Jeremías 33 - Chuj San Sebastian Bible

A tas 'oj 'aj sq'uex c'och*r* Jerusalén jun 'ejm xo

¹ A yic 'aynto 'och presoal 'a 'amc' 'a 'aj 'ayc' eb' stan̈mal despacho, 'ix paxtin pax Jehová 'ayn jun 'ejm xo 'ixtic:

² An Jehová in, an xin b'o yolyib'n̈q'uinl tic, xin tojlb'tzan can 'a yet'ul, an tzwal 'ayach:

³ C'anb'j 'ayin, 'oj wal jun tzo'n̈ tas caw niwn yel'ch 'ayach, to satjub'tac yalxi, atn jun tzo'n̈ to mant ojcoc.

⁴ An Jehová in, e Diosal in, 'ay wal jun in paxti tzwalcn 'a yib'n̈ yatut eb' 'aj Jerusalén, yet' 'a yatut eb' sreyl Judá, atn jun tzo'n̈ wan sma'x lan̈chjoc yic tzc'anx sq'uenal 'a jun tzo'n̈ oln 'a smuroal chon̈ab', yic wach' matz 'och eb' caldeo wan ya'n owl eyet'oc.

⁵ A 'aj 'ix 'el jun tzo'n̈ n̈a cha, caw 'oj b'ut'joc 'el yuj sniwnal eb' 'anma 'oj in mil cham yuj yowl in c'ojl to man̈x yalnb'iloc. Tox 'ix wij 'el in sat 'a jun chon̈b' tic, yujto caw wal niwn smul eb' xya'chi.

⁶ Palta 'ay jun c'ual to 'oj wan̈tc pax eb', ax wa'n stzatzl eb' jun 'ejm xo. 'Oj wac' 'aj cajn eb' 'a junc'ojlal, man̈x 'a tas 'oj 'i'nc eb'.

⁷ 'Oj wi'x meltzjoc eb' 'aj Judá yet' eb' 'aj Israel jun 'ejm xo 'a 'aj 'ayc' eb' 'icha presoal, ax in b'on pax chan̈ schon̈b' eb' jun 'ejm xo 'a 'icha xon yaji.

⁸ 'Oj wi'cn 'el smaysch'olnilal eb'. 'Oj wa'cn lajwc smul eb' cha, yet' smasnil stenmtacl eb' 'ayin.

⁹ A Jerusalén tic, caw 'oj tzaljc in c'ojl yu'uj, 'oj wac' junc'ojlal 'a 'a. A wal yic 'oj yab'nc smasnil eb' nacion̈ yuj tas niwn yel'ch 'oj in b'o 'a 'a, caw 'oj yal eb' wach' paxti 'ayin, ax in sb'inan eb' si'mb'il. Palta caw 'oj satcn sc'ojl eb', 'oj 'ib'xoc eb' yuj xiwlal, yic 'oj yilnc eb', xchi Dios.

¹⁰ 'Ix yaln pax Jehová 'ixtic: Ax tic tzeyala, to a jun lugar tic caw cusltac yajcni, man̈x 'a 'anma', man̈x 'a pax no noc' tz'ilx yec' 'a 'a; wach'xam a 'a yoltc scayeal Jerusalén, yet' 'a yoltc jun tzo'n̈ chon̈b' 'a Judá, caw wal sictac yajcni, man̈x 'a junc 'anma', man̈x 'a pax junc no noc' 'ayc' 'a 'a.

¹¹ Palta ax 'oj 'ajoc, a 'a tic 'oj 'ab'xoc pax yoch b'it yic q'uin̈ yet' yic tzaljc'ojlal jun 'ejm xo, yet' b'it yic eb' quelem yet' eb' 'ix cob'es yic tznupn eb'. 'Oj 'ijxoc cot ofrenda yic alj yuj diosal 'a watut, ax laj yalnc eb' 'ixtic: Alc yuj diosal 'a Jehová tztac' yuj smasnil, yujto caw wach' snab'en, 'ay schamc'ojlal 'a smasnil tiempo, 'oj schic eb'. An Jehová in, an tzwala: Caw 'oj wi'xq'ue'ch jun chon̈b' tic 'icha xon yaj 'a yic yaln̈taxi.

¹² A 'a jun lum lum sictac yajcn tic, man̈x 'a 'anma', man̈x 'a pax no noc' 'a sat smasnil. Palta ax 'oj 'ajoc, a 'a spatquil 'el jun tzo'n̈ chon̈b' tic, ata 'oj tan̈wxoc wa no calnelu yuj eb' yilmal jun 'ejm xo.

