Jeremías 36 - Chuj San Sebastian Bible

Yawtjnac Baruc*r* ch'an̈ un̈ 'a yatut Dios

¹ A yic schan̈l ab'il xo yoch Joacim win yunnal Josías reyl 'a Judá, ata 'ix yal Jehová 'ayn 'ixtic:

² 'Ij cot junc ch'an̈ un̈ 'aj tzach tz'ib'ni, tzlajw cha, tza tz'ib'n can smasnil tas 'ix walcn 'el 'a yib'n̈ Israel, 'a Judá, yet' 'a jun tzo'n̈ xo nacion̈, yictax in yamn 'och wal 'aych 'a yol stiempoal Josías masnto ticnec.

³ 'Awtj yab' eb' 'aj Judá, toq'ue a yic 'oj yab'nc eb' yuj jun tzo'n̈ yailal to nab'il wa'n cot 'a yib'an̈, toq'ue yuj cha, ax yactn can eb' smaysch'olnilal, to 'ixta', 'oj wac' lajwc smul eb' 'a yib'an̈, xchi Dios 'ayin.

⁴ 'Ix wawtn cot win Baruc yunnal Nerías. 'Ix waln smasnil tas 'ix yal Jehová 'ayin, ax Baruc cha, a 'ix tz'ib'n 'a jun ch'an̈ u'un̈.

⁵ Xlajw cha, 'ix waln 'a 'ixtic: 'Iltnab'n wal tas waji, caw tzin tenx 'och wan in 'at 'a yatut Jehová.

⁶ Yuj cha, a yic 'oj jawc jun c'u yic c'ajb'c'ojlal jun 'ejm xo, tzach 'at 'a yamq'uil yatut Jehová, ata 'oj awtc ch'an̈ un̈ tic 'ix wac' 'a tz'ib'c tic, sec wach' a smasnil eb' chon̈ab' yet' smasnil eb' 'anma cajn 'a yol yic Judá tzjaw 'a tic, 'oj yab' eb' spaxti Jehová.

⁷ Toq'ue 'oj yal sb'a eb' chon̈b' tic 'a Jehová, ax yactn can eb' smaysch'olnilal. Yujto caw wal niwquil yowl sc'ojl Dios snalb'ej ya'n cot 'a yib'n̈ jun chon̈b' tic, xin chi 'a 'a.

⁸ 'Ix sb'on win Baruc smasnil tas 'ix wal an Jeremías in tic 'a 'a. 'Ix 'at 'a yatut Jehová, 'ix yawtn spaxti Jehová tz'ib'b'il 'a ch'an̈ un̈ cha.

⁹ A 'a yic sb'aln̈il 'uj, yic yol ab'il xo yoch win Joacim win yunnal Josías reyl 'a Judá, ata 'ix sna'a, to a eb' 'anma cajn 'a Jerusalén, yet' jun tzo'n̈ xo eb' cotnc 'a jun tzo'n̈ xo lugar 'a yol yic Judá, to yowlal tz'och eb' smasnil 'a c'ajb'c'ojlal 'a yojltac Jehová.

¹⁰ 'Ix yawtn win Baruc tas tz'ib'b'il 'a yojl ch'an̈ un̈ cha, yic tzyab'n smasnil eb' 'anma'. Ata xyawtj 'a jun 'amc' chan̈ yaj chan̈ 'a yatut Jehová, 'a stz'ey jun 'ac' puerta 'a 'aj 'ay scuarto win Gemarías yunnal Safán, win 'ajtz'ib'.

Xyawtj Baruc ch'an̈ un̈*r* yab' eb' niwc yajal

¹¹ A Micaías yunnal Gemarías yixchicn Safán, 'ix yab' smasnil spaxti Jehová 'ix yawtj win Baruc 'a yojl ch'an̈ un̈ cha.

¹² Yuj cha, 'ix 'at 'a 'aj 'ay sdespacho win rey 'a scuarto win 'ajtz'ib', atn 'a 'aj yamn yaj eb' caw niwc yel'ch yopiso: atn Elisama, win 'ajtz'ib', Delaía yunnal Semaías; Elnatán yunnal Acbor; Gemarías yunnal Safán; Sedequías yunnal Hananías, yet' jun tzo'n̈ xo ewin 'aych yopiso.

¹³ 'Ix yaln Micaías smasnil tas 'ix yab' yaln win Baruc, yic 'ix yawtn win ch'an̈ un̈ 'a sat eb' chon̈ab'.

¹⁴ Ax ewin niwc yel'ch yopiso cha, 'ix checn 'at ewin jun win yunnal Netanías atn win Jehudí yixchicn Selemías yin̈tl can win Cus, yic tz'at yalnc 'a win Baruc chajtlto tz'ijx cot ch'an̈ un̈ 'ix 'awtx 'a sat eb' chon̈b' cha, yuj cha, 'ix yi'n cot win Baruc ch'an̈ un̈ chi 'a sat ewinac.

¹⁵ 'Ix yaln eb' 'ixtc 'a 'a: —'Emn̈ wocan, tzawtn ch'an̈ un̈ chi cab'i', xchi eb'. Xlajw cha, 'ix yawtn Baruc ch'an̈ un̈ cha.

¹⁶ A wal yic xyab'n ewin jun tzo'n̈ cha, caw wal 'ix xiw ewinac, 'ix 'och q'ueln junjn ewin 'a 'a, xyaln eb' 'ixtic: —Yowlal 'oj cal jun tzo'n̈ tic 'a win rey, xchi eb'.

¹⁷ 'Ix yaln eb' 'ixtc 'a win Baruc cha: —Al 'ayn̈ on̈, tas 'ix otj a tz'ib'n jun tzo'n̈ tic. ¿Am Jeremías 'ix aln 'ayach? xchi eb'.

