Jeremías 23 - Chuj San Sebastian Bible

A tas tzca'ch yipc qui c'ojl*r* 'a yic b'aq'uin̈

¹ A Jehová tzaln 'ixtic: Ex yilmal in chon̈ab', caw lajn ex 'icha eb' 'ilm calnelu to tzmiln cham e no', tzsactzic can 'at pax e no yuj eb', xchi Dios.

² A Jehová qui Diosalec an̈ israel on̈c tic, a tzaln 'ixtc 'a eb' yilmal schon̈ab', atn eb' yajl yaj 'a yib'n̈ eb': Ax tic, 'ix eyac' sactzic can 'at eb' in chon̈ab', xe xib'tj can 'at eb', ma'ix eya'ilj eb'. Yuj cha, an Jehová in, an tzwala, caw 'oj wa'ch yailal 'a eyib'n̈ yuj tas maysch'olnil tze b'o cha.

³ Ax eb' in chon̈b' xwac' sactzic can 'at 'a jun tzo'n̈ xo nacion̈, an wal caw 'oj in molb'tzoc pax cot eb'. 'Oj wac' 'aj cajn eb' jun 'ejm xo 'a schon̈ab', ata 'oj wac' niwtjoc pax sb'isl eb'.

⁴ An Jehová in, an tzwala, to 'oj wa'ch yilmal eb', sec wach' man̈x 'oj xiw eb', man̈x 'a pax junc eb' 'oj satoc, xchi Dios.

⁵ Tzyaln pax Jehová 'ixtic: 'Oj jawc jun c'ual, ax wa'n 'och jun yin̈tl David reyl 'a in chon̈ab'. A jun cha, caw tojl snab'en. 'Oj sb'eyc'ojloc smasnil eb' chon̈b' 'a stojlal.

⁶ A 'a yol stiempoal yic 'oj ya'nc reyl cha, caw 'oj colchjoc can 'el eb' 'aj Judá, yet' pax eb' 'aj Israel, man̈x 'a tas 'oj sna eb'. Atn jun b'i tic 'oj 'ajxoc sb'ioc: A Jehová Tzon̈ B'onyajec 'A Stojlal, 'ixta 'oj sb'ioc, xchi.

⁷ Tzyaln pax Jehová: A ticnec, a yic tzlocn eb' 'anma in b'i, tzyal eb' 'ixtic: Yojc wal Jehová, atn jun x'i'n 'elt eb' israel 'a Egipto, xchi eb'.

⁸ Palta ax yic 'oj b'ey tiempo, 'ixtc 'oj yutc eb' yalni: Yojc wal Jehová, jun x'i'n 'elt eb' israel 'a stojlal norte yet' 'a jun tzo'n̈ xo chon̈b' 'aj sactzicnac yajcn 'at eb', 'oj xchic eb'. 'Ixta to b'i'an, ax yaj cajn eb' israel 'a slum jun 'ejm xo, xchi Dios.

Eb' tzyalch sb'a schecb'oc Dios

⁹ Yuj eb' tzcob' yalch sb'a schecb'oc Dios, tzwaln 'ixtic: Caw wal tzin sic'b' 'ejmi. Caw tz'ib'x smasnil in niwnal, 'icha junc 'u'm 'an̈, 'icha junc winc telwnac yuj te 'an̈ cha. Smul yujoc Jehová niwn yel'chi yet' yuj spaxti', 'ixta tzin 'aji.

¹⁰ A wal jun nacion̈ tic, caw b'ut'n yuj eb' tzb'on 'ajmulal, yuj eb' 'anma caw tz'a'n 'ip sb'on maysch'olnil. Tzc'anlb'ej eb' yip smasnil yic tzyixtn eb' yit 'anma'il. Yuj wal cha, 'ix scatb'an can Jehová lum lum tic. Yuj cha, 'ix tacj chan̈ lu'um, 'ix tacj pax 'el te c'ultc tzlo e no noc'.

¹¹ A Jehová tzaln 'ixtic: A wal eb' tzyalch sb'a in checb'oc, yet' eb' tz'a'n 'och sti eb' 'anma 'ayin, caw may wel'ch 'a sat eb'. An̈jtona 'a watut, tzwil wal sb'on eb' maysch'olnil ta'.

¹² Yuj cha, an Jehová in, an tzwala to caw q'uic'q'uinl 'oj 'aj sb'e eb', caw n̈elmtac 'oj 'ajoc. 'Oj tenxoc 'at eb', ax stelw eb'. A yic 'oj c'och stiempoal in b'eyc'ojlan eb', 'oj wa' cot yailal yel xo tu 'a yib'n̈ eb'.

