ a c'ab', sec wach' ma'oj a lajw yuj ch'an̈ lasu tic, xchi winac. Yuj cha, xin b'on 'icha 'ix yal win cha.

¹³ Xlajw cha, xya'n 'ejm ewin ch'an̈ lasu cha, yamb'il can sn̈i ch'an̈ yuj ewinac, in sto'n q'uet ewin yet' ch'an̈. Xlajw cha, axta in cancn 'a 'amac', 'a 'aj 'ayc' eb' tztan̈wni despacho.

'Awtb'il Jeremías yuj Sedequías

¹⁴ In ya'n win rey Sedequías chi 'ijxoc cot 'a yojltac, masnto 'a yoxl spuertail yatut Jehová. Ata 'ix yal win rey chi 'ayn 'ixtic: —'Ay jun tas 'oj in c'anb'c 'ayach, tzin nib'ej to caw wach' 'oj otc a pacn 'ayin, xchi winac.

¹⁵ —Q'uinloc tzin pac 'aych mamin rey, tzin ac' am milxoc chamoc, toto tzwac' junc nab'en 'ayach, tom 'oj a cha ab' 'ayin, xin chi 'a winac.

¹⁶ Palta caw c'ultacl xyac' win rey Sedequías sti 'ayn 'ixtic: —Wal 'a sat Jehová jun tz'a'n qui q'uinal, tzwa'n in ti 'ayach, chajtlto ma'oj ach wac' milxoc chamoc, an̈jtona ma'oj ach wa'ch pax 'a yol sc'ab' eb' tzach nib'n milnc chamoc, xchi win 'ayin.

¹⁷ Yuj cha, 'ix waln 'ixtc 'a win rey cha: —A Jehová tztac' yuj smasnil, atn qui Diosalec, a tzaln 'aych 'ixtic: Toto tza'ch a b'a 'a yol sc'ab' eb' general yic sreyl Babilonia, to 'ixta', 'oj a colchj yet' smasnil eb' cajn 'a yol atut, ax jun chon̈b' tic, ma'oj n̈usxoc.

¹⁸ Palta toto ma'oj a'ch a b'a 'a yol sc'ab' eb', to 'ixta', 'oj yi'c eb' jun chon̈b' tic, ax sn̈usn can eb', ach xo tic, man̈x 'oj stac' a coln a b'a 'a eb', xchi Dios, xin chi 'a win rey.

¹⁹ —Tzin xiw 'a eb' quit chon̈b' tox 'ix ya'ch sb'a yet' eb' 'aj Babilonia cha, toq'ue tzin 'ajx 'och 'a yol sc'ab' eb', ax am tz'aji, tzin yixtj eb', xchi win rey cha.

²⁰ Yuj cha, xwaln 'ixtc 'a winac: —Mamin rey, ma'oj ajx 'och 'a yol sc'ab' eb'. Yiclj wal spaxti Jehová 'ix wal 'ayach, sec 'ixta 'oj aj a colchji, caw wach' 'oj 'el'chi.

²¹ Yujto tox 'ix sch'ox Jehová 'ayin, tas 'oj ujoc, toto ma'oj a'ch a b'a 'a yol scab' eb' mamin rey.

²² Smasnil eb' 'ix 'ix 'oj can to cob' 'a a despacho, yowlal 'oj 'ijxoc 'elt eb' 'ix, ax yajx 'och eb' 'ix 'a yol sc'ab' ewin general yic win sreyl Babilonia, ax yaln eb' 'ix 'ixtic: A eb' caw swach'c'ojl win rey, 'ix yixtj paxti eb' winac, yuj cha, x'ejm winac. 'Icha to 'ix 'actx can 'at win 'a scal b'i'ch yuj eb', 'ix yi'n 'el sb'a eb' 'a stz'ey winac, 'oj schic eb' 'ix.

²³ Smasnil eb' 'ix estzil, yet' eb' onnal mamin rey, 'oj 'ajxoc 'och eb' 'a yol sc'ab' eb' 'aj Babilonia. Ach xo, ma'oj stac' a 'at 'elc 'a eb', palta to 'oj ajx 'och 'a yol sc'ab' win sreyl Babilonia cha, ax sn̈usn can eb' jun chon̈b' tic, xin chi.

²⁴ Xlajw cha, 'ix ta'w Sedequías chi 'ixtc 'ayin: —Toto tza nib'j matz ach chami, may cab' junc mach 'aj tzal jun tic.

²⁵ Toto 'oj yojcoc 'el jun tzo'n̈ xo eb' yajal, to in paxtin et'oc, 'oj jawc eb' 'ayach, ax sc'anb'n eb' yuj tas 'ix al 'ayin, yet' yuj tas 'ix wal 'ayach. 'Oj yal eb' 'ayach, to ma'oj ach smil cham eb', toto c'uxn 'oj al smasnil 'a eb'.

²⁶ Palta 'oj al 'a eb' to ton̈j tzach tew 'och 'ayin, yic wach' man̈xtzac ach wa't presoal 'a yatut Jonatán, sec wach' matz ach cham ta', xa chi, xchi Sedequías.

²⁷ 'Ixtnta ton x'aji. Wal 'a yajn̈ej 'ix cot eb' yajl chi wul in yila', 'ix sc'anb'n eb' jun tzo'n̈ chi 'ayin. Palta 'icha wal xyutj win rey yaln 'ayin, 'ixta xwutj ta'wc in b'a 'a ewinac. Yuj cha, 'ix yactn eb' sc'anb'n 'ayin, yujto may junc mach 'ix 'ab'n in paxtin yet' win rey cha.

²⁸ Yuj cha, in cann̈j 'a 'amac', 'a 'aj 'ayc' eb' tztan̈wni despacho, masnto 'a yic 'ix 'ejm Jerusalén.