Is 7 - Chuj San Sebastian Bible

Sb'ab'l paxti Isaías 'a rey Acaz

¹ A yic 'aych win Acaz reyl 'a Judá, win yunnal Jotam, yixchicn Uzías, ata x'och jun owl 'a Jerusalén yuj win Rezín sreyl Siria, yet' yuj win Peka, yunnal Remalías, sreyl chon̈b' Israel. Snib'j ewin to xyac' 'ejm chon̈b' Jerusalén, palta ma'ix stac' yuj ewinac.

² A 'a jun tiempoal cha, yajnej xit' alxc 'ixtc 'a win rey Acaz yet' 'a eb' 'aych yopiso yet'oc: A eb' 'aj Siria yet' eb' Israel, junn̈j tzyutj sb'a eb' yic tzya'n eb' owl yet' Judá tic, xchi. Yuj cha, 'ix syamn 'och win rey yet' eb' yajl chi yib'x cha'an̈, 'ixta pax eb' 'anma chi smasnil, toxn̈ej tzchinchni eb' 'a yet'l chi 'icha tzyac' te te tz'ib'x yuj 'ic'.

³ Palta xyaln Jehová 'ixtc 'a win Isaías: 'Ij 'at win onnal Sear-jasub et'oc, tz'at a chanc win rey Acaz 'a 'aj tz'elt can sc'ab' a niwn a tz'ec' 'a yib'n̈ sti b'e, 'a 'aj tzju'x pichul,

⁴ ata tzal 'a win 'ixtic: Tzel wal a b'a, man̈ ach 'och 'il, man̈ a comn xib'tc a b'a yuj win Rezín yet' eb' 'aj Siria, yet' pax win yunnal Remalías, yujto caw wal tzowx 'och eb' 'ayach. A eb' cha, lajn eb' 'icha chab'oc cuxc'ac' ton̈j tztab'lani.

⁵ A eb' 'aj Siria cha, yet' eb' yin̈tl Efraín, yet' pax win yunnal Remalías, caw tu tas wan snan eb' 'a eb'an̈. Tzyal eb' 'ixtic:

⁶ Coyc 'at qui macc 'ec' chon̈b' Judá, qui xib'tquec eb' 'anma cha. Tzlajw cha, tzqui pojnec 'ec' jun chon̈b' chi 'ayn̈ec, ax win yunnal Tabeel, a win tzca'c can 'och reyl ta', xchi cob' eb'.

⁷ Yuj cha, 'ix yaln Cajlil Jehová 'ixtic: May xon wal b'a'n̈ 'oj 'el'choc jun snab'en e win cha.

^8-9 Yujto a chon̈b' Damasco, a sat yaj yuj eb' 'aj Siria, ax win Rezín a win rey 'a Damasco cha; a Samaria, a sat yaj 'a schon̈b' eb' yic Efraín, ax win yunnal Remalías, a win rey yaj 'a Samaria cha. Palta yic wal 65 ab'il, ax slajw 'ejm schon̈b' eb' yic Efraín, man̈x nacion̈oc ta'. 'Ixta pax 'oj eyaji, toto ma'oj in eya'ch yipc e c'ojol, ma'oj e te'nb'i 'a yol e chon̈ab', xchi Dios, xchi Isaías.

Yab'xil jun 'unn tzcuch Emanuel

¹⁰ Xya'n pax Jehová yalx Isaías 'ixtc 'a win Acaz cha:

¹¹ C'an el junc senya 'a Jehová qui Diosal. Tztac' sch'oxn el junc milagro 'a xab'l yich lum lum tic, mto pax 'a snajtil yib'n̈ satcha'an̈, xchi Isaías chi 'a winac.

¹² Xta'w Acaz 'ix yalni: Ma'ay, an tic ma'oj stac' wa'lni prowal Jehová yic tzin c'ann wil junc senya chi 'a 'a, xchi winac.