¹⁸ —Atn wal Jeremías 'ix aln smasnil jun tzo'n̈ tic 'ayin, an xo xin tz'ib'j yet' tinta 'a jun un̈ tic, xchi Baruc cha.

¹⁹ 'Ix yaln eb' 'ixtc 'a winac: —'At c'ub'j 'el a b'a yet' Jeremías, may cab' mach tz'ojcan 'el 'aj tzex c'ochi, xchi eb' 'a winac.

Sn̈usjnac rey Joacim ch'an̈ u'un̈

²⁰ Ax ewin niwc yel'ch yopiso cha, 'ix yactn can ewin ch'an̈ un̈ chi 'a scuarto win Elisama, win 'ajtz'ib'. Xlajw cha, 'ix 'at ewin 'at yal smasnil jun tzo'n̈ tic 'a win rey 'a yamq'uil sdespacho.

²¹ Xlajw cha, 'ix checx 'at win Jehudí yuj win rey yic tz'at yi'nc win ch'an̈ un̈ chi 'aycn 'a yatut win Elisama cha. Ax yic xjaw win yet' ch'an̈ un̈ cha, 'ix syamn 'och win yawtn ch'an̈ 'a sat win rey, yet' 'a sat smasnil eb' 'ay yopiso oyn 'och smaclni yab'i'.

²² Yujto sb'aln̈il xo 'uj 'a jun ab'il cha, yuj cha, 'ayc' win rey chi 'a scuarto 'a 'aj tz'aj win 'a yic stiempoal si'ic, ax 'a yojltac winac, ata 'aych jun yet'l stzac'ac' caw tzn̈ilchj c'ac' 'a yojol.

²³ A yic xlajw yawtn win Jehudí 'oxe', mto chan̈ macn̈ yojl ch'an̈ un̈ cha, ax win rey cha, 'ix scotc poln 'elt win ch'an̈ yet' jun q'uen cuchlub' tzc'an ewin 'ajtz'ib', xlajw cha, xya'n 'at win ch'an̈ 'a yib'n̈ c'ac' cha. 'Ixta xyutj win sn̈usn smasnil ch'an̈ un̈ cha.

²⁴ Wach'xam xyab' win rey chi yet' smasnil eb' 'aych 'a yopiso yet'oc, yuj tas xyal ch'an̈ un̈ cha, palta caw ma'ix xiw xon jac eb', ma'ix sch'oxl eb' toto ya yalx tzyab' eb'.

²⁵ A Elnatán yet' Delaía, yet' pax Gemarías, caw 'ix tew 'och eb' 'a win rey cha, yic wach' matz n̈us win ch'an̈, palta ma'ix schaj xon win yab' tas xyal eb'.

²⁶ Palta a yic winac, to 'ix yal win 'a win Jerameel win yin̈tl eb' rey, yet' 'a Seraías yunnal Azriel, yet' 'a Selemías, yunnal Abdeel, chajtlto tzin sjalb't eb' an Jeremías in tic yet' jun win tz'ib'n wun̈ cha, atn win Baruc. Palta ax Jehová on̈ c'ub'n 'eli.

A junx ch'an̈ un̈*r* ya'jnac Jeremías tz'ib'xoc

²⁷ A yic tox 'ix n̈usx ch'an̈ un̈ yuj win rey, atn ch'an̈ 'aj tz'ib'b'il jun tzo'n̈ paxti waljnac 'a Baruc, ata 'ix yalx Jehová 'ayn 'ixtic:

²⁸ 'Ij cot junc xo ch'an̈ u'un̈, tzlajw cha, tza tz'ib'n can pax 'ejm 'a ch'an̈ jun tzo'n̈ paxti xa tz'ib'j 'a b'ab'el, ch'an̈ sn̈us win Joacim sreyl Judá.

²⁹ Tzaln jun tzo'n̈ paxti tic 'a win rey cha: 'Ixtc wal yaln Jehová: Ach tic 'ix 'a n̈us tz'a ch'an̈ u'un̈, 'ix a tenn 'och wan Jeremías yujto stz'ib'j 'a ch'an̈ un̈ cha, chajtlto 'oj jawc win sreyl Babilonia wul satl jun nacion̈ tic, man̈x 'a junc 'anma', man̈x 'a pax junc no noc' 'oj can 'a 'a.

³⁰ Yuj wal cha, an Jehová in, an tzwal 'aych Joacim, ach sreyl Judá, to may xon junc en̈tl 'oj 'och a jelc 'a sdespacho David. A 'a niwnal, 'oj can t'ocn 'a sat lu'um, ax sma'x yuj yoc c'u 'a c'ual, ax 'a 'ac'wal, 'oj ma'xoc yuj si'ic.

³¹ Ach tic yet' eb' en̈til, yet' pax eb' 'aych yopiso et'oc, caw 'oj wa'ch yailal 'a eyib'n̈ yuj e mul. 'Oj jawc 'a yib'n̈ eb' 'aj Jerusalén, yet' 'a yib'n̈ eb' 'aj Judá, atn jun tzo'n̈ yailal 'ix walcn 'el tic, atn jun tzo'n̈ paxti ma'ix e chaj eyab'i', xchi Dios, xa chi 'a eb', xin chi 'a Baruc cha.

³² Xlajw cha, xwi'n pax cot junx b'e'n̈ ch'an̈ u'un̈, 'ix wa'n 'a win Baruc, win 'ajtz'ib' yaj 'ayin. Ax win stz'ib'n pax smasnil tas 'ix walx cha, tzyal 'el'chi, atn smasnil tas tz'ib'b'il 'a ch'an̈ sn̈us win Joacim. 'Ayt jun tzo'n̈ xo stz'acb' xwac' stz'ib'c 'och to pax 'a ch'an̈.