Jeremías 28 - Chuj San Sebastian Bible

A Jeremías yet' Hananías

¹ A 'a yic yol 'uj 'a jun ab'il cha, tzyal 'el'chi atn 'a yic schan̈l ab'il yoch Sedequías reyl 'a Judá, a Hananías yunnal Azur 'aj Gabaón, atn jun tzyalch sb'a schecb'oc Dios, 'ix 'at 'a yatut Dios 'a 'aj 'ayn 'ec' an Jeremías in. Wal 'a sat eb' ya'mal 'och sti eb' 'anma 'a Dios, yet' 'a sat smasnil eb' chon̈ab', xyaln 'ixtic:

² —A Jehová tztac' yuj smasnil, qui Diosalec an̈ israel on̈c tic, a tzaln 'ixtic: 'Oj in mac' wecchjoc te yugo yic win sreyl Babilonia.

³ Yic wal chab' ab'il ticnec, ax wi'n pax meltzjoc smasnil syamc'ab'il watut 'ic'b'il 'at yuj rey Nabucodonosor 'a Babilonia.

⁴ An Jehová in, an tzwala, to 'oj wi'x meltzjoc Jeconías yunnal Joacim sreyl Judá, yet' smasnil eb' 'anma 'ijxnac 'at 'icha presoal 'a Babilonia cha. Yowlal 'oj wi'x can 'el yopiso win sreyl Babilonia 'a eyib'an̈, xchi Dios, xchi Hananías.

⁵ Xlajw cha, an Jeremías in, schecb' Dios waji, in ta'w 'a win Hananías cha, 'a sat eb' ya'mal 'och sti eb' 'anma 'a Dios yet' 'a sat smasnil eb' 'anma 'ayc' 'a yamq'uil yatut Dios cha, 'ix waln 'a 'ixtic:

⁶ —Yel toni, comnoc tzb'o Jehová jun cha. Comnoc wal tzb'o 'icha jun tzo'n̈ paxti tzal cha. Comnoc tzyijx meltzjoc jun tzo'n̈ syamc'ab'il yatut 'ijxnac 'at 'a Babilonia, yet' pax smasnil eb' 'anma yamchjnac can 'ati.

⁷ Palta 'ab' wal tas 'oj wal 'ayach, yet' 'a smasnil eb' chon̈b' tic:

⁸ A jun tzo'n̈ schecb' Dios 'e'nc 'a pecti', 'a yic mantzac on̈ 'alj et'oc, yaljnac 'el eb' chajtlto 'oj jawc owal, yailal, yet' yab'il 'a yib'n̈ jun tzo'n̈ niwc nacion̈ to caw cob' 'ay yip.

⁹ Palta a junc checb' tzaln pax 'eli, to 'oj niwtjoc tas wach' 'a jun nacion̈ tic, masnto 'a yic 'oj 'el'choc, atta 'oj checljoc 'eli, toto a Jehová 'a'jnac yal-l jun cha, mto ma'ay, xin chi 'a 'a.

¹⁰ Xlajw cha, xyi'n 'el Hananías chi jun te yugo 'aych 'a in jaj an Jeremías in, 'ix sma'n wecchjoc.

¹¹ Wal 'a sat smasnil eb' chon̈ab', 'ix yaln 'ixtic: —A Jehová 'ix aln 'ixtic: Yic wal chab' ab'il ticnec, ax wi'n 'el jun yugo 'aych 'a yib'n̈ jun tzo'n̈ nacion̈ yuj win Nabucodonosor, ax in ma'n can wecchjoc, xchi Dios, xchi Hananías. Xlajw xoj cha, in 'at an Jeremías in tic.

¹² A yic tox 'ix 'ec' jun tiempoal 'a yic sma'n wecchjoc Hananías te yugo yijnac 'el 'a in jaj, 'ix yaln pax Jehová 'ayn 'ixtic:

¹³ 'Ixic, 'at al 'a Hananías, chajtlto an Jehová in, an tzwala: Stac' a ma'n wecchjoc te yugo, palta ax jun yugo to nab'a hierro a 'oj wa'xcan sjelc te'.

¹⁴ An Jehová in, tztac' wuj smasnil, sDiosal in Israel, an tzwala: 'Ix wa'ch wal jun yugo to nab'a hierro 'a yib'n̈ jun tzo'n̈ chon̈b' tic yic tz'och eb' mosoal 'a win Nabucodonosor cha. An̈jtona e no calte'al noc', 'ix wa'cn 'och e no 'a yaln̈ schecnb'il jun rey cha, xchi Jehová, xa chi 'a 'a, xchi Dios 'ayin.

¹⁵ Xlajw cha, xwaln 'a Hananías 'ixtic: —Ach Hananías, 'ab' wal tas 'oj wala', ach tic, man̈oc Jehová ach checn coti. Caw man̈ yelc tas wan a'n 'och yipc sc'ojl eb' chon̈b' tic.

¹⁶ Yuj cha, 'ix yal Jehová 'aych 'ixtic: 'Oj ach wi'l 'a sat lum lum tic. A 'a jun ab'il tic 'oj a chami. Yuj jun tzo'n̈ a paxti 'ix ala, yuj cha, 'ix 'och eb' chon̈b' tic tenmtacl 'ayin, xchi Dios, xin chi 'a 'a.

¹⁷ A 'a yic yucl xo 'uj yoch jun ab'il cha, 'ix cham Hananías.