Is 4 - Chuj San Sebastian Bible

¹ A 'a jun tiempoal cha, jaywn̈xoj eb' winc 'oj canoc, yuj cha, 'ay ucwn̈oc eb' 'ix 'ix 'oj alnc 'ixtc 'a junc winc cha: Comnoc tzyal a c'ojl on̈ e'n on̈, mun 'oj qui say wa qui b'a 'on̈, ax qui pichn qui b'a 'on̈, cojnto tzon̈ ej on̈, sec tz'el q'uixwelal 'aych 'ayn̈ on̈, yujto may quichmil on̈, 'oj schic eb' 'ix.

'Oj 'ochx Jerusalén chon̈b'al

² A 'a jun tiempoal cha, 'ay jun yin̈tl David 'oj pitzw chan̈ yuj Jehová. A jun cha, lajn 'icha swol junc te te'. A eb' 'oj can to 'a yol schon̈ab' 'oj tzaljoc chan̈ eb' yu'uj, ax stzalj pax eb' yiln yelx wul smasnil sat yawb'en 'ay 'a slu'um.

³ A jaywn̈ocx eb' 'aj Sión 'oj can 'a Jerusalén, 'ay yaln eb' yic scan cajn ta', 'oj alxoc yuj eb', to yicn̈ej Dios yaj eb'.

⁴ A yic 'oj sb'eyc'ojlanc Dios eb' schon̈ab', ax ya'n 'och yailal 'a yib'n̈ eb', ata 'oj sacb'tzoc eb' 'aj Jerusalén yuj smilm 'anma'il, ax sacb'tzax can pax eb' 'aj Sión yuj stu'al.

⁵ A 'a c'ual, 'oj ya'ch Jehová jun 'asn yen̈loc lum tzaln Sión yet' eb' 'anma 'oj syam sb'a ta'; ax 'a 'ac'wal, a jun c'ac' caw tzn̈ilchji, a 'oj 'a'nc sacq'uinl 'a eb', yujto a stzictznil Dios a 'ayc' 'a yib'n̈ eb' smasnil.

⁶ A jun tzo'n̈ chi tz'och yen̈loc eb' 'a c'ual, tzcolx pax eb' yuj 'a 'ic'n̈ab'.