Is 63 - Chuj San Sebastian Bible

Tzyac' Jehová spac 'a eb' 'ajc'ojol

¹ An Isaías in tic, xin c'anb'n 'ixtic: —¿Mach jun chi tzcot 'a niwquil chon̈b' Bosra, 'a yol smacb'en Edom, chac spichl 'aychi, caw wal 'ay xo smay yilxi? Caw wal niwc winc sjawi, tzjaw yet' smasnil yip, xin chi. Xta'w jun chi 'ixtic: —An tic Jehová in, 'ay waln wic in b'eyc'ojlwi, tztac' pax ex in coln 'el yet' in poder, xchi.

² —¿Tas laj yuj chac yilx a pichl cha, 'icha to ach te'w 'el yal uva tzwila? xin chi 'a 'a.

³ —Yel tzala, to 'ay nan̈l te uva chi xin te'l yalil, in ch'ocj tzin b'o jun munljel cha, may xon junc nacion̈ xcolwj jac wet'oc. A eb' 'ajc'ojl yajch 'ayin, a eb' chi xin tec' 'ejm 'a sat lu'um, yujto 'ay yowl in c'ojl 'a yib'n̈ eb'. 'Ix laj tz'itj 'och schic'l eb' chi 'a in pichl tic, yuj cha, 'ix b'on̈x 'el smasnil.

⁴ Yujto xjaw 'a in nab'en, to tzin pac in b'a 'a eb' 'ajc'ojl yajch 'ayin, tzin coln can pax 'el eb' in chon̈ab'.

⁵ In cob' 'ec' q'uel-loc, may xon mach 'ix colwj jac wet'oc; yuj cha, caw 'ix sat in c'ojl wiln jun tic, yujto may xon mach x'och wet'oc. Yuj wal yowl in c'ojol, x'och wip, atn yuj cha, sta'n in coln in chon̈ab'.

⁶ Yet' wal yowl in c'ojol, xin te'n can 'ejm smasnil nacion̈, xin satl eb' yet' yowl in c'ojol, xwa'n b'ey schic'l eb' 'anma 'a sat lu'um, xchi Dios.

A swach'c'ojlal Dios 'a eb' israel

⁷ An tic tzin nib'j wal-l schamc'ojlal Jehová, tzin b'itnan smasnil tas sb'o cujec. Caw wal niwn swach'c'ojlal 'ayn̈ an̈ yin̈tl on̈ec can Israel tic. Til wal tas sb'o cujec, 'ix 'o'ch sc'ojol, caw niwn pax schamc'ojlal 'ayn̈ec.

⁸ Yuj cha, xyaln 'ixtic: A jun tzo'n̈ 'anma tic, in chon̈b' eb', wunnal eb', man̈x 'oj in yixtc paxti eb', xchi. Yuj cha, xcolx 'el eb' yuj Jehová.

⁹ Locn xyab' syal yet' eb', caw a xcoln 'el eb'. Yuj schamc'ojlal yet' swach'l snab'en, yuj cha, scoln 'el eb', 'ix squetzn chan̈ eb'. Niwn tiempo 'ix 'ijx b'ey eb' yu'uj.

¹⁰ Palta yel xo wal pit xyutj sb'a eb' 'a Jehová, caw xyac' eb' cus Yespíritu to Cojxni. Yuj cha, x'och 'ajc'ojlal 'a eb', xya'n owl yet' eb'.

¹¹ Yuj cha, snan cot eb' schon̈b' Dios chi tas ujnc 'a pecti', 'a yol stiempoal Moisés win schecb' Jehová. 'Ix laj yal-lanc eb' 'a 'ixtic: ¿'Ajtil 'ay jun Dios xcoln 'el eb' quit chon̈b' 'a yol a mar yet' eb' yilmal eb' yaji? ¿'Ajtil 'ay jun Dios to caw a Yespíritu xya'ch 'a scal eb'?

¹² Atn Jehová 'aych yipc Moisés yic xb'ey 'a yol b'e, jun x'a'n spoj sb'a a mar 'a yojltac eb' schon̈ab', sec tzb'inax 'a smasnil tiempo yuj eb'.

¹³ A x'i'n 'ec' eb' chon̈b' 'a yojl a mar, ma'ix n̈elmj xon eb' jac 'a yojl a'. Wach' 'ix b'ey eb' 'a yojl a', 'icha tzyac' no chej 'a lum ya'lical lum cusltac lu'um, xchi eb'.

¹⁴ A Jehová a x'i'n b'ey eb' schon̈b' chi yet' Yespíritu, yic tzya'n 'iljoc eb', 'icha tzyac' no wacx tz'ijx 'ejm wac 'a junc lum niwn pan̈an. 'Ixta 'ix yutej sec tzb'inax sb'i 'a swach'il.

Lesl 'a Dios yic tzc'anx scolwal

¹⁵ Mamin Jehová, 'ilt on̈ cot 'a jun et'l to ecn̈ej yaji, atn satchan̈ 'aj cajn ach 'eq'ui, jun 'ajtil 'aych 'ec' yet' a niwn chamc'ojlal yet' pax 'a poder. ¿'Ajtil 'ay a wach'c'ojlal chi jun? ¿Tom xlajw c'och a chamc'ojlal chi 'ayn̈ on̈?

¹⁶ Ach tic to qui Mam aji. Wach'xam a Abraham yet' win Israel man̈x on̈ yojcoc eb', palta ach tic to qui Mam ach; toxn to qui colmal xon aji.

¹⁷ Mamin Jehová, ¿tas yuj tzon̈ ejcan 'el 'a yol a b'e, tza'n pitb'oc 'el qui nab'en yic man̈x 'a qui xiwc'ojlal 'ayach? Ax ticnec jun, ch'oxx wal a chamc'ojlal chi 'ayn̈ an̈ a checb' on̈ tic, atn an̈ yin̈tl on̈ can eb' a chon̈b' to ecn̈ej yaji.

¹⁸ An̈ a chon̈b' on̈ tic on̈, jayen̈ej ab'il xquique'ej a cajnub', ax ticnec, a eb' 'ajc'ojl yajch 'ayn̈ on̈, a eb' xma'n 'ejm lan̈chjoc.

¹⁹ 'Icha xo wal to man̈oc ach tzac' yajlil 'a quib'n̈ on̈, 'icha wal to may 'aj xb'inaxi toto ec on̈ on̈.