Is 38 - Chuj San Sebastian Bible

'Ix yab'ilan Ezequías

¹ A 'a yic jun tiempoal cha, caw ow ya'n syailal Ezequías, jab'xoj ma'ix chami. Ax Isaías yunnal Amoz, win schecb' Dios, 'ix 'at win 'at yila', 'ix yaln win 'ixtic: —Tox 'ix yal Jehová oj 'ixtic: A ticnec, b'ocn yaj tas 'ay 'ayach, yujto 'oj a chami, man̈x 'oj b'oxc a c'ojol, xchi Dios, xchi Isaías cha.

² Xlajw cha, 'ix meltzj 'och q'ueln Ezequías 'a sat yich n̈a cha, 'ix leslwi 'ixtc 'a Jehová:

³ Tzin tew 'aych Mamin Jehová, to tza na coti chajtlto wach' 'ix wutj ach wa'n servil, xin b'on tas tzchaj a c'ojol, xchi 'a slesal. 'Ix 'oc' wal si'mb'il.

⁴ Xlajw cha, xyaln pax Jehová 'ixtc 'a Isaías,

⁵ to tz'at yalx 'ixtc 'a Ezequías: A Jehová qui Diosal yet' a mam 'ichm David, a tzaln 'ixtc 'ayach: 'Ix wab' a lesal, xwiln pax oq'ui, yuj cha, 'oj wac' olajn̈ec xo ab'il a q'uinal.

⁶ 'Oj ach in col yet' chon̈b' Jerusalén tic 'a yol sc'ab' win sreyl Asiria. An 'oj woch stan̈malc jun chon̈b' tic, xchi Dios, xchi Isaías cha.

²¹ Xlajw cha, 'ix ya'n Isaías chi tenxoc b'o jac te sat higo, 'ix sucx 'och 'a sat jun syab'il win rey cha; cojn cha, 'ix b'ox sc'ojl winac.

²² Yuj cha, sc'anb'n win Ezequías chi 'ixtc 'a Isaías cha: ¿Tas wal junc senya 'oj ch'oxxoc wila', sec 'oj nachjoc 'el wu'uj, ax in 'atx 'a yatut Jehová? xchi winac.

⁷ Xyaln Isaías chi 'ixtic: —Atn jun senya tic 'oj sch'ox Jehová 'ayach yic tzya'n 'el'choc tas tzyala:

⁸ A 'a jun sreloj win Acaz, ata 'oj yac' meltzjoc Dios jun yen̈l yoc c'u lajn̈c'ajoc 'a spatic, atn jun yoc c'u tox xeq'ui, xchi Isaías. Ax x'aji, 'ix 'el'ch 'icha yaj yaln can cha, 'ix meltzj jun yoc c'u chi lajn̈c'aj 'a spatic, atn jun yoc c'u tox x'ec' cha.

⁹ A yic tox xb'ox sc'ojl rey Ezequías yuj syailal, 'ix sb'on can jun b'it tic 'ixtic:

¹⁰ A xwutj in nani to caw te'n in to ax in chami, yujto alb'ilx 'ayin to 'ayn xo 'och 'a yol sc'ab' chamel, man̈x wojcoc toto tzat wil jaye'ocx ab'il.

¹¹ Yuj cha, xwaln 'ixtic; Man̈x 'oj wil Jehová 'a yolyib'n̈q'uinl tic, man̈x 'a junc 'anma cajn 'a sat lum tic 'oj wilchi.

¹² Yujto a 'in q'uinal 'ijn 'ix sat 'ejm 'icha tz'aj sma'x 'ejm junc mantiado 'a yet'l yuj junc 'ilm calnelu, tzyi'n 'ati. 'Icha wal tz'aj slot'x 'elt junc nip 'a 'aj tzjalxi, 'ixta x'aj in q'uinl tic xwab'i, xin chi. Mamin, sc'ual yac'wlil wab'n syal o'oj.

¹³ Caw wal tz'el waw wab'n syail yic tz'ec' junjn 'ac'wal, 'icha wal to a junc no león tzcach'n poj in b'aquil. Sc'ual yac'wlil wab'n syal o'oj.

¹⁴ 'Icha wal yel yaw no pechul tz'ec' no 'a satcha'an̈, 'ixta yel waw wab'n syail, tzin c'acw 'icha sc'acw no parama. Caw wal tzc'unb' yol in sat in q'ue q'ueln 'a satcha'an̈. Mamin Jehová, caw wal tzin 'ixtx tzwab'i, ta'wan̈ 'ayin.

¹⁵ Man̈x 'a tas wach' walni, yujto ach 'ixta 'in otej. 'Emmquilal xoj wec' ticnec yuj in yailal 'ix 'eq'ui.

¹⁶ Mamin, yujn̈ej tas tza b'o'o, yuj cha 'ay sq'uinl smasnil 'anma'; locn in 'ay pax in q'uinl yet' eb'. Ach 'ix ac' in tzatzl Mamin, yuj cha, pitzn in ticnec.

¹⁷ Caw niwquil in yailal 'ix 'eq'ui, palta 'ix 'och in wach'loc. 'Ix 'el pax 'a a c'ojl in a coln can 'el 'a yol sc'ab' chamel, yujto 'ix ac' niwnc'ojlal smasnil in mul.

¹⁸ A mach 'ayx 'ec' 'a campusan, man̈x 'oj stac' yaln eb' swach' paxti 'ayach, toc 'ojt yi' chan̈ eb' chamnc chi a b'i, a eb' 'anma 'emnc xo a yol sjulal, toc 'ayt tas 'aych yipc sc'ojl eb' 'a tas alb'il can o'oj.

¹⁹ Cojn mach pitzan, atn eb' chi tztac' yaln swach' paxti 'ayach, 'icha tzwutj in b'a 'aych ticnec. Ax eb' mamb'il yet' nunb'il, a eb' tzaln yab' eb' yunnal, to tz'el'ch tas tzala.

²⁰ Mamin Jehová qui Colmal aji, yuj cha, smoj wal ach qui b'itnan yet' qui arpa, tzqui b'itnan a b'i 'a atut, ya' sb'a 'ayt jacx qui q'uinl on̈, xchi rey Ezequías.