Jeremías 18 - Chuj San Sebastian Bible

Cuynb'il 'a spatc jun tz'acum

¹ 'Ix yaln Jehová 'ixtc 'ayn an Jeremías in tic:

² 'Ixc 'ejm 'a yatut jun win tz'acum, ata 'oj wal jun tzo'n̈ in paxti 'ayach, xchi 'ayin.

³ Xlajw cha, in xit'c 'ejm 'a yatut win tz'acm cha, a yic in 'emchi, wan stz'acw win 'a yib'n̈ jun te 'icha ruweta.

⁴ A yic wan stz'acn win jun lum xalu, ax x'aji tu x'aj 'el'ch lu'um. Yuj cha, 'ix sb'on pax win junx xalu yet' lum slumal jun tu x'aj cha, 'ix sb'o 'icha wal tznib'ej.

⁵ Yuj cha, 'ix yaln Jehová 'ayn 'ixtic:

⁶ An Jehová in, an tzwal 'ixtc 'ayx ax israel ex tic, ¿tom matz tac' ex wutn 'icha tzyutj jun winc tic lum b'i'ch 'ayc' 'a yol sc'ab' tic? Ax tic, lajn eyaj 'a yol in c'ab' 'icha lum b'i'ch 'ayc' 'a yol sc'ab' win tz'acm cha.

⁷ Q'uinloc an tic, tzin nalb'ej in satn 'el junc nacion̈, mto tzin nalb'ej wi'n 'el junc mach 'a yopiso,

⁸ palta toto a junc nacion̈ cha, tzyij 'el sb'a 'a scal maysch'olnil, to 'ixta', man̈xtzac wa' cot jun yailal chi nab'ilx wuj 'a yib'an̈.

⁹ An̈jtona', q'uinloc tzin nalb'ej in b'on junc nacion̈, tzwa'n pax q'uib'oc,

¹⁰ palta toto a junc nacion̈ cha, cojn maysch'olnil tzb'o'o, matz yiclj pax tas tzwala, to 'ixta', man̈xtzac wac' yaxilal 'a 'a, 'icha tas nab'ilx wuj 'a yib'an̈.

¹¹ A ticnec, al 'a eb' 'aj Judá yet' 'a eb' cajn 'a Jerusalén, chajtlto an Jehová in, wan in nani tas 'oj ex wutc ax tic, yuj tas 'oj wutc wa'n 'och yailal 'a eyib'an̈. Yuj cha, 'actjec can e tu b'eyb'al, b'oc e b'eyb'al, xchi Dios, xa chi 'a eb'.

¹² Ax yaln eb' 'aych 'ixtic: Man̈ extc a tiempo on̈ a tenn 'och wan 'a jun tzo'n̈ cha. Yujto an̈ tic, tzqui nib'j tzon̈ b'eyn̈j 'ixtic, junjn on̈, 'oj qui b'o tas maysch'olnil 'icha tznib'j qui c'ojol, 'oj schic eb' 'ayach, xchi 'ayin.

¹³ Xlajw cha, 'ix yaln pax Jehová 'ixtic: C'anb'j 'ec' 'a scal jun tzo'n̈ nacion̈, toto 'ay 'aj tox 'ix 'ab'x jun tzo'n̈oc paxti 'icha jun tic. A eb' et israelal tic, 'ay wal jun tas yel xo tu 'ix sb'o eb'.

¹⁴ ¿Tom 'ay 'aj ton̈j tzsat chan̈ q'uen sacb'acm 'a sat q'uen niwc q'uen 'ay 'a lum Líbano? ¿Tom tztac' stup chan̈ a a caw sic tzcot 'a lum jolmctac witz?

¹⁵ Palta an tic, in 'atcn satc'ojlal yuj eb' in chon̈b' tic, ax 'a jun tzo'n̈ comn dios, ata tzyac' tz'a eb' incienso. 'Icha to 'ix sat eb' 'a jun b'e to 'ayc' xon 'a yic pecti', ax 'a jun tzo'n̈ c'ultac b'e tz'at eb'.

¹⁶ Yuj wal cha, ax yochcn jun e nacion̈ tic 'a cusltac lumal. 'Oj b'uchxoc 'a smasnil tiempo. Smasnil mach 'oj 'ec' 'a 'a, toxn̈ej 'oj syuc eb' sat yuj satjub'tacl yilx 'oj 'ajoc.

¹⁷ 'Icha wal sactzicnacl tzyutj 'ic' tzcot 'a 'aj tzq'uel c'u yutz'n 'at jun tzo'n̈oc tas, 'ixta 'oj wutc wa'n 'at eb' israel tic 'elc 'a yojltac eb' 'ajc'ojl yajch 'a eb'. A yic 'oj c'och sc'ul sjaw syailal eb', man̈x 'oj woch q'ueln 'a eb', xchi Dios.

A tas xnax 'a spatquil Jeremías

¹⁸ 'Ix yaln eb' chon̈b' chi 'ixtic: Qui na'ec tas 'oj cutquec jun Jeremías tic. 'Ay xon eb' ya'mal 'och qui ti 'a Dios 'oj qui cuynec, 'ay xon eb' 'a'm nab'en 'oj 'a'nc qui nab'enec, 'ay xon eb' schecb' Dios 'oj alnc spaxti Dios 'ayn̈ec. Yuj cha, qui pitzc chan̈ 'es paxti 'a spatic, sec tzmilx chamoc, man̈ qui yiclquec xon tas tzyal cha, xchi eb'.

A slesl Jeremías

¹⁹ Xwaln 'ixtc 'a in lesal: Mamin Jehová, 'ochn̈ wal q'ueln 'ayin, 'ab' wal tas tzyal eb' 'ajc'ojl yach 'ayn tic.

²⁰ ¿Tom a yet' maysch'olnil tzpactzax wach'c'ojlal? A eb' cha, tox 'ix sna eb' tas 'oj yutc eb' in smiln chamoc. Na coti, chajtlto in 'och lin̈n 'a ojltac, yic in tew 'aych yuj eb', sec matz cot yowl a c'ojl 'a yib'n̈ eb'.

²¹ A ticnec, cham cab' yunnal eb' yuj wejel, cham cab' eb' yuj owal. Cancn cab' yistzil eb' 'a man̈x 'a yichmil, man̈x 'a cab' yune eb'. Cham cab' yichmil eb' 'ix yuj yab'il, ax yune eb' to quelmtac, cham cab' eb' 'a scal owal.

²² 'A' cot jun b'ulc eb' soldado 'elc'm 'a scal eb'. 'Ab'x cab' yel yaw eb' yuj yailal. Yujto sjoy eb' jun tzo'n̈ olan, sec tzin yamchj yuj eb', xyac' 'ejm eb' ch'an̈ yal 'a wojltac.

²³ Palta ach xo tic Mamin Jehová, ojtac tas wan smol aln eb' 'a wib'an̈ yic tzin smiln cham eb' snani. Man̈ ac' niwnc'ojlal 'a yib'n̈ eb', man̈ ac' sat a c'ojl 'a smaysch'olnilal eb'. Sat cab' 'el eb' 'a ojltac, tza'n 'och syailal eb' yet' yowl a c'ojol, xin chi 'a in lesal.