Is 5 - Chuj San Sebastian Bible

A yab'xil te snun uva

¹ A ticnec 'oj in b'itnoc jun in wach'c'ojl 'a scal in b'it yet' yawb'en uva. A jun in wach'c'ojl cha, 'ay jun slum caw wal yax sat, ata 'ay yawb'en uva.

² St'oc jun slum cha, si'n 'el sq'uenal scal, sb'on 'och scol-lal, xyawn jun tzo'n̈ uva caw wach' yin̈tl 'a lu'um. Xlajw cha, sb'on chan̈ jun yet'l 'a cha'an̈, sec ata tztan̈wx te uva cha. Sb'on pax jun ste'lab' 'aj tzte'x 'el yalil te uva cha. A win in wach'c'ojl cha, xcob' stan̈wc win ya'n te sat caw wach', palta ax x'aji, caw wal paj te sat cha.

³ Yuj cha, 'ix yaln win 'aj munljel chi 'ixtic: Ex 'aj Jerusalén yet' ex 'aj Judá, a ticnec alc wab'i', mach 'ay spaltail, ¿tom a 'in mto a te 'awb'ente tic?

⁴ ¿'Ayt am jacx tzwutj te 'in b'oni? ¿'Ayt am ma'ix nachj wu'uj, tas wal tz'aj te yawxi? To cob' xin tan̈wj ya'n te sat caw wach', ax x'aji paj te sat tic.

⁵ Ax ticnec, 'oj wal 'ayex tas 'oj wutc jun munljel tic: 'Oj wi'l scol-lal, sec 'oj lajwc can pax 'ejmi. 'Oj jacx can 'el scol-lal cha, sec 'oj te'xoc can 'ejm yuj no noc'.

⁶ 'Oj can 'a cusltacl wu'uj, may xon mach 'oj mesnoc 'el te sc'ab', may mach 'oj 'i'nc 'el ya'nil, 'oj q'uib'x chan̈ sc'ultcal, nab'a q'uix 'oj 'ajoc. Ax waln 'a 'asun, to man̈xtzac yac' cot n̈ab' 'a yib'n̈ jun lum cha, xchi win 'aj munljel cha.

⁷ 'Icha win cha, 'ixta wal yaj Jehová yet' eb' yin̈tl Israel, 'icha to yawb'ente yaj eb', yet' pax eb' 'aj Judá. A Dios tztac' yuj smasnil, 'ix cob' stan̈woc to wach' tzyutj sb'a eb' 'a sley, palta ax x'aji, a milj 'anma sb'o eb'. May jac tojlal tzb'o eb', til wal yel yaw 'anma yixtx yuj eb'.

Syailal eb' tzb'on maysch'olnil

⁸ 'Oltac wal eb' cob' niwn yatut tzb'o'o, tzcob' smacn 'ec' eb' lum lum smasnil yico'oc. Tznib'n eb' to man̈x 'a tas tzcan 'a junc xo mach, tznib'n pax eb' to cojxn eb' tzcajn junc chon̈b' cha.

⁹ A Jehová tztac' yuj smasnil, a 'ix 'a'n alxc 'ayn 'ixtic: A jun tzo'n̈ n̈a cha, toxn̈ej to niwac, mto caw wach' yilxi, palta 'oj can 'a sictaquil. Man̈x 'a mach 'oj cajnc eb' te'.

¹⁰ A 90 ch'an̈l uva 'awb'il yuj junc mach, cojn waque'oc galón yal uva chi 'oj yac'a', ax junc smunljel jun quintal yin̈til, cojn jun almu 'oj yic' 'a jun smunljel cha, xchi Dios.

¹¹ 'Oltac wal eb' 'anma tzseb' q'ue wan 'a sq'uin̈b'ial yic tz'atx can eb' 'u'l 'an̈, ax tz'aji, tzq'uex can te 'a sjolm eb', ata tz'e'x 'ac'wl yuj eb'.

¹² A 'aj tz'och niwc wa'el, ata 'aych son yet' arpa, salterio, tinab' yet' 'amay. Til wal 'an̈ 'ayc' yuj eb' chi ta', palta a tas wan snan Jehová 'a yib'n̈ eb', caw may jac yel'ch 'a eb'.

¹³ Yujto may snab'en eb' wit chon̈b' tic, yuj cha, 'oj 'ijxoc 'at eb' 'icha presoal 'a jun tzo'n̈ xo nacion̈. A smasnil 'anma', yet' eb' yajl yaj 'a scal eb', 'oj cham eb' yuj wejel yet' yuj tacn̈ti'al.

¹⁴ Ax yet'l chamel, 'oj sjac wal sti 'a eb' 'anma', yet' 'a eb' yajl yaj 'a scal eb' 'aj Jerusalén cha; ax sb'u'n 'ejm eb' smasnil, atn eb' 'anma tzcomn 'el yaw.

