Jeremías 34 - Chuj San Sebastian Bible

A tas alb'il 'a rey Sedequías

¹ A Nabucodonosor sreyl Babilonia, 'ix cot yet' smasnil eb' soldado, yet' eb' cotnc 'a smasnil nacion̈ 'aych 'a yaln̈ schecnb'il winac. 'Ix wul ya'nc eb' owl 'a Jerusalén yet' 'a jun tzo'n̈ xo eb' chon̈b' 'ayc' 'a sla'nil. A yic cha, 'ix yaln Jehová 'ayn an Jeremías in tic 'ixtic:

² An Jehová in, e Diosal in, an tzwal 'ayach, to tz'at al 'ixtc 'a Sedequías sreyl Judá: Al 'a 'a to an Jehová in, an tzwal 'ixtic: 'Oj wa'ch jun chon̈b' tic 'a yol sc'ab' sreyl Babilonia, a 'oj n̈usnoc cani.

³ Ach tic man̈x 'oj stac' a 'at 'eloc. 'Oj a yamchj yuj eb' soldado winac, ax ach ya'n 'och eb' 'a yol sc'ab' win rey cha. A yic 'oj a c'och 'a yojltac, ax spaxtin win et'oc, 'oj lajwc cha, ax ejx 'at 'a Babilonia.

⁴ Ach Sedequías, 'ab' wal tas 'oj wal 'aych an Jehová in tic: Ma'oj a milx cham yet' q'uen espada,

⁵ palta to 'oj a cham wal 'a tzaljc'ojlal. An Jehová in, an tzwac' in ti', to 'icha wal yutjnac eb' 'anma ya'n tz'a incienso yic smucx eb' a mam echam, atn eb' 'ochnc reyal 'a yic mantzac ach 'och ach tic, an̈jtona 'ixta 'oj yutc pax eb' ya'n tz'a incienso yic 'oj a mucxi. Caw 'oj 'oc' eb' o'oj, ax yaln eb' 'ixtic: ¡'Ay, caw 'ix cham win qui reyal! 'oj xchic eb', xchi Dios, xa chi 'a 'a, xchi Dios 'ayin.

⁶ An Jeremías in tic schecb' in Dios, 'ix wal smasnil jun tzo'n̈ tic 'a win rey Sedequías 'a Jerusalén.

⁷ Ya' sb'a cha, a eb' soldado yic Babilonia, 'ayx 'och eb' yac' owl 'a Jerusalén, 'a Laquis yet' 'a Azeca, wan ya'n eb' yip yoch 'a smuroal jun tzo'n̈ chon̈b' tic. A 'a yol yic Judá, cojxn 'oxe chon̈b' tic mantzac 'ejm yuj eb'.

A eb' israel 'aych mosoal*r* 'ix alxi to tz'el eb' 'a libre

⁸ Xlajw cha, xyaln pax Jehová 'ayin, yic tox 'ix lajw ya'n Sedequías jun strato yet' smasnil eb' cajn 'a Jerusalén, yic tz'ajx 'el eb' 'aych mosoal 'a eb' 'a libre.

⁹ 'Ixtc x'aj jun trato chi sb'o'i, to a smasnil eb' to yit chon̈b' 'aych smosooc, yowlal tz'ajx 'el eb' 'a libre, wach'xam winac, mto 'ix, sec wach' man̈x 'a junc eb' yit chon̈b' eb' chi tz'ochcn mosoal.

¹⁰ Smasnil eb' yajal yet' smasnil eb' chon̈ab', 'ix schaj sc'ojl eb' jun trato cha. 'Ixta 'ix yutj eb' ya'n 'el eb' smoso chi 'a libre. Man̈x 'ic 'ajx pural eb' moso chi smunlj 'a eb'.

¹¹ Xlajw cha, 'ix snan pax sb'a sc'ojl eb' yajl cha, yujto 'ix ya'l ewin eb' smoso chi 'a libre. Yuj cha, 'ix ya'n pural eb' smunlj pax eb' smoso chi 'a jun 'ejm xo.