¹³ 'Ix wil eb' tzyalch sb'a in checb'oc 'a Samaria, caw tu tas tzb'o eb'. 'Ix paxtin 'el eb' 'a sb'i Baal, 'ixta xyutj eb' ya'n satc in chon̈b' Israel.

¹⁴ 'Ix wiln pax eb' tzyalch sb'a in checb'oc 'a Jerusalén, tzb'o eb' 'anma tas caw tu'. Tzb'o eb' 'ajmulal, tzyixtn eb' yit 'anma'il, tz'iptzax eb' sb'on maysch'olnilal yuj eb'. Yuj wal cha, may junc eb' tzyij 'el sb'a 'a scal maysch'olnil. A wal 'a in sat, a jun tzo'n̈ 'anma tic, yet' eb' cajn 'a Jerusalén, caw lajn eb' 'icha eb' 'aj Sodoma yet' eb' 'aj Gomorra.

¹⁵ Yuj cha, an Jehová in, tztac' wuj smasnil, an tzwal jun tzo'n̈ paxti tic 'a eb' tzyalch sb'a in checb'oc: A wal tas c'a, a chi 'oj wac' sc'ux eb'. Ax a a 'ayb't veneno 'a scal, a 'oj wac' yuc' eb'. Yujto yujn̈ej eb' tzyalch sb'a in checb'oc 'a Jerusalén, yuj cha, 'ix pucb't maysch'olnilal 'a smasnil jun nacion̈ tic, xchi Dios.

¹⁶ A Jehová tztac' yuj smasnil, a 'ix aln 'ixtic: Ex israel, man̈ e cha eyab' tas tzyal eb' tzyalch sb'a in checb'oc cha, yujto a tas tzya'ch eb' yipc e c'ojol, caw man̈ yeloc. Mun tzpitz chan̈ eb', man̈oc in tzwac' yal eb'.

¹⁷ A eb' may yel'ch in paxti 'a sat, tzyal eb' 'ixtic: A Jehová tzalni to wach'n̈j 'oj eyaj 'el'chi, ma'oj jawc yailal 'a eyib'an̈, xchi cob' eb' 'a eb' tzyac' pitb'oc 'el snab'en, yic tzb'on eb' tas tznib'j sb'o 'a yol yico'.

¹⁸ Palta an Jehová in, an tzwala, to 'a eb' tzyalch sb'a in checb'oc cha, may jun 'ejmoc xit'c eb' 'a yamnil 'a 'aj tzin paxtin yet' eb' in checab'. May jun 'ejmoc 'ix yab' eb' in paxtini.

¹⁹ Caw maysch'olnil eb', yuj cha, 'oj wic' 'ejm eb' yet' yowl in c'ojol, lajn yowl in c'ojl chi 'icha junc niwquil yaxn̈ab' to caw 'aych yic'al, caw ji'lti sjawi.

²⁰ Ma'oj 'och wan yowl in c'ojl cha, masnto 'oj 'el'choc 'icha tas tzin nib'ej. At 'a slajb' c'ual, atta 'oj nachjoc 'el jun tzo'n̈ tic eyu'uj.

²¹ Man̈oc in xin checb't jun tzo'n̈ checb' cha, may pax jac tas xwal 'a eb'. Wach'xam caw ji'lti cob' yec' eb' yal-l 'a in b'i.

²² Comnoc wal xyojquej 'el eb' tas nab'il wu'uj, toto a in paxti 'ix yal-l eb' 'a eb' in chon̈ab', to 'ixta', tox 'ix yij 'el sb'a am eb' 'a scal smaysch'olnilal, 'ix yactj am eb' sb'on tas tu'.

²³ An Jehová in, an tzwala: Wach'xam 'a lac'an, mto 'a caw najat, an tic Dios in n̈ej 'a smasnil lugar.

²⁴ May xon junc lugar 'aj wach' e c'ub'n 'el e b'a 'a in sat. An tic, 'aynn̈ej 'ec' 'a satcha'an̈ yet' 'a sat lum tic.

²⁵ 'Ix wab' wal tas 'ix yal jun tzo'n̈ checb' 'a'm 'es cha. Caw tzte'wtzej sb'a eb' yalni, to in paxti tzyal-l eb', tolab' tzin paxtin 'a waychil 'a eb' yala'.

²⁶ ¿B'a'n̈ 'oj yactc jun tzo'n̈ tzyalch sb'a in checb'oc chi yaln 'el 'es paxti cha? atn jun tzo'n̈ paxti tzna chan̈ eb' 'a mun yol yico'.

²⁷ A jun tzo'n̈ eb' cha, tzna eb' tas tzin 'aj in 'atcn satc'ojlal yuj eb' in chon̈ab', yuj swaych eb' tzyal-laj 'a jun jun. 'Icha wal yutjnac sb'a eb' e mam eyicham, 'atnc in satc'ojlal yuj eb', cojxn̈ej Baal xyac' servil eb'.