¹⁵ 'Oj 'ijxoc 'ejm smasnil 'anma yet' sjelnal, ax eb' b'an̈quintac, 'oj yic' 'ejm sb'a eb'.

¹⁶ A Jehová tztac' yuj smasnil, 'oj sch'ox 'ilxoc to niwn yel'ch sb'eyc'ojlal. A Dios yel xo wal wach', 'oj sch'ox 'ilxoc to tojl snab'en.

¹⁷ A eb' lum chon̈b' 'oj sat 'ejm cha, swalab' calnelu, swalab' chiwo xoj 'oj 'ajcn eb' lu'um.

¹⁸ 'Oltac wal eb' tz'i'n b'ey maysch'olnil yet' ya'm 'esal, lajn eb' 'icha junc wacx to'jnac junc careta.

¹⁹ Tzcob' yal eb' 'ixtic: A qui Diosal an̈ israel on̈ tic, atn jun Dios Cojxni, comnoc yajn̈ej tzb'on tas 'icha tzna 'a quib'n̈ec, xchi cob' eb'.

²⁰ 'Oltac wal eb' tzcob' alnoc to a tas tu', a chi tzyal eb' wach'il, ax tas wach', a chi tzyal eb' tu'al; a sacq'uinal, a chi q'uic'q'uinl 'a eb', ax q'uic'q'uinal, a chi sacq'uinl 'a eb'. A tas chi', 'icha to c'a tzyab' eb', ax tas c'a, a chi tzyal eb' chi'al.

²¹ 'Oltac wal eb' cob' tzyal jelnal sb'a, caw wach' cob' snab'en eb' chi 'a tzyutj snani.

²² 'Oltac wal eb' cob' jeln yu'n 'an̈, to caw 'ay snab'en eb' yalni. Yuj cha, tzlaj cob' ya'nc eb' scalc sb'a te 'an̈ cha.

²³ A eb' yajal, yuj tumin tzyaln eb' to a junc tz'och smul, may smul yaln eb', ax junc may smul cha, matz b'o yaj eb' 'a stojlal.

A yowl sc'ojl Dios 'a yib'n̈ schon̈ab'

²⁴ Yuj cha, 'icha wal tz'aj stz'a 'ejm te 'ac yuj c'ac', c'uxn tz'a te xil chi smasnil, 'ixta 'oj 'aj slajw 'el eb' tic, 'oj tacjoc 'el eb' 'icha te te c'al xo sch'an̈lyib', munxoj tzpucl snich, 'icha xoj pococ tz'ajcni. Yujto tzpatquiljcan 'el eb' sley Jehová tztac' yuj smasnil, atn qui Diosal to Cojxni.

²⁵ Yuj wal jun tzo'n̈ mul cha, ax ya'n cot Jehová yowl sc'ojl 'a yib'n̈ schon̈ab', ax ya'n 'och syailal eb' 'anma cha. A eb' lum niwc witz, c'uxn 'oj 'ib'xoc eb' lum 'a yet'ul, ax eb' 'anma cha, t'octac 'oj 'ajcn eb' scham 'a yol caye. Palta man̈ yujoc cha, 'oj 'ec' yowl sc'ojl Dios, 'ipn ya'n 'och syailal eb'.

²⁶ 'Oj ya' chan̈ jun bandera yil jun tzo'n̈ xo nacion̈, ax xulmj 'at 'a eb' nacion̈ cajn 'a 'aj tzlajw c'och sti lum lum tic. 'Oj yawtc cot eb' 'anma chi 'a caw najt cha, ax sjaw tza'njoc eb' muc'uc.

²⁷ A 'a scal eb' soldado, may junc eb' tz'el yip mto c'unb'nac sb'eyi, may eb' 'ay swayan̈, may eb' 'oj telwoc sb'eyi, may eb' choyn yajch sjalul, may pax eb' to 'oj t'ucchjoc can 'el sc'ab' xan̈ab'.

²⁸ A eb' soldado cha, caw jay yaj sn̈icn eb' ye sjul-lab', jalb'ilx teln sjul-lab' eb' chi yu'uj. A yech no schej eb' cha, lajn wal yilx 'icha q'uen suy q'ue'en, ax scaruaje eb', caw jeln sb'ey 'icha chacxuxm'ic'.

²⁹ A yol sjaj eb', lajn wal sn̈il-li 'icha yic no león, yic tzyamn no schib'ej, tzyi'n 'at no a 'aj 'ay yet'ul, toc 'ay mach tztac' yi'n 'ec' 'a no'.

³⁰ A 'a jun c'ul cha, a jun nacion̈ cha, 'oj 'el yaw sjaw 'a spatiquil 'el qui chon̈b'ec tic, lajn wal 'oj c'an̈ 'icha a mar. A mach 'oj 'at q'ueln 'a jun chon̈b' cha, 'oj yil jun yailal cha, 'icha to 'oj 'och q'uic'q'uinl 'a yib'an̈, ax stup sacq'uinal, caw q'uic'q'uinl 'oj 'ajcn smasnil.