Is 62 - Chuj San Sebastian Bible

'Oj 'ajxoc junx 'ac' b'i 'a Jerusalén

¹ Yuj wal in chamc'ojlal 'a Sión, yuj cha, man̈toc sictac tzin 'aji. Yuj in chamc'ojlal 'ayx ex 'aj Jerusalén, yuj cha, ma'oj wilji, masnto 'oj checljoc chan̈ e tojlal, 'icha wal yic tzsacb'i. Ax e colnb'il, 'oj checljoc chan̈ 'icha wal sn̈ilchj junc tziclab' taj, caw tzyac' sacq'uinlal.

² 'Oj yil smasnil nacion̈ jun e wach'l cha, 'oj yil smasnil eb' rey tas 'oj 'aj yijx chan̈ e b'i. Yujto a junx 'ac' b'i 'oj 'ajxoc 'och 'ayex. A Jehová, caw a 'oj 'a'nc jun b'i cha.

³ Ax tic lajn ex 'icha junc corona caw wach' yilxi, 'ixta eyaj 'a yol sc'ab' Jehová qui Diosal.

⁴ Yuj cha, man̈x 'oj alxoc 'ayex to 'Actb'ilx Cani, man̈x 'oj alxc pax 'a e lu'um to Satnc Ex 'Eli, palta to 'oj 'ajxoc e b'ioc, to Nib'b'ilx Yuj Dios, ax yalx 'a e lu'um, to 'Ayx Yajal. Yujto ax tic, nib'b'ilx yuj Jehová, a Yajl yaj 'a yib'n̈ e lu'um.

⁵ Yujto 'icha junc win quelm tznupn yet' junc 'ix cob'es, 'ixta 'oj ex yutc Dios, 'oj 'och eyajloc, ax ya'n tzaljoc sc'ojl eyet'oc, 'icha stzalj junc win quelm yet' yistzil, 'ixta 'oj eyaji.

⁶ Ex 'aj Jerusalén, xwa'cn 'och e tan̈mal 'a yib'n̈ smuroal e chon̈ab', sec sc'ual yac'wlil stew eb' eyu'uj. Ax tzex tew 'a Jehová cha, man̈ 'och cab' wan eyaln e b'a 'a 'a.

⁷ May cab' 'iljelal eyu'uj masnto tzb'ox chan̈ chon̈b' Jerusalén jun 'ejm xo, ax smasnil 'anma 'a yolyib'n̈q'uinl tic, 'oj yal eb' wach' paxti yu'uj.

⁸ Yuj cha, yet' wal spoder Jehová xya'n can sti 'ixtic: Man̈x 'a wal b'a'n̈ 'oj wac' swa eb' 'ajc'ojl e trigo, ax wa'n yuc' eb' chuc chon̈b'al eyal uva tzeyij 'a e munljel.

⁹ Palta to caw ax 'oj e mol chan̈ sat eyawb'en, ax laj e c'uxni. 'Oj eyal e wach' paxti 'ayn yu'uj. 'Oj e mol chan̈ sat eyuva, ax eyu'n te yalil chi 'a yamq'uil sti in cajnub', xchi Dios.

¹⁰ Ex 'aj Jerusalén, 'eln̈ect 'a sti spuertail e chon̈ab', tze b'on sb'e eb' eyit chon̈b' 'aj 'oj jawc paxi. Caw wach' tzeyutj eya'n pan̈nb'oc lum ch'olctac. Tze si'n 'el eb' q'uen q'uen 'a yol b'e cha, caw mesmni tzeyutej. Tzlajw cha, tzeya'n q'ue e bandera yil jun tzo'n̈ xo nacion̈.

¹¹ A Jehová, 'oj yac' alxoc 'ixtc 'a eb' 'anma 'ay 'a 'aj tzlajw c'och yolyib'n̈q'uinl tic: Alc 'ixtc 'a eb' 'aj Jerusalén: 'Iltec to wan sjaw jun e Colmal, yet' spac xyij yuj smunljel, 'oj xchic eb' 'a eb', xchi Dios.

¹² A eb' israel, 'oj alxoc yuj eb', to Schon̈b' Dios eb', atn smasnil eb' tzcolx 'el yuj Jehová; ax yaln eb' 'anma yuj chon̈b' Jerusalén, To Caw Nib'b'il Jun Chon̈b' cha. Man̈x 'Actb'ilc Cani, 'ixta 'oj sb'ic yuj eb' 'anma cha.