Jeremías 29 - Chuj San Sebastian Bible

Scarta Jeremías*r* 'a eb' 'ijxnac 'at 'icha presoal

^1-2 An Jeremías in tic in cancn 'a Jerusalén tic, palta til wal eb' 'aj Jerusalén yet' eb' 'aj Judá 'ix 'ijx 'at 'icha presoal 'a Babilonia yuj win rey Nabucodonosor. 'Ix 'ijx 'at win rey Jeconías yet' 'ix reina, atn 'ix snun winac, yet' eb' 'aych yopiso 'a sdespacho winac, eb' yajl yaj 'a Judá yet' 'a Jerusalén, eb' b'om yamc'ab', yet' pax eb' tenmq'ue'en. Yuj cha, 'ix in tz'ib'n 'at jun in carta 'a eb' schecb' Dios, 'a eb' ya'mal 'och sti eb' 'a Dios, yet' 'a eb' tzjucb'tzan eb' chon̈ab', yet' 'a smasnil eb' quit chon̈b' 'ijxnac 'at 'a Babilonia cha.

³ 'Ix 'ijx 'at jun carta chi yuj Elasa yunnal Safán, yet' Gemarías yunnal Hilcías, atn eb' tic xchecx 'at yuj Sedequías sreyl Judá 'a Babilonia 'a win Nabucodonosor. A jun carta cha, tzyal ch'an̈ 'ixtic:

⁴ 'Ixtc wal yaln Jehová tztac' yuj smasnil, atn qui Diosalec an̈ israel on̈c tic, tzyal 'ayx e masnil ex 'aj Jerusalén 'ijxnac 'at 'icha presoal 'a Babilonia:

⁵ B'oc eyatut, cajec, 'awjec te 'awb'ente', tze lon sat eb' te'.

⁶ 'A'c 'och eyistzil, 'alj cab' eyunnal yet'oc, 'och cab' pax yistzil eb' eyunnal cha, 'alj cab' pax yunnal eb'. Q'uib' cab' e b'isl ta', man̈ 'emtoc cab' e b'isul.

⁷ Munljan̈c yuj swach'loc jun chon̈b' 'aj ex wa'cn 'at cha. C'anc in colwal 'a yib'an̈, q'uinloc caw wach' yajc' jun chon̈b' cha, to 'ixta', caw wach' 'oj eyajc' pax ax tic.

⁸ Yujto an Jehová in, tztac' wuj smasnil, e Diosal in, an tzwal jun tzo'n̈ tic: Man̈ eyac' 'ixtxoc paxti e b'a yuj jun tzo'n̈ eb' tzyalch sb'a in checb'oc, ticni yes eb', yet' eb' tzcob' alnoc to tztac' snan 'el junc paxti'. Man̈ e cha eyab' swaych eb' tzyal 'ayex.

⁹ A tas tzyal-l eb' 'a in b'i cha, caw 'esn̈ej. An Jehová in, an tzwala to man̈oc in xin checb't eb'.

¹⁰ Tzwaln pax junx tic: A yic 'oj tz'acwc 70 ab'il e c'och 'a Babilonia cha, ax in colwj pax eyet'oc, 'oj wac' 'el'choc in ti wa'jnac cani, chajtlto 'oj ex wi'x meltzjoc 'a tic jun 'ejm xo.

¹¹ Wojtac tas nab'il wuj 'a eyib'an̈. An Jehová in, an tzwala to a tas nab'il wuj cha, man̈ yujoc eyab'n syail, palta yuj e wach'loc, sec ax 'a slajub' ax wa'n tas 'aych yipc e c'ojol.

¹² 'Oj lajwc cha, ax eyaln e b'a 'ayin, caw 'oj e leslwi 'ayin, ax wab'n pax e lesl cha.

¹³ An Jehová in, an tzwala to a yic 'oj e jaw 'ayin, 'oj in ch'ox in b'a 'ayex, yujto yet' wal smasnil e c'ojol, ax eya'n 'och e b'a 'a yol in c'ab'.

¹⁴ 'Oj in ch'oxn̈j in b'a 'ayex. An Jehová in, an tzwala to 'oj in jel tas 'aych 'a eyib'an̈, ax ex wi'n cot 'a smasnil nacion̈, yet' 'a smasnil 'ajtil sactzicnac eyajcn 'at wu'uj. 'Oj ex in molb'tzoc paxta, ax e jab'x 'a 'aj 'ayx 'eq'ui, yic eyijx 'ati.

¹⁵ Ax tic tzeyala: 'Ayx eb' schecb' Jehová 'a qui calc 'a Babilonia tic, xe chi.

¹⁶ Palta a Jehová tzaln 'ixtc yuj win rey 'aych can pax sjelc David 'a sdespacho, yet' 'a eb' 'aycn 'a jun chon̈b' tic, atn eb' eyican to e b'a yet'oc, eb' ma'ix 'ijx 'at eyet' 'icha presoal.

¹⁷ An Jehová in, tztac' wuj smasnil, an tzwala: 'Oj wa't owal, wejel, yet' yab'il 'a scal eb'. 'Oj wac' yajxoc eb' 'icha jun tzo'n̈ te higo c'alxo, caw juwnac xo, man̈xtzac stac' sloxi.

