Is 51 - Chuj San Sebastian Bible

C'anj niwnc'ojlal*r* 'a yib'n̈ Jerusalén

¹ A Jehová a 'ix aln eyuj 'ixtic: Ex tze nib'j b'ey e b'a 'a stojlal, ex to tze nib'j jawc e b'a 'ayin, macljec eyab' tas 'oj wala'. Tzcham wal e maclni eyila' 'aj cotnc eyin̈til, 'aj pax 'ay yin̈tl e mam eyicham.

² 'Iltec nab'n e mam 'ichm Abraham yet' e nun chichm Sara. May yunnal eb', sch'ocj eb' schawn̈il yic xwawtn eb'. Palta xwac' in yaxilal 'a yib'n̈ eb', til wal x'aj sniwtj yin̈tl eb'.

³ 'Ixta 'oj wutc wa'n in wach'c'ojlal an Jehová in 'a yib'n̈ eb' 'aj Sión, atn jun chon̈b' mac'b'il 'ejm lan̈chjoc. A eb' lum tacn̈ lu'um, 'oj 'och eb' lum yaxlumal, 'icha lum 'aj 'ay te 'awb'ente 'a Edén. Cojxn tzaljc'ojlal, b'it yet' alj yuj diosal 'ay 'ayn ta'.

⁴ Ex in chon̈ab', macljec eyab' tas 'oj wala': To a 'in cuynb'il 'oj wac' sb'eylb'oc jun tzo'n̈ xo chon̈ab', 'icha wal sacq'uinl 'oj 'aj 'a scal eb'.

⁵ A ticnec, la'nxo yaj in b'eyc'ojlal, la'nxo pax yaj to 'oj in colwji, 'oj in b'eyc'ojloc jun tzo'n̈ chon̈b' tic yet' in poder. Ax eb' 'anma 'a lum chon̈b' 'ay 'a sti 'a mar, 'oj ya'ch eb' yipc sc'ojl in poder.

⁶ Q'uen̈ec q'ueln 'a satcha'an̈, tzex 'emx q'ueln 'a sat lum tic: A satcha'an̈, 'oj sat 'ejm 'icha tzyac' te tab'. Ax lum lum tic, 'oj 'ichmaxc lum 'icha tzyac' junc pichul. 'Ichan̈ej tz'aj scham no 'us, 'ixta 'oj 'aj scham eb' 'anma cajn 'a sat lu'um. Palta ax colnb'il tzwac'a, 'ayc'n̈ej 'a jun 'ejmn̈ej, a 'in tojlal may slajub'.

⁷ A mach 'ojtnac tojlal, ex to tzeya'ch in checnb'il 'a e nab'en, 'ab'tec tas 'oj wala': Man̈ ex xiw yuj sb'uchwal paxti eb' 'anma', man̈ eyac' chab'c'ojlal yuj tas ya tzyal eb' 'ayex.

⁸ Yujto 'oj lajwc 'ejm eb' 'icha junc pichl 'aych yijal, mto 'icha junc lana pichl tzc'ux lajwc no 'ij cha. Palta a 'in tojlal yet' in colwal, 'ayc'n̈ej 'a smasnil tiempo, xchi Dios.

⁹ Mamin Jehová, colwjan̈ yet' a poder, q'uen̈ wan yet' yipl a c'ab', 'icha otjnac 'a yictax pecti'. Ach a ch'iychtejnac no Rahab, atn no dragón sb'i 'a yojl a mar.

¹⁰ 'Ix a'n tup a mar yet' eb' a niwc a caw xab' yich, ax xab'l yich a mar cha, 'ix a'ch b'eal, sec a eb' colb'il 'el o'oj, wach' 'ix 'ec' eb' 'a yojl a'.

¹¹ 'Ixta pax 'oj 'aj smeltzj eb' colb'ilx 'el 'oj Mamin Jehová, caw 'ip sb'itn eb' yuj tzaljc'ojlal ax sjapx eb' 'a Sión. Caw wal tzetzetzn sat eb' yuj tzaljc'ojlal, yujto 'oj 'ilchjoc pax wach'l yuj eb', ax yailal yet' 'oq'uel, 'oj sat 'ejm 'a scal eb'.

