Jeremías 20 - Chuj San Sebastian Bible

A tas alb'il 'a yib'n̈ win Pasur

¹ 'Ay jun winc Pasur sb'i, yunnal Imer, sat ya'mal 'och sti eb' 'anma yaj win 'a yatut Jehová. A yic xyab'n win tas 'ix wal an Jeremías in tic,

² in ya'n win ma'xoc, in ya'n win 'ajxoc 'och 'a yojl te sepo 'ay 'a sti spuertail yatut Jehová 'aych 'a yib'an̈, jun 'ay 'a stojlal yic Benjamín.

³ Ax 'a junx c'u, in ya'n win Pasur chi 'ijxoc 'elt 'a yojl te sepo cha, yuj cha, xwaln 'ixtc 'a winac: A Jehová xjeln a b'i, 'ix ya'cn a b'ic Magor-misabib, tzyal 'el'chi, 'Ayxn̈ej xiwc'ojlal 'a smasnil lugar.

⁴ Yujto xyal Jehová 'ixtic: 'Oj wa'ch wal xiwc'ojlal 'a eb'an̈, yet' 'a smasnil eb' 'a wach'c'ojol. Q'ueln ach wal 'ochi, ax yem eb' a wach'c'ojl chi yuj yespada eb' 'ajc'ojl yajch 'ayach. Ax 'aj Judá ex tic, 'oj ex wa'cn 'och 'a yol sc'ab' win sreyl Babilonia. A win 'oj eyi'n 'at 'a Babilonia cha, mto 'oj ex smiln winac.

⁵ Smasnil e ricoal 'a yol e chon̈ab', smasnil tas caw chan̈ stojl 'ay 'ayex, yet' pax smasnil sricoal eb' sreyl Judá, 'oj wac' 'a yol sc'ab' eb' 'ajc'ojl cha, ax yi'n 'at eb' 'a Babilonia.

⁶ Ach wal ach tic Pasur, 'oj ejx 'at 'icha presoal 'a Babilonia yet' smasnil eb' cajn et' 'a yol atut. Ata 'oj a chami, ata 'oj a mucx yet' smasnil eb' a wach'c'ojl cha, atn eb' 'aj xalcn 'el jun tzo'n̈ 'es paxti', xchi Dios, xin chi 'a winac.

A tas yaljnac Jeremías 'a Jehová

⁷ Mamin Jehová, caw ton̈j in 'a montej. 'Ix in yiclj tas 'ix ala. Yel xo wal caw 'ay ep, yuj cha, in 'ejm o'oj. Smasnil tiempo tzin tzetzxi, smasnil xoj 'anma tzin b'uchni.

⁸ A yic tzin paxtin 'a eb' 'a junjn 'ejem, tzwaln 'ixtc 'a eb': 'Oj jawc yailal 'a eyib'an̈, 'oj e lajw 'eli, xin chi 'a eb'. Yuj wal cha, 'ayn̈j 'och eb' yaln tu paxti 'ayin, tzin sb'uchn pax eb', yujn̈ej to tzwal-l a paxti'.

⁹ Toto tzwala, man̈x 'oj in b'inoc sb'i Dios, man̈x 'oj wal-l spaxti pax jun 'ejmoc xo, toto xin chi, ax am tz'aji, 'icha xo c'ac' 'ixta tz'aj a paxti 'ayin. Caw tz'a in b'acl yuj tzwab'i. Tzin nib'j tzin 'och wan waln 'el a paxti cha, palta matz tac' wu'uj.

¹⁰ Tzwab' sajsni eb' in sb'uchni, tzyaln eb' 'ixtic: Yaj win tzalni to 'ay xiwc'ojlal 'a smasnil lugar, xchi eb'. Tzyaln pax eb' 'ixtic: Coyec, qui pitzc chan̈ 'es 'a spatic, xchi eb'. An̈jtona eb' in wach'c'ojl cob'i', caw maclb'il yuj eb' 'aj tzin 'ejmi. Tzyaln eb' 'ixtic: Tecn 'oj ca'c ganar smontchj cujec. Toto 'ixta', 'oj ca'c ganar yejm cujec, ax ca'nec pax qui pacc 'a 'a, xchi eb'.

¹¹ Palta ach tic Mamin Jehová, 'aych 'ec'n̈ej wet'oc, 'icha junc soldado may tz'aj yejm xoni. A eb' tzin pechn b'eyc'oc, 'oj telwc eb', palta an xo, ma'oj wejm yuj eb'. Caw 'oj q'uixwc can 'el eb' 'a jun 'ejmn̈ej, ma'oj sat sc'ojl eb' 'a sq'uixwelal cha.

¹² Mamin Jehová, tztac' oj smasnil, ach tza b'eyc'ojlej eb' tojl sb'eyb'al, tzel tas tzna eb'. Ch'ox wal wila', tas 'oj otc a'n 'och syailal jun tzo'n̈ 'anma tic, yujto tox 'ix wa'cn 'ab'enal in b'a 'a yol a c'ab'.

¹³ B'itnejec Jehová, alc e wach' paxti 'a 'a. A tzcoln eb' tz'ab'n syal yuj eb' 'ixtm 'anma'.

¹⁴ Man̈ wach'c jun c'u 'aj in 'alji, matz alx cab' wach'l jun c'u 'aj in 'alj 'el 'a in nun cha.

¹⁵ Catb'tzaxc cab' jun winc 'ix aln 'a in mam chajtlto x'alj jun swinc 'unn in mam cha, yuj cha, stzalji.

¹⁶ Sat cab' 'el jun winc cha, 'icha jun tzo'n̈ chon̈b' satnc 'el yuj Jehová 'a jun 'ejmn̈ej. 'Ab'x cab' yel 'aw yuj yailal 'a yic sq'uin̈b'ial, yet' 'aw yic 'a'j owl 'a yic chimc'ual.

¹⁷ ¿Tas yuj ma'in ma'x cham yuj jun winc cha, yic mantzac in 'alji? Al to ma'ay in cancn 'a in nun, 'icha to a in nun chi x'ochcn in campusanoc.

¹⁸ ¿Tas wal yuj in 'alji? ¿Tom yuj wiln yailal yic tzin cham 'a q'uixwc'ojlal? xchi Jeremías.