Jeremías 10 - Chuj San Sebastian Bible

Jun tzo'n̈ yechl comn dios*r* yet' 'emmquilal 'a Dios pitzan

¹ 'Ix waln an Jeremías in tic 'ixtic: E masnil ex wit israelal, macljec eyab' spaxti Jehová.

² A tzaln 'ayx 'ixtic: Man̈ e b'eylb'oc sb'eyb'al jun tzo'n̈ xo nacion̈, man̈ ex xiw 'a jun tzo'n̈ tas tzch'ox sb'a 'a satcha'an̈, 'icha tzyutj sb'a jun tzo'n̈ nacion̈ cha.

³ A sb'eyb'al jun tzo'n̈ nacion̈ cha, caw may jac yel'chi. A 'a calcte tz'at stzuc' cot eb' junc te yib' te', ax junc win josmte tzjosn yet' syamc'ab'.

⁴ Tzlajw cha, tzya'n 'och plata yet' oro yelwnub'loc. Tzma'n 'och slawxil yet' martillo, sec tzsan̈b'i, sec matz 'el c'otljoc.

⁵ A jun tzo'n̈ yechl cha, lajn eb' 'icha xib'tnub'al ch'ic 'a scal junc 'awb'en. Matz tac' spaxtini, yowlal to tzcuchx b'eyc'oc, yujto matz tac' sb'eyi. Man̈ ex xiw 'a jun tzo'n̈ cha, yujto matz tac' sb'on tas tu', matz tac' pax sb'on tas wach', xchi Dios.

⁶ Mamin Jehová, may xon wal junc mach lajn et'oc; yujto ach tic, cojxn ach niwn el'chi, caw b'inab'il a b'i, tzta'n̈j oj smasnil.

⁷ Ach sReyl smasnil nacion̈, ¿tom 'ay junc mach man̈ smojc tzxiw 'ayach? Smoj wal to 'ay el'ch 'a smasnil sat 'anma'. A 'a scal smasnil eb' jelan, yet' 'a scal eb' rey 'a yolyib'n̈q'uinl tic, caw may junc mach lajn et'oc.

⁸ Smasnil jun tzo'n̈ 'anma', may xon jac snab'en eb', may jac sjelnal eb'. A jac te te cha, caw matz tac' on̈ scuyn te 'on̈.

⁹ A jun tzo'n̈ yechl cha, nab'a plata, ata 'ic'b'il cot 'a Tarsis, ax q'uen oro, ata 'ijxnac cot q'uen 'a Ufaz. A jun tzo'n̈ cha, b'ob'il eb' yuj eb' tenm q'ue'en, ax te q'uic'mucnac nip yet' te chac yilxi, a te 'aych spichloc, smasnil jun tzo'n̈ cha, b'ob'il eb' yuj eb' 'anma jeln snab'en sb'on jun tzo'n̈ tas.

¹⁰ A Jehová, atn jun Dios pitzan, caw Rey 'a jun 'ejmn̈ej. A yic tzcot yowal, caw tz'ib'x lum lum tic yu'uj. Man̈xtzac stac' ste'wtzan sb'a jun tzo'n̈ nacion̈ 'a yowl sc'ojl cha.

¹¹ (Ex wit israelal, alc 'a eb' chuc chon̈b'al 'ixtic: A jun tzo'n̈ comn dios, man̈oc eb' xb'on satcha'an̈ yet' lum lum tic, yuj cha, yowlal 'oj satcn 'el eb' 'a yolyib'n̈q'uinl tic. Man̈x 'a junc 'oj canoc, xe chi 'a eb'.)

B'it yic alj wach' paxti 'a Dios

¹² A Jehová, a 'ix b'on lum lum tic yet' spoder. A yet' sjelnal, 'ix sb'on can yolyib'n̈q'uinl tic. An̈jtona yet' sjelnal cha, 'ix sb'on satcha'an̈.

¹³ A yic tzchecwji, caw tz'ib'x smasnil a a 'ay 'a satcha'an̈. A 'aj tzlajw c'och sti lum lum tic, caw tzq'ue wan 'asn yuj 'a cha'an̈. Caw tz'ec' raya 'a scal niwc yaxn̈ab' yu'uj, tzjacn pax 'elt 'ic' 'a 'aj molb'il yu'uj.