¹⁸ 'Oj in pech b'eyc'oc eb' yet' owal, yet' wejel, yet' pax yab'il. Ax wa'n yajxoc eb' yuj jun tzo'n̈ nacion̈. 'Oj jawc catb' 'a yib'n̈ eb', caw 'oj xiw eb' 'anma yiln 'och eb'. 'Oj b'uchwjoc eb' 'anma chi 'a eb', ax sb'ajx eb' yuj eb' 'a jun tzo'n̈ nacion̈ 'aj 'oj sactzic can 'at eb' wuj cha,

¹⁹ yujto ma'ix schaj eb' yab' tas 'ix wac' yal eb' in checab', caw niwn 'ejm xyal eb' 'a eb'. An Jehová in, an tzwala to an̈jtona ax tic, ma'ix e chaj eyab' pax jun xo.

²⁰ E masnil ex 'aj Jerusalén, ex 'ic'b'ilx 'at 'icha presoal 'a Babilonia, 'ab'c wal tas tzwala.

²¹ An Jehová in, tztac' wuj smasnil, e Diosal in paxi, tzwal yuj win Acab yunnal Colaías, yet' pax yuj Sedequías yunnal Maasías, atn eb' tzaln 'el jun tzo'n̈ 'es paxti 'a in b'i: 'Oj wac' milxoc cham eb' yuj Nabucodonosor cha. Q'ueln ex 'och wal 'ax tic, ax smiln cham win eb'.

²² Yuj cha, ex 'aj Judá, ex to 'ijxnac 'at 'a Babilonia, toto 'ay junc ex tze nib'j tze catb'tzej can junc xo mach, 'ixtc cab' tzeyutj eyalni: Sb'o cab' Jehová et' 'icha yutjnac win Sedequías yet' win Acab, a ewin tic, 'ix yac' win Nabucodonosor n̈usxoc eb', xchi cab'i'.

²³ 'Ixta wal 'oj 'aj sjaw 'a yib'n̈ eb', yujto yel xo tu tas tzb'o eb' 'a yol e chon̈ab'. Tzb'o eb' 'ajmulal yet' yistzil eb' yit wincal. Tzya'n eb' 'es, tzyaln 'el eb' jun tzo'n̈ paxti chi 'a in b'i, palta man̈oc in tzwac' yal-l eb'. An Jehová in, an tzwala, wojc tas yaji, xchi Dios, xin chi 'a jun carta cha.

A tas alb'il 'a win Semaías

^24-32 'Ay jun winc 'aj Jerusalén 'ayc' 'a Babilonia, Semaías sb'i 'aj Nehelam. A jun winc cha, mun wal yol yico', 'ix stz'ib'n cot jun scarta 'a smasnil eb' 'anma cajn 'a Jerusalén, yet' 'a win Sofonías ya'mal 'och sti eb' 'a Dios, win yunnal Maasías, yet' pax 'a jun tzo'n̈ xo eb' ya'mal 'och sti eb' 'a Dios. A 'a jun scarta cha, 'ix yal cot 'a Sofonías 'ixtic: A Jehová ach 'a'n 'och ya'malc 'och qui ti 'a Dios sjelc win Joiada, yic wach' ach sat tzach 'aj e'n b'ey eb' 'anma 'a yatut Dios. Toto 'ay mach 'icha to 'ay cot 'a sjolom tzc'och 'ayach, tzyamn 'och spaxtini, tzyaln 'och sb'a schecb'oc Dios, a jun cha, 'in yajn̈j cha tza'n 'och 'a yojl te sepo, tza jaln yet' cadena. Palta ¿tas pax yuj ma'ix a tench wan win Jeremías 'aj Anatot, win caw tzte'wtzej sb'a spaxtin 'a ojltac, 'icha wal schecb' Dios tzyutj sb'a? An̈jtona 'ix ya' cot pax jun scarta 'a 'ayn̈ an̈ 'ayn̈ 'ec' 'a Babilonia tic. Tzyaln 'a scarta tic 'ixtic: Niwn to tiempo 'oj eyaj ta', b'oc eyatut, cajec, 'awjec eyawb'ente', tze lon sat te tzyac'a, xchi cot Jeremías chi 'ayn̈ on̈, xchi win Semaías chi 'a scarta. Ax Sofonías cha, 'ix 'awtn ch'an̈ carta chi wab' an Jeremías in. Xlajw cha, 'ix paxtin Jehová, 'ix yaln 'ayn 'ixtic: Alb't 'a Semaías win 'aj Nehelam, yet' 'a smasnil eb' 'ayb't 'icha presoal, chajtlto an tzwala: A win Semaías 'aj Nehelam, 'ix yal win 'ayex, to an ab' 'ix wac' yal win jun tzo'n̈ cha, palta caw man̈oc in xwac' yal winac, 'ix ya'n 'och win jun 'es paxti chi yipc e c'ojol. Yuj cha, an Jehová in, an tzwala: Caw 'oj wa'ch syailal Semaías cha, yet' 'a eb' yin̈til. May wal junc yin̈tl chi 'oj wac' 'aj cajn 'a scal eb' in chon̈ab', ma'oj yac' tzaljoc sc'ojl yet' in wach'c'ojlal 'oj wac' 'ayex, yujto yujn̈ej jun tzo'n̈ spaxti win cha, 'ix eya'n pitb'oc e b'a 'ayin, xchi Dios, xa chi, xchi 'ayin.