Jeremías 13 - Chuj San Sebastian Bible

Yab'xil jun jal-l c'anac

¹ 'Ix yal Jehová 'ayn 'ixtic: 'Ixic, 'at man junc a jal-l nab'a lino, tzlajw cha, tza jaln 'och 'a a nan̈al yic mantzac ju'x'eli, xchi.

² Xlajw cha, xin mann jun jal-l chi 'icha xyutj Jehová yaln 'ayin, 'ix in jaln 'och 'a in nan̈al.

³ 'Ix yaln pax Jehová 'ayn jun 'ejm xo 'ixtic:

⁴ 'Ij 'at jun a jal-l xa man cha, atn jun 'aych 'a a nan̈l cha, 'ixc 'a Perat. Ata tza c'ub'j can 'el 'a sjatlil junc q'uen niwquil q'ue'en, xchi.

⁵ Xlajw cha, in 'at 'a Perat cha, xin c'ub'n can 'el jun jal-l cha, 'icha xyutj Jehová yaln 'ayin.

⁶ Caw niwn xo tiempo 'ix 'eq'ui, 'ix yaln pax Jehová 'ixtc 'ayin: 'Ixc 'a Perat, tze'n pax cot jun jal-l wa'jnac a c'ub'c can 'el ta', xchi.

⁷ Xlajw cha, in 'atx 'a Perat cha, xin sayn wil jun jal-l chi 'aj c'ub'b'il can 'el wu'uj, 'ix wi'n 'elta, palta tox 'ix c'a'i, man̈x 'a jac yopiso.

⁸ Xlajw cha, 'ix yaln pax Jehová 'ixtc 'ayn jun 'ejm xo:

⁹ 'Ixtc wal 'oj wutc in satn 'el sb'inab'ilal eb' 'aj Judá yet' eb' 'aj Jerusalén.

¹⁰ A jun tzo'n̈ et chon̈b' yel xo wal maysch'olnil tic, caw matz nib'j eb' tzyiclj in checnb'il, cojn tas tzchaj sc'ojl eb', an̈j chi tzb'o eb'. 'Ix 'och tza'n eb' yuj jun tzo'n̈ comn dios yic tzya'n servil eb', yet' yuj ya'n eb' 'emmquilal 'a 'a. An Jehová in, an tzwala to lajn wal eb' yet' jun jal-l man̈x 'a jac yopiso tic.

¹¹ 'Icha wal junc mach tzjaln 'och junc jal-l 'a snan̈al, 'ixta wal xwutj eb' chon̈b' israel, yet' pax eb' 'aj Judá. Caw junn̈j yaj eb' wet'oc, in chon̈b' yaj eb', yic tzyaln 'el eb' chajtlto caw niwn wel'chi, palta ma'ix syiclj eb' tas xwala.

Yab'xil jun tzo'n̈ yet'l yal uva

¹² Al pax 'a eb' et chon̈b' 'ixtic: A Jehová qui Diosalec an̈ israel on̈c tic, a tzaln 'ixtic: Smasnil jun tzo'n̈ yet'l yal uva, 'ajx cab' b'ut'joc, xchi, xa chi 'a eb'. Ax yaln eb' 'aych 'ixtic: Toxn to cojc xoni, to a jun tzo'n̈ yet'l yal uva, toxn to 'oj 'ajxoc b'ut'joc xon eb', 'oj schic eb'.

¹³ 'Oj lajwc cha, ax aln 'a eb' to an Jehová in, an 'ix wal 'ixtic: Smasnil eb' cajn 'a jun nacion̈ tic, caw 'oj wac' sat sc'ojl eb' yuj yowl in c'ojol, eb' yin̈tl David 'aych reyal, eb' ya'mal 'och sti eb' 'ayin, eb' tzyalch sb'a in checb'oc, yet' smasnil eb' cajn 'a Jerusalén. 'Icha tz'aj sat sc'ojl eb' caw niwn 'an̈ tzyuq'uej, 'ixta 'oj wutc wa'n sat sc'ojl eb'.

¹⁴ 'Oj in mac' poj eb' 'icha tzyutj sma'n poj sb'a jun tzo'n̈ yet'l yal uva 'a yic 'ay junc mach tztenn 'och sb'a 'a 'a. Eb' mamb'il yet' eb' 'unnab'il, lajn xoj 'oj wutc eb'. An Jehová in, an tzwala, to a wal yic 'oj in satnc 'el eb', caw man̈x 'oj 'o'ch in c'ojl 'a eb', man̈x 'oj in cus yuj eb', xchi Dios, xa chi, xchi 'ayin.

