Is 52 - Chuj San Sebastian Bible

Scoljnac Dios Jerusalén 'a syailal

¹ Ex 'aj Sión mto Jerusalén, pitzc 'el 'a e sat, te'wtzejc e b'a, 'a'c eyip, yujto schon̈b' ex Dios. Ch'oxc 'el e jelnal 'ac'b'il 'ayx yu'uj, sec man̈x 'a b'a'n̈ 'oj 'oxtoc eb' chuc chon̈b'al 'a e cal, yic tzex yi'n can 'ejm eb'.

² Q'uen̈ec pax wan ex 'aj Jerusalén, ma'c 'el pocc 'ayex, to 'oj eyemx wocn 'a e despacho eya'n yajlil. Ex 'aj Sión 'icha to 'ayx 'och can presoal, 'ijec 'el e b'a 'a yaln̈ jun 'icha yugo 'ay q'ue 'a yib' e jaj cha.

³ A Jehová a tzaln 'ixtic: May xon junc centavo tumn xin chaj 'a e patic, yic ex 'ijx can 'at mosoal; an̈jtona', may pax tumn 'oj wac'a', yic tzex in coln can pax 'eli.

⁴ A eb' in chon̈b' 'a pecti cha, 'e'lb'a 'anma yaj eb' 'a Egipto. Ax 'a spatquilx cha, 'ix 'ixtx eb' yuj eb' 'aj Asiria, 'a nab'an̈ej.

⁵ Ax ticnec ¿tas 'oj wutc in b'a an Jehová in tic? 'In ton̈j xcomn 'ijx 'at eb' in chon̈b' tic 'a Babilonia 'a nab'an̈ej. Ax eb' tzyac' yajlil 'a yib'n̈ eb', caw wal tzb'an̈ sb'a eb', toxn matz 'och wan eb' in sb'uchni.

⁶ Yuj cha, 'oj c'och sc'ual, ax in yojcan pax 'el eb' in chon̈b' tic, 'oj nachjoc 'el yuj eb' to an paxtinnacn 'a eb', 'aynn̈ej pax 'ec' yet' eb', xchi Dios.

⁷ Til wal sja'l yilxi yic tzjaw junc win alm 'ab'x 'a eb' lum tzalctac, junc 'et'jnac wach' 'ab'ix, atn yab'xil junc'ojlal, tzyaln 'el yab'xil colnb'il yic tz'el eb' 'anma 'a libre, tzyaln 'ixtc 'a yib'n̈ eb' 'aj Sión: A 'e Diosal x'och reyal, xchi.

⁸ 'Ab'ec, a eb' stan̈mal chon̈ab', caw wal checl yel yaw eb'. Junlajn yel yaw eb' smasnil yuj tzaljc'ojlal, yujto caw wal tzyil eb' tas tz'aj smeltzj paxt Jehová 'a lum tzaln Sión.

⁹ Ex 'aj Jerusalén to lan̈chjnac can 'ejm e chon̈ab', 'el cab' eyaw e b'itn yuj tzaljc'ojlal, yujto a Jehová 'ix 'o'ch sc'ojl 'a schon̈b' tic, yuj cha, ex colx 'elt yu'uj.

¹⁰ A Jehová, tox 'ix sch'ox spoder yil smasnil nacion̈. 'Oj yojcoc 'el smasnil 'anma 'a yolyib'n̈q'uinl tic, chajtlto a Dios on̈ colnec 'eli.

¹¹ 'Eln̈ecta, 'eln̈ect 'a yol schon̈b' eb' 'aj Babilonia, man̈ eyam tas man̈ wach'c 'ay 'a jun chon̈b' cha. A mach tz'i'nb'ey jun tzo'n̈ yamc'ab' yic Jehová, man̈x eya't e b'a 'a scal maysch'olnil.

¹² Palta man̈toc ji'lti 'oj eyelt muc'uc, may cab' mach to 'oj sna to 'oj 'at 'eloc, yujto a Jehová qui Diosalec an̈ israel on̈c tic, a 'oj b'ab'ljoc 'ayex, ax yoch tza'n eyu'uj yic tzex stan̈wni.

Syailal jun schecb' Dios

¹³ Yuj cha, xyaln Jehová 'ixtic: A jun in checb' tic, 'oj sta'n̈j yu'uj, yel xo wal niwn yel'ch 'oj 'ajoc, 'oj b'inaxc 'a scal 'anma', ax yijx chan̈ sb'i.

¹⁴ Til wal mach 'oj sat sc'ojl yiln 'ochi, 'oj jelmjoc yilx sat, man̈x lajnoc yilx 'icha yilx 'anma', 'oj juwc yilx yuj tas 'oj 'aj cha.

¹⁵ Til wal eb' nacion̈ 'oj sat sc'ojl yiln 'ochi. 'Ixta pax eb' rey, ton̈j 'oj 'och q'ueln eb' 'a 'a. May tas 'oj yal eb' yu'uj yic 'oj yilnc eb', yujto a tas mant 'aj tzyab' eb' yab'xil, 'oj nachjoc 'el yuj eb', xchi Dios.