¹² Yuj cha, xyaln Jehová 'ayn 'ixtic:

¹³ An Jehová in, e Diosal in, in b'ojnac jun in trato yet' eb' e mam eyicham, yic 'ix wi'n 'elt eb' 'a Egipto, atn 'a 'aj 'aych eb' mosoal, 'aj man̈ yico'oc sb'a eb'. A yic cha, 'ix wala,

¹⁴ to a 'a junjn yuctquil ab'il, tzeya'n 'el eb' e moso 'a libre, atn eb' eyit israelal, eb' tzchon̈ch sb'a e mosooc, eb' tox ex 'a'n servil waque'oc ab'il. Palta a eb' e mam eyichm cha, ma'ix schaj eb' yab' tas waljnac, caw ma'ix syiclj eb'.

¹⁵ 'Ixta pax xeyutj e b'a ax tic, palta 'ix e jel e b'eyb'al, yujto wan e b'on tas caw tzchaj in c'ojol, atn yujto xeya'l eb' eyit chon̈b' 'aych mosoal 'ayx 'a libre, 'ix eya'n can e ti 'a jun e trato 'ix e b'o 'a wojltac, atn 'a watut to wicn̈ej yaji.

¹⁶ Xlajw cha, xe jeln e nab'en jun 'ejm xo, in e patquiln 'el paxi. 'Ix eya'n pural eb' e moso chi ex ya'n servil jun 'ejm xo, wach'xam cob' tox xeya'l eb' 'a libre.

¹⁷ Yuj cha, an Jehová in, an tzwala: Ax tic ma'ix eyiclj tas 'ix wala, yujto ma'ix eya'l eb' eyit chon̈b' 'a libre. Yuj cha, an tzwala to 'oj wa' cot owal, wejel, yet' yab'il 'a eyib'an̈. Caw 'oj xiw smasnil eb' nacion̈ yic 'oj yab'nc eb' tas 'oj ex wutoc.

^18-19 A eb' yajl yaj 'a Judá, yet' 'a Jerusalén, yet' eb' 'aych 'a'j servil 'a despacho, yet' eb' ya'mal 'och sti eb' 'anma 'ayin yet' pax smasnil eb' 'anma cajn ta', 'ix sb'o eb' jun strato 'a wojltac. Chab' xyutj 'el eb' snan̈l jun no quelm wacax, xlajw cha, 'ix b'eyc' eb' 'a snan̈l no'. Palta wal 'a yajn̈ej spatquiln 'el eb' jun strato 'aj xyac' sti cha, yuj cha, 'ixta 'oj wutc eb' 'icha xyutj eb' no wacx cha.

²⁰ Yuj cha, an wal 'oj wac' 'ajxoc ganar eb' yuj eb' 'ajc'ojl yajch 'a 'a, 'oj milxoc cham eb' yuj eb', ax e no 'usej, yet' e no calte'al noc', a e no 'oj chinc sniwnal eb'.

²¹ An 'oj wac' 'ajxoc ganar Sedequías sreyl Judá, yet' smasnil eb' 'aych yajlil yet'oc, caw 'oj 'em eb' yuj eb' 'ajc'ojl yajch 'a cha, atn eb' tznib'n xon milnc cham eb'. 'Oj 'ajxoc ganar eb' yuj eb' soldado yic Babilonia, wach'xam tox xcob' 'actx can eb' yuj eb'.

²² An Jehová in, an tzwala: 'Oj wac' jawc pax eb' 'a jun chon̈b' tic jun 'ejm xo, ax ya'n pax eb' owl yet'oc. 'Oj 'ejmc yuj eb', ax sn̈usn can eb'. Ax jun tzo'n̈ xo chon̈b' 'a yol yic Judá, 'oj wa'cn 'och eb' 'a cusltac lumal, man̈x 'a junc 'anma 'oj can cajn 'a 'a, xchi Dios.