Jeremías 11 - Chuj San Sebastian Bible

'Ix satx 'el strato Dios

¹ 'Ix paxtin Jehová 'ayn an Jeremías in tic, 'ix yaln 'ixtic:

² 'Ab' wal tas tzyal in trato, tzlajw cha, tzaln pax 'a smasnil eb' 'aj Judá yet' pax 'a smasnil eb' cajn 'a Jerusalén.

³ Tzal 'a eb' to an Jehová sDiosal in eb', an tzwala to catb'tzab'il eb' matz yiclni tas tzyal jun in trato tic.

⁴ Atn jun in trato in b'ojnac yet' eb' e mam eyicham, yic 'ix wi'n 'elt eb' 'a Egipto. A jun nacion̈ cha, lajn yaj 'a eb' 'icha junc jorna 'aj tzn̈usx 'elt q'uen hierro. 'Ix waln 'a eb' 'ixtic: Yicljec 'ayin, b'oc smasnil tas tzwal 'ayex. To 'ixta', 'oj eyoch in chon̈b'oc, an xo, 'oj woch e Diosaloc, xin chi 'a eb'.

⁵ Toto ax tic, 'oj eyiclc tas tzwal 'ayex, to 'ixta', 'oj wac' 'el'choc in ti wa'jnac 'a eb' e mam eyicham, yic tzwa'n jun e lu'um, atn lum caw 'ay syaxil sat 'aj 'ayx 'ec' ticnec, xchi Jehová, xa chi 'a eb', xchi 'ayin. Yuj cha, in ta'w 'ixtc 'a 'a: B'o cab' 'ixta Mamin Jehová, xin chi.

⁶ Xlajw cha, xyaln pax Jehová 'ixtc 'ayin: Al jun tzo'n̈ paxti tic 'a eb' 'anma 'ay 'a yol yic Judá, yet' 'a yoltc scayeal Jerusalén. Al 'a eb' 'ixtic: Macljec eyab' tas tzyal jun trato tic, tzlajw cha, tze b'eylb'ani, xa chi 'a eb'.

⁷ A yic xwi'n 'elt eb' e mam eyichm 'a Egipto, caw xcham wal waln 'a eb' to tzchaj eb' yab' tas tzwala. 'A yictax jun tiempoal cha, masnto ticnec, an̈j 'ijnoc waln jun cha.

⁸ Palta ma'ix schaj eb' yab'i', ma'ix syiclj eb'. A yic eb', to 'ix yac' eb' pitb'oc 'el snab'en. 'Ix ya'n 'at sb'a eb' 'a scal maysch'olnil. Man̈x 'ic yal sc'ojl eb' syiclj tas waljnac 'a 'a. Yuj cha, 'ix wa'n cot yailal 'a yib'n̈ eb', 'icha wal yaln can 'a jun trato cha, xchi Dios 'ayin.

⁹ 'Ix yaln pax Jehová 'ayn 'ixtic: Ach Jeremías, a eb' et chon̈b' 'aj Judá yet' eb' cajn 'a Jerusalén, 'ix smol alj eb' yic tzyi'n 'el sb'a eb' 'a yol in c'ab'.

¹⁰ 'Ix 'atcn eb' 'a maysch'olnil sb'ojnac eb' e mam eyicham. Atn eb' chi ma'ix yiclni tas 'ix wala, ax 'a jun tzo'n̈ comn dios 'aj 'ix ya'ch eb' snab'en, ata xyal sb'a eb'. A eb' 'aj Israel, ma'ix syiclj eb' in trato wa'jnac can yet' eb' e mam eyicham, an̈jtona eb' 'aj Judá, 'ixta 'ix yutj sb'a eb' jun xo.

¹¹ Yuj cha, an Jehová in, an tzwala, to 'oj wa' cot yailal 'a yib'n̈ eb', man̈x 'oj stac' s'at eb' 'elc 'a 'a. Wach'xam 'oj 'el yaw eb', ax sc'ann eb' in colwal, palta man̈x 'oj in ta'w 'a eb'.

¹² 'Ixta to b'i'an, a eb' et chon̈b' 'aj Judá, yet' eb' cajn 'a Jerusalén, 'oj 'at eb' sc'an cob' scolwal sdiosal, atn jun tzo'n̈ 'aj tzyac' tz'a eb' incienso, palta ma'oj stac' scolx 'el eb' yuj jun tzo'n̈ chi 'a scal syailal 'oj jawc cha.

