Is 6 - Chuj San Sebastian Bible

'Awtb'il Isaías yuj Dios

¹ A 'a jun ab'il 'aj chamnc win rey Uzías, ata sch'ox sb'a Cajlil 'ayin. Wocn 'ejm 'a sdespacho 'a caw cha'an̈, ax yol yatut b'ut'jnac 'el yuj sti spichul.

² A 'a yib'an̈, ata 'ayc' jun tzo'n̈ ángel serafín sb'i, 'icha c'ac' yilx eb'. Waque sc'axl junjn eb'; chab' tzmacn sat eb', chab' pax tzmacn sniwnal eb' 'a yojltac, ax yet' chab'x chi tzjen̈w eb'.

³ Xlaj yal-lanc eb' 'a junjn 'ixtic: A Jehová tzta'n̈j yuj smasnil, Dios caw Cojxni, checl stzictznil 'a smasnil yolyib'n̈q'uinal, xchi eb'.

⁴ A yic x'och jun 'aw cha, 'ix 'ib'x can spuertail yatut Dios, 'ix b'ut'j yojl chi yuj tab'.

⁵ Yuj cha, xwaln 'ixtic: 'Oltacn wali, tecn 'oj in chami, yujto xwilch jun Rey yet' in sat, atn Jehová tzta'n̈j yuj smasnil. An xo tic, nab'a 'anma 'in, tu tas tzlaj 'elt 'a in ti', cajn in 'ec' pax 'a scal eb' 'anma tu spaxtin tic, xin chi.

⁶ Ax xwilni xcot jen̈n̈oc jun serafín chi 'a scal eb' yitb'eym cha, yet' jun tenaza, ax jun tenaza chi xyac' n̈a'noc chan̈ jun stzac'ac' 'a yib'n̈ yet'l xajmb'al,

⁷ 'ix squiln 'och 'a in ti', xyaln 'ayn 'ixtic: A jun stzac'ac' xin quilch 'a a ti tic, a x'i'n can 'el a mul, 'ix 'ajx can lajwc smasnil a tu'al, xchi 'ayin.

⁸ Xlajw cha, xwab'n yaln Cajlil 'ixtic: ¿Mach wal junc 'oj in chec ticnec? ¿mach wal junc tz'och qui checb'oc? xchi. Yuj cha, in ta'w 'a 'a: Waj Mamin, tztac' in a checni, xin chi.

⁹ 'Ix yaln 'ayin: 'Ixic, 'at al 'a jun tzo'n̈ eb' 'anma chi 'ixtic: Tzcob' eyab' tas tzalxi, palta matz nachj 'el eyu'uj, tzcob' eyila', palta matz eyojquej 'eli tas jun cha, xa chi 'a eb'.

¹⁰ 'Ac' somchjoc 'el snab'en jun tzo'n̈ eb' 'anma tic, 'icha to tza mac schicn eb' yet' sat eb', sec wach' matz yil eb'. Matz tac' yab'n eb', matz nachj 'el pax yuj eb', sec matz jaw eb' 'ayin, matz colchj eb' wu'uj, xchi Dios.

¹¹ Yuj cha, xin c'anb'n 'a 'a: ¿Jantc to wal tiempo 'oj wal-l jun tzo'n̈ tic Mamin? xin chi. 'Ix ta'w 'ayn 'ixtic: Masnto 'oj lajwc can 'ejm jun tzo'n̈ chon̈b' tic, yic man̈x 'a mach cajn 'ec' 'a 'a; yic man̈x 'a junc 'anma tzcan 'a yol yatut, yic 'oj can lum lum tic 'a sictaquil.

¹² An Jehová in, an 'oj wa'cn 'at eb' 'anma chi 'icha presoal 'a junc xo chon̈ab', ax scan snacion̈ eb' 'a sictaquil.

¹³ Toto 'ayt jaywn̈ocx eb' 'oj can 'a yol schon̈b' cha, ax scha ma'x pax 'ejm schon̈b' eb' chi jun 'ejm xo. Palta 'icha tzyac' te jiy mto te ma'ach', 'a yic tzch'acx 'el te', cojxn te yib' tzcani, 'ixta 'oj 'aj eb'. (Palta a te yib' cha, tzwoln pax te'. 'Icha te yib'te cha, 'ixta eb' in chon̈ab', 'oj in si'cn 'el jaywn̈ocx eb' wico'), xchi Dios.