¹³ An Jehová in, an tzwala: A 'a eb' lum chon̈b' 'ay 'a lum jolmctac witz, 'a eb' lum pan̈n 'a'lic, 'a lum Négueb, 'a lum yic Benjamín, yet' 'a jun tzo'n̈ aldea 'a spatquil 'el Jerusalén, yet' 'a jun tzo'n̈ xo chon̈b' 'a yol yic Judá, 'oj 'ilxoc eb' 'ilm calnelu jun 'ejm xo ta', 'oj 'ab'xoc sb'isn eb' no scalnelu cha, xchi Dios.

¹⁴ Tzyaln pax Jehová 'ixtic: 'Oj jawc sc'ual, ax yel'ch tas 'aj wa'jnac can in ti', to tzwac' in yaxilal 'a yib'n̈ chon̈b' Israel yet' 'a chon̈b' Judá.

¹⁵ A wal yic 'oj jawc jun tiempoal cha, 'oj wa'ch junc yin̈tl David reyal, a 'oj 'i'nc chan̈ tojlal yet' wach'ilal 'a jun nacion̈ tic.

¹⁶ A 'a yic jun tiempoal cha, a eb' 'aj Judá 'oj colchjoc can 'el eb', ax eb' 'aj Jerusalén, man̈x 'a tas 'oj 'i'noc eb'. Atn jun b'i tic 'oj 'ajxoc 'a eb' 'ixtic: A Jehová Tzon̈ B'onyajec 'A Stojlal, xchi.

¹⁷ An Jehová in, an tzwala: May b'a'n̈ 'oj satl yin̈tl David, palta an̈j eb' 'oj 'em wocn 'a jun despacho 'a chon̈b' Israel.

¹⁸ An̈jtona', may b'a'n̈ 'oj satl eb' ya'mal 'och sti eb' 'ayin, yet' jun tzo'n̈ xo eb' yin̈tl Leví, smasnil tiempo a eb' 'oj 'a'nc tz'a xajmb'al 'ayin. 'A junjn c'u ax ya'n tz'a eb' 'ixm trigo ofrendail 'ayin, ax ya'n eb' jun tzo'n̈ xo xajmb'al 'ayin, xchi Dios.

¹⁹ 'Ix yaln pax Jehová 'ixtc 'ayn an Jeremías in tic:

²⁰ An Jehová in, an tzwala: 'Ay jun in trato wa'jnac cani, chajtlto 'ay c'ual 'ay 'ac'wal, 'a 'icha stiempoal, matz tac' sjelmj jun in trato cha.

²¹ An̈jtona', matz tac' satl jun in trato in b'ojnac yet' in checb' David, to yowlal 'ayn̈j 'ec' eb' yin̈tl yac' yajlil 'a sdespacho. Ma'oj satl pax in trato in b'ojnac yet' eb' yin̈tl Leví yic tzin ya'n servil eb', yuj ya'n 'och eb' sti eb' 'anma 'ayin.

²² A eb' yin̈tl in checb' David, yet' jun tzo'n̈ eb' yin̈tl Leví 'aych ya'malc 'och sti eb' 'anma 'ayin, caw 'oj wac' niwtjoc sb'isl eb' 'icha wal c'anal 'ay 'a satcha'an̈, mto 'icha wal yarenail sti a mar, may junc mach tztac' sb'isni, xchi.

²³ 'Ix yaln pax Jehová 'ayn 'ixtic:

²⁴ ¿Tom matz nachj 'el o'oj, tas tzyal eb' 'anma'? Tzyal eb' chajtlto xin patquilj can 'el chab' 'in̈tal eb' 'anma tic sic'b'il 'el wu'uj, atn eb' 'aj Israel yet' eb' 'aj Judá. Yuj cha, man̈x 'a yel'ch eb' in chon̈b' 'a sat eb', man̈x nacion̈oc eb' 'a eb'.

²⁵ An Jehová in, an tzwala, to in b'ojnac jun in trato yet' c'ual yet' 'ac'wal, tzwilni tas tz'aj sb'ey satcha'an̈ yet' lum lum tic, may tz'aj sjelmj jun in trato cha.

²⁶ An̈jtona may b'a'n̈ 'oj jelmjoc jun in trato yet' eb' yin̈tl Jacob, yet' eb' yin̈tl win in checb' David. Yowlal 'oj in sic' 'elt junc yin̈tl David cha, ax ya'n yajlil 'a yib'n̈ eb' yin̈tl Abraham, Isaac, yet' Jacob. Yujto caw tz'o'chn̈ej in c'ojl 'a eb', yuj cha, 'oj wi'xq'ue'ch eb' jun 'ejm xo, xchi Dios.