²⁸ An Jehová in, an tzwala: Toto 'ay junc checb' chi 'ay tas tzwaychej, yal cab'i', to swayich. Toto a 'in paxti 'oj scha jun, to 'ixta', tz'acn cab' tzyutj yaln 'eli. Matz tac' scalx 'ixm sat trigo yet' stzapil. 'Ixta in paxti', caw man̈ smojc scalx yet' wayich.

²⁹ An Jehová in, an tzwala to a in paxti', lajn yet' c'ac', lajn pax yet' q'uen almáguina to tzpoj q'uen niwc q'uen yu'uj.

³⁰ Yuj cha, an Jehová in, an tzwala, to caw own 'a jun tzo'n̈ checb' ton̈j tzc'anb'laj yab' in paxti 'a jun tzo'n̈ yit checb'al, ax tzyutj yaln 'el eb', to in paxti tzyal-l eb'.

³¹ Caw own 'a jun tzo'n̈ checb' mun tzpitz chan̈ jun tzo'n̈ paxti tzyal-l 'a yol yico', ax tzyutj eb' yalni to an tzwal 'a eb'.

³² An tzwala, to caw own pax 'a jun tzo'n̈ eb' checb' tz'ac yal-l swayich. Yuj wal jun tzo'n̈ niwc 'es tzyac' eb' cha, yuj cha, tzsatcn 'at eb' in chon̈b' yuj eb'. Palta man̈oc in 'ix in checb't eb', may junc in checnb'il xwal 'a eb'. Yuj cha, may tas wach' yi'n eb' in chon̈b' 'a eb', xchi Dios.

A tas tz'aj yalx 'el spaxti Jehová

³³ 'Ix yaln Jehová 'ayn 'ixtic: Ach Jeremías, toto 'ay junc 'anma 'a jun chon̈b' tic, mto junc tzyalch sb'a in checb'oc, mto junc ya'mal 'och sti eb' 'ayin, tzc'anb'n 'aych 'ixtic: ¿Tas wal tzyal schecnb'il Jehová? toto xchi eb'. Ach xo tzal 'ixtc 'a 'a: Ach tic, lajn ach 'icha junc 'ictz 'a Jehová, yuj cha, 'oj ach ya'cn 'ejmi, xa chi 'a 'a.

³⁴ Toto a junc checab', mto junc ya'mal 'och sti eb' 'ayin, mto junc comn 'anma 'a jun chon̈b' tic, toto a junc eb' tic tzb'inan junc paxti 'ixtic: A jun paxti tic, schecnb'il Jehová, toto xchi, an 'oj wa'ch yailal 'a yib'an̈ yet' 'a eb' cajn 'a yol yatut.

³⁵ Toto 'ay junc mach tzc'anb'n 'a junc swach'c'ojol, mto 'a junc yican to sb'a yet'oc, tztac' yaln 'ixtic: ¿Tas 'ix yutj Jehová spactzani? mto ¿tas 'ix yutj Jehová yalni? xchi cab'i'.

³⁶ Palta man̈xtzac yal junc paxti 'ixtic: Schecnb'il Jehová jun tic, man̈ xchioc. Toto tzyal jun paxti cha, mun a jun spaxti chi 'oj meltzjoc 'och 'a 'a. Yujto 'ix yixtj 'el eb' 'anma tic 'a tas 'ix wala, an ton tic Dios in, pitzn in, an Jehová in, tztac' wuj smasnil, e Diosal in paxi.

³⁷ Ach Jeremías, tza c'anb'j 'ixtc 'a eb' tzyalch sb'a in checb'oc: ¿Tas 'ix yutj Jehová spactzani? mto ¿tas 'ix yutj Jehová yalni? xa chi 'a eb'.

³⁸ Toto tzyal eb' 'ixtic: Schecnb'il Jehová jun tic, toto xchi eb', tzach ta'w 'ixtc 'a eb': A wal Jehová tzaln 'ixtic: Yujto ax tic an̈ja e c'anlb'an jun paxti 'ix wal 'ayex, to man̈xtzac stac' eyalni.

³⁹ Yuj cha, 'oj wa'cn sat in c'ojl 'ayex, yet' 'a jun chon̈b' 'ix wac' 'ayex, yet' 'a eb' e mam eyicham. Caw najt 'aj 'oj 'at ex in julcn 'eli.

⁴⁰ Smasnil tiempo 'oj wa'cn 'och q'uixwc'ojlal 'ayex, ax wa'n cot pax yailal 'a eyib'an̈. Man̈x 'a b'a'n̈ 'oj 'at satc'ojlal eyu'uj, xchi Dios, xa chi 'a eb', xchi 'ayin.