Is 43 - Chuj San Sebastian Bible

Cojn Jehová Colwjum

¹ Ax ticnec ex israel yin̈tl can Jacob 'ab'ec, a Jehová jun b'ojnaquex, a tzaln 'ixtic: Man̈ex xiwoc, an 'oj ex in colo', ex wawtj coti, yujto wiquex.

² A yic 'oj eyec' 'a yojl a mar, mto yic 'oj e c'axb'toc a niwc a tzb'eyi, ma'oj e jic' a'. A yic 'oj eyec' 'a scal c'ac', ma'oj e tz'a'i, yujto 'ayn 'ec' eyet' ta'.

³ An Jehová in, e Diosal in, e colmal waji, Cojxn In Ton e Diosal In. An 'ix wa'ch Egipto, Etiopía, yet' chon̈b' Seba e mannb'iloc.

⁴ A eb' 'anma 'a jun tzo'n̈ xo nacion̈, a eb' xwa'ch e jeloc sec tzex colchji. Yujto caw nan ex n̈ej, caw niwn pax eyel'ch wu'uj, caw tzex in chamc'ojlej.

⁵ Man̈ex xiwoc, 'ayn 'ec' eyet'oc. 'Oj in molb'tzoc cot eb' eyit chon̈b' 'ay 'a stojlal 'aj tzq'uel c'u, yet' eb' 'ay 'a stojlal 'aj tz'ejm c'u, sec junxn̈ej 'oj eyaji.

⁶ 'Oj wal 'a eb' chon̈b' 'ay 'a stojlal norte 'ixtic: 'A'c meltzjoc eb' in chon̈ab', 'oj in chioc. Ax 'a eb' chon̈b' 'ay 'a stojlal sur, 'oj wal 'ixtc 'a eb': Man̈ eyamch wan eb', 'ijec cot eb' wunnal yet' eb' wisl 'aycn 'at 'a caw najt cha, eb' 'ay 'a 'aj tzlajw c'och yolyib'n̈q'uinal.

⁷ Atn smasnil eb' wico', an in pitzjnac 'el eb', in b'on eb', yuj yi'nb'ilc chan̈ in b'i, 'oj in chioc.

⁸ 'Ijec cot eb' in chon̈b' 'a tic, 'ay cob' yol sat eb', palta matz uj yiln eb', 'ay cob' schicn eb', palta matz yab' eb'.

⁹ Molb'tzejc e b'a e masnil ex chon̈ab' yet' ex nacion̈. Tzeyalni mach e diosal ax nacion̈ ex tic. ¿Tom 'ay junc eb' aljnac 'eli tas ujnc 'a yic pecti', mto 'icha tas wan yuj ticnec? Yi' cot cab' eb' stestigo toto yel yaljnac eb', sec wach' tz'ojcax 'eli to yel tas yaljnac eb' cha, xchi Dios.

¹⁰ A Jehová a tzaln pax 'ixtic: Ax israel ex tic in testigo ex, in checb' ex, sic'b'ilx 'el wu'uj, sec wach' tzin eyojquej 'eli, tzin eya'n 'och yipc e c'ojol, nachj cab' pax 'el eyu'uj, to cojn in toni. May junc xo dios b'ab'l 'e'nc wu'uj, may pax junc xo tza'n 'oj jawoc.

¹¹ Cojn in ton Jehová in, may junc xo mach tztac' scolwji.

¹² An waljnac to 'oj ex in colo', ax ticnec 'elnc c'och jun cha. In testigo eyaji, to an xwac' 'el'choc, man̈oc junc comn dios aljnac.

¹³ A 'a yictax pecti', Dios in xoni. May junc mach tztac' scoln 'el sb'a 'a yol in c'ab', may junc mach tztac' sjun 'el tas tzin b'o'o, xchi Dios.

¹⁴ A Jehová qui Diosal an̈ israel on̈ tic, jun tzon̈ 'a'nec 'el 'a libre, Dios To Cojxni, a tzaln 'ixtic: A wal 'oj wutc ex in coln ax tic, to 'oj in checb't nan̈l eb' soldado yac' owl 'a Babilonia, ax s'at eb' 'aj Babilonia chi elc 'a yol jun tzo'n̈ barco to 'aych yipc sc'ojol.

¹⁵ Ex israel, an Jehová in, an b'ojnac ex, e Diosal in, e Reyl in paxi, xchi Dios.

¹⁶ A Jehová a jacjnac jun b'e 'a yojl a mar, atn jun b'e 'ix 'ec' 'a snan̈l a'.

¹⁷ 'Ix yac' 'eltoc jun b'uln̈ eb' soldado, yet' eb' scaruaje, yet' pax eb' schej, palta 'ix satl eb' yu'uj. 'Ix telw can 'ejm eb', man̈x 'ic stac' sq'uex wan eb', 'ix satl eb' 'icha tz'aj stup sc'a'l junc cantil.

¹⁸ A ticnec, tzyal Jehová 'a eb' schon̈b' 'ixtic: Man̈x e na tas tox 'ix 'ec' cha, man̈x e na cot tas ujnc 'a yictax yalan̈.

¹⁹ 'Ay jun tas 'oj in b'o', mant 'a 'aj tzuj xoni, 'oj eyil nab'an. 'Oj in jac jun b'e 'a lum cusltac lu'um, ax wa'n b'ey yoct a a 'a sat lum tacn̈ lu'um.

²⁰ 'Oj yi' chan̈ e no calte'al noc' in b'i, atn no 'oques yet' no tucul, yujto 'oj wac' pac' a a 'a lum cusltac lu'um, ax wa'n b'ey yoctc a a chi 'a lum tacn̈ lu'um. Yuj eyu'n a ax in chon̈b' ex tic, to sic'b'ilx 'el wu'uj, yuj cha, 'ixta 'oj wutoc.

²¹ B'ob'ilx wu'uj, yic tzeyaln wach' paxti 'ayin.

²² Palta ax israel ex tic, ex schon̈b' can Jacob, ma'in eyawtej, a eyico', to ex tzactzj wu'uj.

²³ Man̈x 'ic eyac' no calnelu xajmb'al-l 'ayin, man̈x 'a wel'ch jac 'a e sat yet' e xajmb'al cha. Ma'ix in c'ann̈j ofrenda 'ayex, ma'ex wac' pural eya'n incienso 'ayin.

²⁴ Ma'ix e man te te su'q'ui sjab' yic tzeya'n te ofrendail 'ayin, ma'ix eyac' tzaljoc in c'ojl yet' xepual no noc' tzeyac' xajmb'alil. A eyico', to cojn mul tze b'o'o, caw tzin tzactzj c'och eyu'uj, tze tzuntzj cot wowl yuj jun tzo'n̈ maysch'olnil tzlaj e b'o cha.

²⁵ Palta an tic, yuj swach'l in nab'en, yuj cha, tzin sucsat e maysch'olnilal, man̈x 'a b'a'n̈ 'oj in na cot e mul cha.

²⁶ Toto 'ay tas tze nib'j tzeyal 'ayn jun, 'och coyc 'a b'eyc'ojlal ticnec, alc coti tas yaji, ax quilni toto yel may e mul.

²⁷ A eb' e mam eyicham, a eb' b'ab'l 'ochnc smul, ax eb' scuymal eb', 'ix meltzj 'och eb' 'ajc'ojlal 'ayin.

²⁸ Yuj cha, ma'ix yal in c'ojl to tzin ya' servil eb' ya'mal 'och e ti ax israel ex tic. Ex yin̈tl can Jacob, 'oj ex wac' satxoc 'eli, caw wal 'oj eyixtxi, xchi Dios.