Is 41 - Chuj San Sebastian Bible

'Oj colxoc eb' israel yuj Dios

¹ Tzyal Dios 'ixtic: Ex chon̈b' cajn 'a sti a mar, sictac tzex 'aj 'a wojltac. Te'wtzejc e b'a e masnil ex nacion̈. Cotn̈ec, yamn tzon̈ 'ajec, tzqui mol alnec jun tzo'n̈ tic.

² ¿Mach 'oj 'a'n checljoc jun rey 'a 'aj tzq'uel c'u? ¿Mach 'oj 'a'n yac' ganar jun rey chi owal yic tzann̈j 'aj 'oj 'ec'oc? ¿Mach 'oj 'a'n 'och jun tzo'n̈ nacion̈ 'a yol sc'ab' jun rey cha, sec tzyij 'ejm sb'a eb' 'a 'a? A yespada yet' sjul-lab' jun rey cha, a 'oj pechnoc 'el eb', ax sactzic can 'at eb' 'a juncxo lugar 'icha tz'aj solcal trigo tzpucn 'at 'a scal 'ic'.

³ 'Oj 'at eb' rey 'elc yu'uj, palta ax jun rey cha, caw tzaljc'ojlal 'oj 'at 'a yojltac, 'icha to matz tec' 'ejm yoc 'a sat lum sb'eyi.

⁴ ¿Mach 'ix 'a'n sb'o jun tzo'n̈ tic? ¿Mach 'ix nalb'an smasnil tas 'ix uj 'a yictax pecti'? An ton Jehová in, an b'ojnac, cojn in ton Dios in, b'ab'l waj 'a smasnil, slajb' in paxi.

⁵ Yiljnac smasnil eb' nacion̈ 'ay 'a sti a mar, caw xiwnc eb' yilni. Smasnil eb' 'anma cajn 'a 'aj tzlajw c'och sti lum lu'um, caw 'ib'xnac eb' yuj xiwlal, wan laj smolb'tzan cot sb'a eb', xchi Dios.

⁶ A eb' josm te', a eb' tzjucb'tzan yit munljumal chi 'a smunljel.

⁷ Ax eb' tzb'on junc yechel, a eb' tzjucb'tzan eb' tzsucn 'och q'uen plata 'a jun yechl cha, ax eb' tzsucn 'och q'uen plata chi 'a jun yechl cha, a eb' tzjucb'tzan eb' tzma'n 'och slawxil jun yechl cha, tzyaln eb': Caw wach' jun qui n̈uslab' q'uen tic, xchi eb'. Wal 'a yajn̈ej tzma'n san̈b'oc eb' junc yechl chi yet' lawux, sec man̈xtzac 'ib'xi.

⁸ Tzyal Dios 'ixtic: Ex israel yin̈tl can Jacob 'ab'xnan̈c 'a tas tzwala, caw yel in checb' eyaji, an si'jnacx 'eli, ax tic yin̈tl ex can in wach'c'ojl Abraham.

⁹ An ton ex wij cot 'a 'aj tzlajw c'och sti lum lu'um, ex wawtn cot 'a 'aj caw najt eyajcn 'ati. 'Ix waln 'ayx 'ixtic: In checb' ex, xin chi. An ex in si'cn 'eli, ma'ex in patquilj 'eli.

¹⁰ Man̈ ex xiwoc, 'ayn 'ec' eyet'oc. Man̈ ex 'och 'il, yujto an ton e Diosal in. An tzwac' eyip, an tzex in colo, an tzex in yamch wan yet' wip tzin c'anlb'ej 'a stojlal.

¹¹ A smasnil eb' to matz ex nib'ni, caw 'oj cancn eb' 'a q'uixwc'ojlal, man̈x 'a yel'ch 'oj 'ajcn eb', a eb' tzyac' yip ya'n owl eyet'oc, 'oj satcn 'el eb'.

¹² 'Oj e sayc' to cob' eb' 'ajc'ojl yajch 'ayex, palta man̈x 'oj 'ilchjoc eb' eyu'uj. A eb' tz'a'n owl xon cob' eyet'oc, 'oj laj satchan̈ eb' 'icha junc tas may xon 'aj tz'ilxi.

¹³ Yujto an tic, an ton Jehová e Diosal in, an ex in quetzb'eyoc', 'ix waln 'ayx 'ixtic: Man̈ex xiwoc, an 'oj ex in colo', xin chi, xchi Dios.

¹⁴ A Jehová a tzaln 'ixtic: Ex israel yin̈tl can Jacob, wach'xam man̈ niwnoc e b'isul, wach'xam mant 'a eyip, palta man̈ex xiwoc, an 'oj ex in colo'. Cojxn In Ton Dios In, e colmal waji.