¹³ Yuj cha, xyaln Isaías chi 'ixtic: Ex yin̈tl can David 'ab'c tas 'oj wala'. Caw may yel'ch e tzuntzn eb' eyit 'anma'il ¿Tom tze nib'j tze tzuntzj qui Diosalec 'icha tzeyutj eb' cha?

¹⁴ Yuj cha, caw a Dios 'oj ch'oxnc eyil junc senya cha: 'Ay jun cob's 'ix, 'oj pitzwc chan̈ jun 'unn 'a 'ix. 'Oj 'aljoc jun swinc 'unin, ax ya'n sb'ic Emanuel.

¹⁵ A yic 'ayx snab'en jun 'unn cha, 'oj wa yet' queso, ax yu'n yal chab' yet' eb' yit chon̈b' cha, yujto 'ayc' eb' 'a yol sc'ab' meb'a'il.

¹⁶ A 'a yic mantzac 'och snab'en jun 'unn cha, a chawn̈ rey yet' chab' chon̈b' 'aj wan a xiw tic, 'oj can eb' 'a sictaquil.

¹⁷ Palta 'ay wal jun yailal 'oj ya' cot Jehová 'a eb'n̈ yet' eb' a chon̈b' tic, yet' 'a scal eb' yin̈tl David; a jun cha, mant 'a 'aj tzuj xon jun 'ejmoc yictax yi'n 'el sb'a eb' yic Efraín 'a Judá. (Tzyal 'el'chi, atn yailal 'oj ya'ch win sreyl Asiria.)

¹⁸ A 'a jun tiempoal cha, 'oj ya' cot Jehová eb' soldado cajn 'a stitc a niwn a 'a Egipto, ax sjaw somnjoc eb' 'icha tzyac' no 'us. 'Oj yawtn cot eb' soldado 'aj Asiria, ax sjaw somnjoc eb' 'icha no sno'l chab'.

¹⁹ 'Oj can eb' 'a lum ch'olctac, 'a yol n̈aq'ue'en, 'a eb' lum waymtac, 'a cal q'ui'ix, yet' 'a 'aj tzlaj xit'c no wacx yuc' a'.

²⁰ A 'a jun tiempoal cha, 'icha junc joxlab' xil jolom, 'ixta 'oj yutc Dios smajnan win sreyl eb' 'aj Asiria 'a sc'axpil 'ec' sti a niwn a Éufrates. 'Oj wul yi'cc win smasnil tas 'ay 'a eb' israel, 'icha to 'oj sjoxl win xil sjolm eb', xil sti eb', yet' xil sniwnal eb'.

²¹ A 'a jun tiempoal cha, a mach 'oj cajn junc snun swacax mto chawn̈oc snun scalnelu,

²² caw wal 'oj yac' sobra slech no', ax laj sb'on sc'ux queso. A smasnil eb' 'oj colchjoc 'a scal owal, 'oj wa eb' yet' queso cha, ax yu'n eb' yal chab'.

²³ A junc lum 'aj 'awb'il junc mil 'ib'n̈ uva, jun mil tumn plata stojl 'a yic pecti', ax 'oj 'ajoc, a 'a jun tiempoal cha, 'oj satl jun 'awb'ente cha, 'oj q'uib'x chan̈ sc'ultcal, nab'a q'uix 'oj 'ajx cani.

²⁴ Cojxn eb' ma'm noc' 'oj 'ec' ta yet' sjul-lab', yujto 'oj 'ochx can jun chon̈b' chi waymtaquil.

²⁵ Ax eb' lum tzaln tz'awx 'a yic yalan̈, tzt'ocx lum yet' 'asaron, ax 'oj 'ajoc, 'oj q'uib'x chan̈ sc'ultcal sat lu'um. Nab'a q'uix 'oj 'ajoc, man̈x 'a mach 'oj stac' yawn lu'um. 'Oj 'ochcn lum swalab'oc wacax, swalab'oc calnelu.