Is 39 - Chuj San Sebastian Bible

Schajnac Ezequías eb' 'aj Babilonia

¹ A yic jun tiempoal cha, a rey Merodac-baladán, yunnal Baladán, sreyl Babilonia, 'ix yab' yalxi to xyab'ilan Ezequías, palta xb'ox sc'ojol, yuj cha, 'ix schec cot jun tzo'n̈ eb' schecb' wul yac' jun ch'an̈ carta yet' jun siylab' 'a 'a.

² Caw wal chab'il sjaw eb' schecb' chi yuj Ezequías. Xlajw cha, 'ix sch'oxn 'a eb' tas molb'il yuj 'a yol yatut, atn q'uen plata, q'uen oro, perjuma, aceite caw wal wach' yet' 'a 'aj molb'il yamc'ab' yic owal, yet' pax jantcn̈ej tas 'ay 'a 'a. C'uxn 'ix sch'ox 'ilxoc smasnil.

³ Xlajw spaxcn eb' winc cha, 'ix 'at Isaías win schecb' Dios 'a win rey Ezequías, 'ix sc'anb'n 'a 'ixtic: —¿'Ajtil 'ix cot jun tzo'n̈ winc cha? ¿tas xchi eb' 'ayach? xchi. —'Ix cot eb' 'a jun nacion̈ caw najat, atn 'a Babilonia, xchi Ezequías.

⁴ —¿Tas xwul yil eb' 'a a despacho tic? xchi Isaías. —'Ix yil eb' smasnil tas 'ay 'a in despacho tic, yet' jantcn̈ej tas molb'il wu'uj. C'uxn xin ch'ox 'a eb' smasnil, xchi Ezequías.

⁵ Xlajw cha, 'ix yaln Isaías 'ixtc 'a Ezequías: —'Ab' tas tzyal spaxti Jehová:

⁶ 'Oj jawc wal sc'ual, to a smasnil tas 'ay 'a a despacho, jantcn̈ej tas molb'il can yuj eb' a mam echam yet' eco', c'uxn 'oj 'ijxoc 'at smasnil 'a chon̈b' Babilonia.

⁷ An̈jtona', 'oj 'ijxoc pax 'at eb' en̈til, ax yijx 'el yitb'eym swincal eb'. 'Oj 'och eb' ya'malc servil win sreyl Babilonia cha, xchi Dios 'ayin, xchi Isaías.

⁸ Xlajw cha, 'ix yaln Ezequías 'ixtc 'a win Isaías: —A jun paxti 'ix al 'ayn yuj Jehová, caw wal wach', xchi. 'Ix yal 'ixta', yujto a snani to 'ay junc'ojlal yic 'ayt 'och 'a yopiso cha.