Jeremías 16 - Chuj San Sebastian Bible

Schecnb'il Jehová 'a Jeremías

¹ 'Ix paxtin Jehová 'ayin, 'ix yaln 'ixtic:

² Man̈ ach nupnoc, may cab' junc onnal 'oj 'elcn 'a jun nacion̈ tic.

³ An Jehová in tic, an 'oj wal 'ayach, tas 'oj jawc 'a yib'n̈ eb' 'unn 'oj 'aljoc 'a jun nacion̈ tic, yet' 'a yib'n̈ eb' mamb'il, yet' pax 'a eb' nunb'il.

⁴ 'Oj cham eb' yuj tzann̈j yab'ilal, may mach 'oj 'oc' yuj eb', man̈x 'a mach 'oj mucnc eb'. T'ocquixtac 'oj 'ajcn sniwnal eb' 'a sat lum 'icha tzyac' stza no noc'. A owal yet' wejel, a 'oj milnc eb'. 'Oj chixc sniwnal eb' yuj no 'usej, yet' yuj no calte'al noc', xchi 'ayin.

⁵ 'Ix yaln pax Jehová 'ayn 'ixtic: Man̈ ach 'och 'a yol junc n̈a 'a 'aj wan stan̈w 'ac'wl jun tzo'n̈oc 'anma yuj junc chamnc 'anma'. Man̈ ach 'oc'oc', man̈ a ch'oxl pax a cusc'ojlal yu'uj, yujto an Jehová in, an tzwala, to 'ix wij 'el in junc'ojlal yet' in chamc'ojlal 'a jun chon̈b' tic, man̈xtzac 'o'ch in c'ojl pax 'a 'a.

⁶ 'Oj cham eb' 'ichmtac 'anma', yet' eb' cotc 'unn 'a jun nacion̈ tic. May mach 'oj mucn eb', may mach 'oj 'oc' yuj eb'. May mach 'oj 'a'nc lajwc sniwnal, mto sjoxn 'el xil sjolm yuj sch'oxn scusc'ojlal yuj eb'.

⁷ Man̈x 'a mach 'oj b'onc tas tzc'uxx yuj junc chaml cha, man̈x 'a mach 'oj 'a'nc sniwnal sc'ojl eb' yican jun tzcham cha, wach'xam to a win mamb'il mto a 'ix nunb'il tzchami.

⁸ An̈jtona', man̈ ach 'och 'a yol junc n̈a 'a 'aj 'aych junc q'uin̈, yic tzach 'em wocn a wa'i, mto tzo'n tas tzoq'uej.

⁹ Yujto an Jehová in, tztac' wuj smasnil, e Diosal in, an tzwala: An 'oj wac' lajwc jun tzo'n̈ b'it yic tzaljc'ojlal tz'och 'a yic q'uin̈al, yet' jun tzo'n̈ b'it yic nupnel. A jun tic, 'oj ujc 'a yol e tiempoal tic, caw ax 'oj eyila'.

¹⁰ A yic 'oj alnc jun tzo'n̈ paxti tic 'a eb' et chon̈ab', 'oj sc'anb'c eb' 'aych 'ixtic: ¿Tas yuj 'oj ya' cot Jehová jun niwquil yailal chi 'a quib'an̈? ¿Tas wal tu xqui b'o'o? ¿Tas qui mul x'och 'a Jehová qui Diosalec? 'oj schic eb'.

¹¹ Tzach ta'w 'a eb' 'ixtic: A Jehová, a tzaln jun tic: A eb' e mam eyicham, in yactj can eb', ax 'a spatc jun tzo'n̈ comn dios 'ix 'och tza'n eb', xya'n eb' 'emmquilal 'a jun tzo'n̈ cha. In yactj can eb', ma'ix syiclj eb' jun tzo'n̈ cuynb'il 'ix wac' 'a 'a.

¹² Ax xo pax ax tic, yel xo wal maysch'olnil xeyutj e b'a 'a yib'n̈ eb' e mam eyichm cha. Junjn ex, tzlaj e b'o tas tu tzjaw 'a e nab'en, man̈xtzac eyiclj tas tzwala.

¹³ Yuj wal cha, 'oj ex wi'l 'a sat jun lum tic, ax ex wa'n can 'at 'a junx nacion̈ to man̈ eyojcoc, man̈ yojcoc pax eb' e mam eyicham. A wal ta', sc'ual, yac'wlil 'oj eyac' servil jun tzo'n̈ comn dios, caw man̈x 'oj 'o'ch in c'ojl 'ayex, xchi Dios, xa chi 'a eb'.

¹⁴ Palta an Jehová in, an tzwala: A ticnec, a yic tzlocn eb' 'anma in b'i, tzyal eb' 'ixtic: Wal 'a sb'i Jehová 'ix 'i'n 'elt eb' israel 'a Egipto, xchi eb'.

¹⁵ Palta 'ay jun tiempoal man̈x 'oj yal eb' 'ixta'. 'Ixtc 'oj yutc eb' yalni: Wal 'a sb'i Jehová 'ix 'i'n 'elt eb' israel 'a stojlal norte yet' 'a jun tzo'n̈ xo chon̈b' 'aj sactzicnac yajcn 'at eb' yu'uj, 'oj schic eb'. Yujto an 'oj wi'x meltzjoc eb' israel tic 'a 'aj 'aycn schon̈ab', atn lum lum wa'jnac can 'a eb' e mam eyicham.

¹⁶ Palta a yic mantzac uj jun cha, 'oj wi' cot eb' 'ajc'ojl 'a eb' israel yic tzwul yamchjoc 'at eb' yuj eb'. 'Icha tzyutj eb' yamn chay syamn no chay yet' schim, mto 'icha tzyac' eb' ma'm noc' tz'ec' 'a lum tzalctac, tz'ec' saync eb' no 'a yoltc n̈aq'ue'en, yet' 'a sjatlil eb' q'uen q'ue'en, 'ixta 'oj wutc eb'.

¹⁷ Yujto tzwil smasnil tas tz'el sb'on eb'. May junc mach tztac' sc'ub'n 'el sb'a 'a in sat, matz tac' xon sc'ub'n 'el smul 'a in sat.

¹⁸ 'Oj wac' spac 'a eb' yuj smaysch'olnilal, yujto 'ix yixtj 'el eb' in lum tic yet' jun tzo'n̈ scomn diosal to chamnac, caw yajb'entac 'icha sniwnal chamnc 'anma'. A wal tas to matz chaj in c'ojol, a chi sb'o eb', xchi Dios.

Slesl Jeremías 'a Jehová

¹⁹ Xwaln 'ixtc 'a Dios: Mamin Jehová, caw ach 'aych 'och wipoc, in tan̈mal 'aji. Ach tzin a colo, yic 'ayn 'och 'a in yailal. 'Oj jawc jun tzo'n̈ nacion̈ cajn 'a 'aj tzlajw c'och sti lum lum tic, ax wul yaln eb' 'aych 'ixtic: Cojn jun tzo'n̈ comn dios may jac yopiso, may jac tztac' yu'uj, a chi schajnac eb' qui mam quichm smacloc.

²⁰ ¿Tom tztac' sb'on eb' 'anma sdiosal? Toto a eb' b'ojnac, wal yel, man̈ diosoc tzyal cha, 'oj schic eb' 'ayach, xin chi 'a Dios.

A spac ya'jnac Jehová

²¹ 'Ix yaln Jehová 'ixtic: Yuj cha, jun 'ejmn̈ej 'oj wac' yojcoc 'el eb' in poder. 'Ixta 'oj 'aj snachj 'el yuj eb', to an ton Jehová in, xchi Dios.