Jeremías 37 - Chuj San Sebastian Bible

Tewnac Sedequías 'a Jeremías

¹ 'Ix 'ajx 'och Sedequías sreyloc chon̈b' Judá yuj win Nabucodonosor sreyl Babilonia. A Sedequías cha, yunnal Josías, 'ix 'ochcn reyl sjelc Jeconías yunnal Joacim.

² Palta an̈jtona Sedequías cha, yet' eb' 'aych yajlil yet'oc, yet' smasnil eb' yit chon̈ab', ma'ix schaj eb' yab' spaxti Jehová 'ix yac' wal 'a eb' an schecb' Dios in tic.

³ A win rey Sedequías cha, 'ix schec cot win Jucal yunnal Selemías, yet' win ya'mal 'och sti eb' 'a Dios, atn Sofonías yunnal Maasías, yic tzwul in yilnc eb' an Jeremías in tic, xyaln eb' 'ayn 'ixtic: Leslwan̈ 'a Jehová qui Diosalec cuj on̈, xchi eb'.

⁴ A 'a yic cha, mantzac in 'ajx 'och 'a preso, yuj cha, libre to in b'eyc' 'a scal eb' chon̈ab'.

⁵ A eb' soldado 'aj Babilonia oyn 'och eb' 'a spatquil Jerusalén, palta 'a yic jun tiempoal cha, 'ix yab'n eb' yab'xil to wan scot eb' soldado yic win sreyl Egipto, yuj cha, 'ix 'el eb' ta'.

⁶ Xlajw cha, 'ix paxtin Jehová 'ayin, 'ix ya'n wal 'a eb' checb'il cot chi 'ixtic:

⁷ Alc 'a sreyl Judá, atn jun ex checn cot wul e c'anb'c 'ayin, to a eb' soldado yic win sreyl Egipto 'ix cot colwjoc eyet' eyalni, tox 'ix meltzj pax eb' 'a Egipto cha.

⁸ Yuj cha, 'oj cotx eb' 'aj Babilonia chi wul ya'x owl 'a Jerusalén tic jun 'ejm xo. 'Oj 'ejmc jun chon̈b' tic yuj eb', ax ya'n can 'och eb' sc'aq'uil.

⁹ A Jehová tzaln 'ixtic: Man̈ eyixtc paxti e b'a, yic tzeyalni to tox 'ix 'el eb' soldado 'aj Babilonia 'a e cal, yujto man̈ 'ixta'oc yaji.

¹⁰ Wach'xam ax tic, 'oj eyac' ganar yejm eb' soldado wan ya'n owl eyet'oc, yuj cha, cojxn eb' lajwnac 'oj can 'a scamplamento eb' cha, palta a eb' cha, 'oj q'uex wan eb', ax ya'n can 'och eb' sc'a'l jun e chon̈b' tic, xchi Dios, xa chi 'a eb', xchi 'ayn an Jeremías in tic.

'Ochnc Jeremías 'a preso

¹¹ A yic x'el eb' soldado 'aj Babilonia 'a Jerusalén, yujto 'ix yab' eb' to wan sjaw eb' soldado win sreyl Egipto colwjoc 'a Jerusalén,

¹² a yic cha, in 'elt an Jeremías in tic 'a yol chon̈b' cha, in 'at 'a lum lum 'a yol yic Benjamín, yic tz'at in chanc in macl lum 'a eb' wican walni.

¹³ Palta a yic in c'och 'a spuertail chon̈b' 'a yol yic Benjamín cha, ata 'ay jun winc tzcuch Irías yunnal Selemías, yixchicn Hananías, a win cha, yajl yaj 'a eb' tztan̈wni puerta cha. A jun winc chi in yamn 'och wa'an, xyaln win 'ayn 'ixtic: —¡Ach tic, 'aych xo 'och yet' eb' 'aj Babilonia cha! xchi win 'ayin.

¹⁴ —Ma'ay, may in tzin 'och yet' eb' 'aj Babilonia cha, xin chi. Palta ma'ix schaj win Irías chi yab'i'. A yico', to in yij 'at 'a sat ewin yajal.

¹⁵ Caw xcot yowl ewin 'ayin, xin ya'n ma'xoc ewinac, xin ya'n ewin 'ajxoc 'och 'a preso 'a yatut Jonatán, win 'ajtz'ib'. A yatut win cha, a x'och presoal yuj ewinac.

¹⁶ Yuj cha, in 'ochcn 'a preso 'a yojl jun cuarto b'ob'il 'a yol lu'um. Caw niwn tiempo in can ta'.

¹⁷ Ax win rey Sedequías chi in 'a'n 'ijxoc 'at 'a sdespacho. A yic in c'och 'a yojltac win rey cha, 'ix sc'ultac c'anb'n win 'ixtc 'ayin: —¿'Aym junc spaxti Jehová tzal wab'i'? xchi winac. In ta'w 'ixtc 'a winac: —N', 'ay toni, 'ixtc wal yaln 'ixtic: Ach tic mamin rey, 'oj ajx 'och 'a yol sc'ab' win sreyl Babilonia, xin chi.

¹⁸ An̈jtona', 'ix in c'anb'n 'a win rey Sedequías chi 'ixtic: —¿Tas wal in mul 'ix 'och 'aych mamin rey, yet' 'a eb' et yajlil, yet' pax 'a eb' chon̈ab', yuj cha, in a'n 'ajxoc 'och 'a preso?

¹⁹ A jun tzo'n̈ xyalch sb'a schecb'oc Dios, eb' 'ix alni to ma'oj jawc win sreyl Babilonia wul yac' owl yet' jun chon̈b' tic, toc 'ix a'ch eb' 'a preso.

²⁰ 'Ab' wal tas 'oj wal ticnec jun mamin rey, a wal tas 'oj in c'an 'ayach, comnoc tzac' 'ayin: Man̈x in a cha 'ijxoc 'at 'a yatut win Jonatán, win 'ajtz'ib', ax to laj x'aji tzin cham ta', xin chi.

²¹ Yuj cha, xyaln win rey Sedequías to ata tzin can 'a 'amac', 'a 'aj 'ayc' eb' tztan̈wni jun despacho cha, ax 'a junjn c'u tz'ajx junjn pan 'ayin, ata tzmanx 'ixm 'a eb' b'om pan. 'Ichn̈jta x'aji, ya' sb'a 'ayt 'ixm pan chi 'a yol chon̈ab'. 'Ixtnta in 'aj in cancn 'a 'amc' cha.