Tennb'ilal 'a chon̈b' Israel

¹⁵ Ex wit israelal, caw man̈ eyi' chan̈ e b'a. Macljec wal eyab' tas 'ix yal Jehová.

¹⁶ A tze na'a, to 'oj jawc sacq'uinal, palta to 'oj wach' q'uic'b'oc si'mb'il yu'uj. Yuj cha, meltzjan̈c 'a Jehová qui Diosalec, tzeyaln q'uet e mul, ya' sb'a mantzac ex telw 'a lum tzalctac yuj q'uic'q'uinl 'oj ya' coti.

¹⁷ Toto ax tic matz e chaj eyab' tas tzwala, 'oj woc' eyuj 'a c'ultaquil, yujto tzeyij chan̈ e b'a. Caw 'oj 'eltoc yal in sat eyu'uj, yujto 'oj eyijx 'at 'icha presoal, xin chi 'a eb'.

A spaxti Dios 'a win rey

¹⁸ 'Ix yaln Jehová 'ixtc 'ayin: Al 'a win rey yet' 'a 'ix snun winac, to an tzwal 'ixtic: 'Emn̈ect 'a e despacho. Tzlajw cha, ax 'a sat lum tzex 'em wocan, yujto a jun e corona man̈x jantcoc swach'l yilxi, caw 'oj 'ijxoc 'el 'a e jolom.

¹⁹ A jun tzo'n̈ chon̈b' 'a Neguev, tox 'ix 'och oyn eb' 'ajc'ojl 'a eb', man̈x 'a mach 'oj stac' sjacn 'och sb'a ta'. Smasnil eb' 'aj Judá, 'oj 'ijxc 'at eb' 'icha presoal.

²⁰ 'Ixquec q'ueln 'a stojlal norte, 'iltec wal scot eb' 'ajc'ojl ta'. ¿'Ajtil 'ay eb' in chon̈b' wa'jnac 'och 'a yol a c'ab' yic tza tan̈wni eb'? Atn eb' 'aych a b'inab'iloc, xchi Dios, xa chi 'a eb', xchi 'ayin.

Alb'il 'a eb' israel*r* to 'oj 'ijxoc 'at eb' 'icha presoal

²¹ 'Ix yaln Jehová 'ixtic: ¿Tas 'oj eyal ticnec ex 'aj Jerusalén, yic 'oj 'och jun tzo'n̈ 'anma yac' yajlil 'a eyib'an̈, atn jun tzo'n̈ eb' xe sayq'ui, yic tz'och eb' e wach'c'ojloc? 'Oj ya'ch wal eb' yailal 'a eyib'n̈ si'mb'il, 'icha yab'n junc 'ix 'ix syail yic tz'alj yune'.

²² Toto tze c'anb'ej tas yuj tzjaw jun tic 'a eyib'an̈, nachj cab' 'el eyu'uj, to yuj niwquil e mul, yuj cha, jitn ex 'eli tzex 'eq'ui, caw tzex 'ixtxi.

²³ A junc q'uic' 'anma', matz tac' sjelmtan sb'a, yic tzjelmj yilx 'ochi. An̈jtona junc no leopardo, matz tac' sjeln 'el no stz'ib'quintaquil. 'Ixta pax ex ax tic, c'aync ex e b'on tu'al, man̈xtzac stac' e b'on wach'il.

²⁴ Yuj cha, an Jehová in, an tzwala, to 'oj ex wac' sactzicc can 'ati, 'icha tz'aj yutz'x 'at solcal 'ixm trigo yuj 'ic'.

²⁵ Atn wal chi 'aych xon 'a eyib'n̈ ex 'aj Israel, a chi smoj wa'n 'ayex. Yujto in 'atcn satc'ojlal eyu'uj, ax jun tzo'n̈ yechl to may jac yel'chi, axn̈ej eb' xeya'ch yipc e c'ojol.

²⁶ An̈jtona pax an tic, 'oj wi'l e pichul, caw 'oj wac' e q'uixwloc.

²⁷ 'Ix wila, jantc wal eyajmulal, atn wal jun tzo'n̈ 'ajmulal caw q'uixweltac xlaj e b'o'. Caw yajb'entac tas xlaj e b'o 'a lum tzalctac, yet' 'a calc te'. 'Oltacx wal ex 'aj Jerusalén. ¿Jantcto wal tiempo 'ayx 'ec' 'a scal e maysch'olnilal? xchi Dios.