¹⁴ Smasnil eb' 'anma tzya'ch jun tzo'n̈ yechl yipc sc'ojol, caw may snab'en eb', may tas yojc eb'. A eb' tenm q'uen cha, caw tzq'uixw 'el eb' yuj jun tzo'n̈ yechl tzb'o cha. A jun tzo'n̈ tzb'o eb' cha, may jac yel'chi, may spixan.

¹⁵ A jun tzo'n̈ cha, may jac yopiso, smoj wal ton̈j tzb'uchx eb'. A yic 'oj jawc yailal 'a yib'n̈ eb' yuj Jehová, 'oj satl eb'.

¹⁶ Caw wal chuc yel qui Diosalec an̈ yin̈tl on̈c Jacob tic. A qui Diosalec b'ojnac smasnil tas. A si'jnac can 'el chon̈b' Israel tic yico'oc. A Jehová tztac' yuj smasnil, 'ixtnta wal yalx sb'i.

A yailal jawc 'a yib'n̈ Judá

¹⁷ Ex 'aj chon̈b' Jerusalén, caw oyb'ilx xo, molb'tzejc smasnil tas 'ay 'ayex.

¹⁸ Yujto tzyal Jehová 'ixtic: A 'a yic jun tiempoal tic, a wal ax cajn ex 'a jun nacion̈ tic, 'oj ex wac' sactzicoc, 'oj e 'at 'a najat. 'Oj wac' syam sb'a yailal 'a eyib'an̈, sec tzeyab' syal si'mb'il, xchi.

¹⁹ 'Ix waln an Jeremías in tic 'ixtic: ¡'Oltacn wali! Wan in lajw 'ejmi, man̈xtzac 'an̈tx tas lajwnac 'ayin. 'Ix in nani, to wic yaj jun yailal tic, yuj cha, 'oj wac' techjoc.

²⁰ Tox 'ix lan̈chj 'ejm in mantiado, tox 'ix n̈i'chj smasnil sch'an̈il. Tox in yactj can eb' wunnal, man̈x 'a eb' 'ayc' wet'oc. Man̈x 'a mach tzb'on in mantiado jun 'ejm xo, man̈x 'a pax junc mach tzlich'n q'ue yen̈l wib'an̈.

²¹ A eb' 'aych yilmalc jun chon̈b' tic, caw may snab'en eb'. Matz c'an eb' sjelnal 'a Jehová, yuj cha, 'ix lajw 'ejm eb'. 'Ix sactzic can 'at eb' 'anma smasnil.

²² Macljec eyab' wal jun 'ab'x tzjawi. A jun chon̈b' 'ay 'a stojlal norte, caw tzn̈il-li sc'an̈ scoti. A jun chi 'oj jelmtanc 'och chon̈b' Judá 'a cusltac lumal, cojxn̈ej no 'ocs 'oj 'aj cajn ta'.

²³ Mamin Jehová, wojc wal si'mb'il, to an̈ 'anman̈ tic on̈, man̈oc 'a yol qui c'ab' 'aych yuj tas tzon̈ 'aj 'el'ch on̈. May wal jac copiso 'a yib'n̈ tas 'oj jawc 'a cojltac on̈.

²⁴ 'A'n̈ cuenta 'a 'icha wal yaj 'a tojlal, comnoc man̈oc yet' yowl 'a c'ojol, toq'ue tzon̈ a satl on̈.

²⁵ Sec 'emt yowl a c'ojl 'a yib'n̈ jun tzo'n̈ chuc chon̈b'al cha, atn 'a yib'n̈ jun tzo'n̈ chon̈b' to matz ach 'ojcan 'eli. Atn jun tzo'n̈ chon̈b' to matz yal sb'a 'ayach, yujto caw 'ix satx 'el jun qui chon̈b' an̈ yin̈tl on̈ Jacob tic yuj eb' on̈. Jun 'ejmn̈ej on̈ satx 'el yuj eb', caw 'ix lan̈chj 'ejm qui nacion̈ 'a jun 'ejmn̈ej on̈, xin chi.