¹³ A wal eb' 'aj Judá cha, caw niwn sdiosal eb'. Lajn wal sb'isl 'icha sb'isl jun tzo'n̈ schon̈b' eb'. An̈jtona pax eb' 'aj Jerusalén, caw niwn jun tzo'n̈ yet'l xajmb'al eb' sb'o cha'an̈, 'icha xo sb'isl scayeal yol chon̈ab', 'ixta x'aj sb'isl 'aj tzyac' tz'a eb' incienso 'a Baal, atn jun comn dios yajb'entac.

¹⁴ Yuj cha, ach Jeremías, man̈ ach leslwoc yuj jun chon̈b' tic, man̈ ach tewoc 'ayn yuj eb', yujto ma'oj in ta'wc 'ayach. Wach'xam 'oj sc'an eb' in colwal 'a scal syailal, wal yel, ma'oj in ta'w 'a eb', xchi.

¹⁵ 'Ix yaln pax Jehová 'a eb' wit chon̈b' chi 'ixtic: Ex in chon̈b' chamc'ojlb'il wu'uj, caw may eyaln eyic e jaw 'a in cajnub', yujto til wal tas yajb'entac tze b'o'o. A jun tzo'n̈ xajmb'al tzeyac' 'ayin, ma'oj stac' ex scoln 'el 'a jun yailal 'oj jawc 'a eyib'an̈, 'in tzex tzalj e b'on maysch'olnil.

¹⁶ Yujto a 'a yic yaln̈taxi, lajn ex 'icha junc te snun olivo caw yax xi'il, caw b'ut'jnac 'el yet' sat. Palta ax ticnec, 'oj ex wac' lajwc 'ejm 'icha tz'aj slajw 'ejm junc te te tzlo'chj 'el sc'ab' yuj junc niwquil yaxn̈ab' 'aych yic'al, mto tz'a te yuj raya.

¹⁷ An Jehová in, tztac' wuj smasnil, an in pitzjnac chon̈b' Israel, yet' chon̈b' Judá. Palta tox 'ix wala to 'oj jawc yailal 'a yib'n̈ eb', yuj jun tzo'n̈ maysch'olnil tzb'o eb'. 'Ix stzuntzj cot eb' wowal, yujto xyac' eb' tz'a incienso 'a Baal, xchi Dios.

Snib'j eb' 'aj Anatot smil Jeremías

¹⁸ A Jehová, a 'ix 'a'n nachjoc 'el wu'uj, chajtlto 'ay eb' 'ajc'ojl wan snani, tas tzyutj eb' sb'on tu 'a in patic. A xjacn in nab'en, sec tznachj 'el wu'uj.

¹⁹ Caw wal tzaljc'ojlal waji, 'icha junc no calnelu tz'ijx 'at 'a 'aj tzmilx chamoc, caw man̈ wojcoc tas tu wan snan eb' 'a in patic. Tzyaln eb' 'ixtic: Qui milc chamoc, sec wach' man̈x 'a mach tznan coti, 'icha wal tz'aj stzu'x 'el junc te te', sec man̈xtzac satni, xchi eb'.

²⁰ Yuj cha, xwaln 'a Dios 'ixtic: Ach tic Mamin Jehová, tztac' oj smasnil, Juez ach 'a stojlal. Caw ojc smasnil tas 'ay 'a qui nab'en an̈ 'anman̈ tic on̈. 'Ac' wal wil tas 'oj otc a'n 'och syailal jun tzo'n̈ 'anma tic, yujto tox 'ix wac' 'ab'enal 'a yol a c'ab' yuj tas tzna eb' 'a in patquil, xin chi.

²¹ A eb' 'anma 'aj chon̈b' Anatot, sna eb' tas tzin yutj eb' in smilni. 'Ix yaln eb' to tzin smil cham eb', toto an̈ja waln 'el spaxti Jehová.

²² A Jehová, tztac' yuj smasnil, 'ix yal 'ixtc yuj eb': A yic 'oj in b'onc yaj eb', a eb' quelmtac, 'oj cham eb' 'a owal, ax eb' winc 'unin, yet' eb' 'ix 'unin, 'oj cham eb' yuj wejel.

²³ Man̈x 'a junc eb' 'aj Anatot chi 'oj canoc, yujto 'oj jawc sc'ul in b'eyc'ojlan eb' yuj tas tzb'o'o, caw 'oj jawc yailal 'a yib'n̈ eb', xchi Dios.