¹² Yuj cha, yaln Jehová eyuj 'ixtic: An ton tic, an tzwac' sniwnal e c'ojol. ¿Mach to wal junc 'aj 'oj e xiwi? ¿Tom 'oj e xiw yuj eb' 'anma to yic chaml yaji, yujto lajn eb' 'icha te 'unn c'ultac?

¹³ An Jehová in, an jen̈jnac 'at satcha'an̈, in b'on pax lum lu'um. Ax ticnec, ¿tom xeyac' sat e c'ojl 'a mach b'ojnac ex? ¿Tom an̈ja e xiw yuj eb' 'anma tzex laj 'ixtn cha, eb' tznib'n tzex satn 'el yuj yowl sc'ojol? Palta a yowl sc'ojl eb' tzex 'ixtn cha, toxn man̈x 'a jac yel'chi.

¹⁴ A mach tz'ixtx 'a nab'an̈ej, yajn̈ej ax scolxi; ma'oj cham 'a preso, ma'oj yac' pax wejel.

¹⁵ An Jehová in tic, e Diosal in, a 'in b'i, Jehová tztac' yuj smasnil, an tzwac' q'ue wan chel-loc a mar, tzwa'n pax c'an̈ a'.

¹⁶ An xin jen̈b't satcha'an̈, xin b'on pax lum lu'um. An pax xwac' eyal-l in paxti'. Tzex in coln pax yet' yipl in c'ab', yuj cha, xwaln 'ixtc 'a yib'n̈ Sión: A jun chon̈b'al eb' 'anma tic, caw yel wic eb', xin chi, xchi Dios.

Yailal 'e'nc 'a Jerusalén

¹⁷ Pitzc 'el 'a e sat ex 'aj Jerusalén, 'ijec pax chan̈ e b'a. A ticnec, tox 'ix 'ec' yowl sc'ojl Jehová 'a eyib'an̈. A eyailal 'ix 'eq'ui, 'icha tz'aj sat sc'ojl eb' 'u'm 'an̈ yuj yan̈ cha, 'ixta ex 'aj yuj eyailal tic.

¹⁸ A 'a scal smasnil eyunnal, may wal junc eb' ex jucb'tzani, a 'a scal smasnil eb' 'unn xe q'uib'tzej, may xon junc eb' ex quetzni.

¹⁹ 'Ix jaw chac'aj yailal 'a eyib'an̈: 'Ix ma'x 'ejm e chon̈ab', xlajw cha, 'ix 'ijx 'ec' tas 'ay 'ayex. Til wal 'anma xcham yuj wejel, 'ay pax eb' xcham yuj owal. ¿Mach to wal eb' 'oj 'o'ch sc'ojl 'ayex? ¿mach to wal eb' 'oj 'a'nc sniwnal e c'ojol?

²⁰ Tox x'el yip eb' eyunnal, 'ix can eb' 'a ch'an̈yal 'icha tzyac' no c'ultquil chej. Telctac tz'ajcn eb' scham 'a 'aj tzchaj sb'a caye, lajwnac eb' yuj yowl sc'ojl Jehová, yujto a tz'a'n cuenta eb'.

²¹ Yuj cha, ex 'aj Jerusalén, caw wal tzex 'ixtx si'mb'il, 'icha eb' 'u'm 'an̈, 'ixta xoj eyilxi, palta man̈ ex 'u'moc 'an̈.

²² A Jehová Cajlil qui Diosalec, qui colmalec a tzaln 'ixtic: 'Oj wi'x 'ec' yechl yowl in c'ojl 'a yol e c'ab', atn jun 'icha to tzex 'och 'u'm 'an̈l yu'uj, man̈x b'a'n̈ 'oj eyab' syal yu'uj.

²³ Ata 'oj wa'x 'a eb' tzlaj ex 'ixtn cha, atn eb' xlaj aln 'ayx 'ixtic: E'n̈ec teln 'a sat lum tic, ax qui b'atj 'ec' 'a eyib'n̈ on̈, xchi eb' 'ayex; ex 'ec' teln 'a sat lum cha, ex ste'wtan̈n eb' 'icha pococ, xchi Dios.