Jeremías 24 - Chuj San Sebastian Bible

Yab'xil chab' xuc te sat higo

¹ A Jeconías sreyl Judá yunnal Joacim, 'ix 'ijx 'at 'icha presoal yuj Nabucodonosor sreyl Babilonia. 'Ix 'ijx 'at pax eb' 'aych yajlil yet'oc, eb' b'om n̈a, yet' pax eb' tenmq'ue'en. Xlajw cha, 'icha waychil 'ix yutj Jehová sch'oxn chab' xuc te sat higo 'ayin, ata 'ay 'a yojltac yatut Jehová cha.

² A 'a yojl junc te xuc cha, ata 'ay 'ejm te caw wach', caw wal 'ec'um, atn te sb'ab'l sat. Ax 'a yojl junx te xuc cha, ata 'ay 'ejm te c'al xo, man̈xtzac stac' qui lon te'.

³ 'Ix sc'anb'n Jehová 'ixtc 'ayin: Jeremías ¿tas tzela? xchi. In ta'w 'ixtc 'a 'a: 'Ay chab' xuc te sat higo tzwila. 'Ay wal te caw wach' sloxi, 'ay pax te caw tu', caw matz tac' slox te', xin chi 'a 'a.

⁴ Yuj cha, 'ix yaln Jehová 'ixtc 'ayin:

⁵ An Jehová in, e Diosal in ax israel ex tic, an tzwala: 'Icha wal jun tzo'n̈ sat higo caw wach' cha, 'ixta yaj eb' 'aj chon̈b' Judá 'a in sat, atn eb' xwa't 'icha presoal 'a Babilonia. Caw wach' 'oj wutc in b'a 'a eb'.

⁶ 'Oj in tan̈wcn̈ej eb', ax wi'n meltzjoc paxt eb' 'a jun nacion̈ tic. A 'a tic 'oj wac' q'ue'choc eb', man̈x 'oj in satl eb'. 'Icha wal to 'oj wawc can 'ejm eb', man̈x 'oj in toc' chan̈ eb' jun 'ejm xo.

⁷ 'Oj wac' wal snab'en eb', yic tzin yojcan 'el eb', chajtlto an ton Jehová in, ax eb', in chon̈b' yaj eb'; 'oj woch sDiosalc eb', yujto yet' wal smasnil sc'ojl eb', ax smeltzj paxt eb' 'ayin.

⁸ Ax pax Sedequías sreyl Judá, yet' eb' 'aych yajlil yet'oc, yet' pax smasnil eb' cajn 'a Jerusalén, atn eb' xcanto 'a jun nacion̈ tic, yet' pax eb' xc'och cajn 'a Egipto, a eb' cha, lajn wal yaj eb' 'a in sat 'icha te sat higo c'al xo, matz tac' sloxi.

⁹ Caw 'oj wa' cot junc niwquil yailal 'a yib'n̈ eb'. Caw 'oj xiw jun tzo'n̈ xo nacion̈ yuj eb'. 'Oj 'ijxoc wal 'ejm eb' si'mb'il. A eb' 'anma 'a jun tzo'n̈ nacion̈ 'aj 'oj wac' sactzic can 'at eb', caw 'oj b'uchxoc eb' yuj eb', 'oj b'ajxoc eb' yuj eb'. 'Oj jawc catb' 'a yib'n̈ eb' 'oj b'uchxoc cha.

¹⁰ 'Oj wa' cot owal, wejel, yet' yab'il 'a scal eb'. Man̈x 'a junc eb' 'oj can 'a sat lum lum 'ix wac' 'a eb', yet' 'a eb' smam yichm eb', xchi Dios.