¹⁵ 'Oj ex wa'ch 'icha junc q'uen 'i'm 'el sat trigo to caw 'a'to, 'ay ye si'mb'il. 'Oj e mac' poj eb' lum witz, pococ 'oj eyutc can eb' lu'um, ax eb' lum tzalan, 'icha stzapil 'ixm trigo, 'ixta 'oj eyutc can eb' lu'um.

¹⁶ Ax e tzicn can 'at 'a cal 'ic', ax 'ic' chi 'oj 'i'nc can 'ati, sactzicnac 'oj 'ajcn yuj chacxuxm'ic'. 'Ixta to b'i'an, ax eyi'n e tzaljc'ojlal 'a 'ayn an Jehová in, ax e b'an̈n e b'a wu'uj, To Cojxn in Ton Dios In.

¹⁷ A eb' 'anma to meb'a', eb' may tas 'ay 'a 'a, tzsayc' eb' cob' a a', palta matz 'ilchj a yuj eb'. Caw tacn̈tzaynac tz'aj yac' eb' yuj tacn̈ti'al. An xo Jehová in tic, 'oj in colwjn̈ej 'a eb', ma'oj wactc can eb'.

¹⁸ 'Oj wac' pac'q'uet a a 'a lum jolmctac witz, ax wa'n pitzwc a spac'b'a 'a snan̈l eb' lum pan̈n 'a'lic. A lum cusltac lu'um, 'oj wa'cn 'och lum yaxlumal, ax 'a lum tacn̈ sat, 'oj wac' pac' a a 'oj b'ey yoctac.

¹⁹ A 'a lum cusltac lu'um, 'oj wawc te c'ute', te acacia, te arrayán yet' te olivo. A 'a lum tacn̈ sat cha, 'oj wawc te taj, te c'u'taj, yet' te q'uisis,

²⁰ sec wach' tzyil smasnil 'anma', ax snachj 'el yuj eb', chajtlto an ton Jehová in, an 'ix 'in b'o jun tzo'n̈ tic yet' in poder. Cojxn In Ton e Diosal In, an 'ix wac' 'el'choc jun tzo'n̈ tic, xchi Dios.

May tas tztac' yuj eb' comn dios

²¹ A Jehová sReyl eb' yin̈tl Jacob, a tzaln 'ixtic: Cotn̈ec ex yechel, wul ch'oxc e jelnal, cotn̈ec, wul ch'oxc e colwal.

²² Cotn̈ec, wul alc 'ayn̈ on̈ tas ujnac 'a yic yaln̈taxi, 'oj qui cha cab' 'ayex, wul alc tas 'oj ujc 'a yic b'a'n̈ cha, yic wach' 'oj quilc tas 'oj 'aj slajw 'el'chi.

²³ Toto caw yel dios ex, alc 'ayn̈ on̈, tas wal 'oj ujc yic b'aq'uin̈. B'oc tas tztac' eyu'uj, toxn̈ej wach' mto tu', sec tzsat qui c'ojl quilni, ax qui xiw yu'uj.

²⁴ Palta ax tic, caw may jac eyel'chi, toc 'ay tas tztac' eyu'uj. A eb' tzyac' 'ejm sb'a 'ayex, smoj spatquilx can 'el eb'.

²⁵ 'Ix wac' checlj chan̈ jun mach 'a stojlal norte, 'oj wawtc coti, ax scot 'a 'aj tzq'uel c'u, ax yaln sb'a 'ayin. A 'oj te'nc 'ejm eb' syajlil chon̈ab', 'icha wal tz'aj ste'x lum b'iq'uich, 'icha wal tzyutj win tz'acm ste'wtan̈n lum b'i'ch cha, 'ixta 'oj 'ajcn eb' yu'uj.

²⁶ Ax yechl ex tic, ¿mach junc 'ayx 'ix aln 'el yab'xil jun tic 'a yictax pecti', sec wach' tzcab' yab'xil? ¿Mach junc 'ayx 'ix aln 'a yic yaln̈tax cha, yic wach' tzcala to yel tzyala? May junc ex 'ix eyal-l yab'xil tas 'oj ujc b'aq'uin̈, may junc 'anma 'ix 'ab'n eyalni.

²⁷ A 'a yictax pecti', an waljnac jun 'ab'x tic 'a Sión, an pax tzin checb't jun in checb' 'a Jerusalén, yic tzyaln 'el wach' 'ab'ix to jab'xoj smeltzj eb' 'anma 'a schon̈ab'.

²⁸ Tzin maclj wal wila', toc 'ay junc comn dios tzjawi; may junc tztac' ya'n in nab'enoc, may junc tztac' spacn tas tzin c'anb'ej.

²⁹ May xon junc eb' 'ay yel'ch jab'oc, toc 'ay tas tztac' sb'on eb', yuj cha, nab'an̈ej 'ay jun tzo'n̈ yechl cha, xchi Dios.