Is 37 - Chuj San Sebastian Bible

'Ix colx 'el Judá 'a yol sc'ab' Asiria

¹ A yic 'ix yab'n win rey Ezequías tas 'ix alx cha, 'ix stziln jat win spichul, ax pichl n̈achtac sat xya'ch yuj cusc'ojlal. Xlajw cha, 'ix 'at 'a yatut Jehová.

² 'Ix schecn 'at win rey win Eliaquim mayltoma yaj 'a sdespacho, yet' Sebna tz'ib'n ab'ix, yet' pax eb' ya'mal 'och sti eb' 'anma 'a Dios to 'ichm winc xo. 'Ix ya'ch ewin spichl n̈achtac sat, 'ix 'at eb' 'a win schecb' Dios, atn win Isaías, yunnal Amoz.

³ 'Ix yaln eb', to a win rey Ezequías 'ix aln 'ixtic: A ticnec 'ayn̈ 'och 'a cusc'ojlal, 'a yailal, 'a q'uixwc'ojlal. 'Icha junc 'ix 'ix tz'alj yune', caw tz'elcn yip, 'ixta caj ticnec.

⁴ Comnoc wal 'ix yab' Jehová qui Diosal jun tzo'n̈ paxti 'ix yal win syajlil eb' soldado yic win sreyl chon̈b' Asiria checb'il cot yuj win rey yic tzb'uchwj 'a qui Diosal pitzan. Comnoc tzya'ch Jehová yailal 'a yib'an̈. Yuj cha, leslwan̈ cuj an̈ jayn̈ on̈ tzon̈ can tic, xchi Ezequías, xchi eb'.

⁵ A yic xyab'n Isaías tas 'ix yal eb' schecb' win rey Ezequías cha,

⁶ 'ix schecn 'at win eb' 'at yal 'a win rey cha, to a Jehová a 'ix aln 'ixtic: Man̈ ach xiw yuj jun tzo'n̈ paxti 'ix ab' cha. Caw tu 'ix yal win schecb' sreyl chon̈b' Asiria chi 'ayin, to matz tac' wuj yalni.

⁷ 'Ilto, an 'oj wa'ch junc xiwlal 'a 'a. A yic 'oj yab'nc junc 'ab'ix, ax smeltzj 'a schon̈ab'. Ata 'oj wac' milxc cham yet' espada, xchi Dios, xchi Isaías.

⁸ 'Ix yab'n win syajlil eb' soldado sreyl Asiria, chajtlto man̈x 'ayc 'ec' win rey chi 'a chon̈b' Laquis. Yuj cha, 'ix meltzji, 'ix schaj sb'a yet' win rey chi 'a chon̈b' Libna, wan ya'n win owl yet' jun chon̈b' cha.

⁹ Ata 'ix yab' win rey chi yalxi, to a win Tirhaca sreyl Etiopía to wan scot win yet' eb' soldado wul yac' owl yet'oc. Yuj cha, 'ix schecn pax 'at win rey chi eb' schecb' jun 'ejm xo 'a win rey Ezequías 'a Judá, xyaln 'at 'ixtic:

¹⁰ A 'a Diosal tzalni, to ma'oj 'ajxc 'och Jerusalén 'a yol in c'ab'; palta man̈ a'ch yipc 'a c'ojl tas tzyal a Diosal cha, man̈ a cha 'ixtxoc paxti a b'a yu'uj.

¹¹ Ach tic 'ix ab'i, tas 'ix cutj qui satn 'el jun tzo'n̈ xo nacion̈ an̈ sreyl chon̈b' Asiria on̈ tic. ¿Tom 'oj cob' techjoc e coln e b'a e nani?

¹² ¿Toc 'ix colchj eb' 'anma yuj sdiosal 'a yol sc'ab' eb' in mam wicham? 'Ix yac' lajwc eb' 'aj Gozán, eb' 'aj Harán, eb' 'aj Resef, yet' eb' 'anma 'aj Bet-edén cajn 'a yol yic Telasar.

¹³ A sreyl Hamat, sreyl Arfad, sreyl Sefarvaim, sreyl Hena, yet' sreyl Iva satnc xo 'el eb' smasnil wu'uj, xchi.

¹⁴ 'Ix schaj win rey Ezequías ch'an̈ carta 'a eb' schecb' sreyl chon̈b' Asiria cha, 'ix yawtn win ch'an̈. Xlajw cha, 'ix 'at 'a yatut Dios, 'ix squen̈n 'ejm win ch'an̈ 'a yojltac Jehová.

¹⁵ 'Ix leslwi win 'ixtic:

¹⁶ Mamin Jehová, qui Diosal ach an̈ israel on̈ tic, b'achn 'ec' a despacho 'a scal eb' querubín, cojxn̈ej ach Dios ach 'a yib'n̈ smasnil nacion̈ 'a yolyib'n̈q'uinl tic. Ach 'ix a b'o satcha'an̈ yet' lum lu'um.

¹⁷ Mamin Jehová, comnoc wal tza maclj ab'i', tzel wal jun tic yet' a sat. Mamin Jehová tzab'n tas 'ix yal cot Senaquerib 'ayin, caw tu 'ix yal 'ayach, ach qui Diosal, pitzn ach.

¹⁸ Yel wal Mamin Jehová, to a eb' sreyl chon̈b' Asiria cha, a eb' satjnac 'el jun tzo'n̈ nacion̈ cha.

¹⁹ Tz'anc sdiosal eb', yujto wal yel man̈ diosoc jun tzo'n̈ cha. 'Anma b'ojnac, te eb', q'uen eb'. Yuj cha, xtechj satn 'el ewin eb'.

²⁰ Ax ticnec jun Mamin Jehová qui Diosal on̈, coln̈ 'el 'a yol sc'ab' jun rey cha, sec tzyojquej 'el smasnil nacion̈ 'a yolyib'n̈q'uinl tic, to cojxn̈ej ach Jehová Dios ach, xchi Ezequías 'a slesal.

²¹ Xlajw cha, 'ix ya'n Isaías alxc 'ixtc 'a win Ezequías cha: A Jehová qui Diosal a 'ix aln 'ixtic: 'Ix wab' a lesl yuj tas xyal Senaquerib sreyl Asiria, xchi.

²² Yuj cha, xyaln Jehová jun tzo'n̈ paxti tic 'ixtc 'a yib'n̈ win sreyl Asiria cha: A eb' 'ix cob's 'ix 'aj Sión, ton̈j 'oj tzewjc eb' 'ix 'aych ach Senaquerib. A eb' 'aj Jerusalén 'oj ach sb'uch eb', ax spax ch'umnjoc eb' 'ayach, yic 'oj a meltzj 'a a patquil.

²³ ¿Mach jun 'aj tu 'ix ala, 'ix a xib'tn paxi? ¿Mach jun 'aj niwquil 'ix otj yol a jaj, xa jun a sat 'a 'a? Atn 'ayn an Dios in to Cojxn in.

²⁴ 'Ix a'n yal eb' a checb' tu paxti'al 'ayn an Jehová in, 'ix cob' aln 'ixtic: Til wal sb'isl in caruaje yic owl wet'i, yic in q'ue'ch 'a sjolm eb' lum witz caw niwc stel 'a yol yic Líbano. Xin ch'acn te c'ute niwc ste'il yet' te taj wach' yilxi. 'Ixta to b'i'an, in q'ue'ch 'a lum jolmctac witz 'ayb't 'a cha'an̈, xlaj wiln jun tzo'n̈ lum lum caw wach' yilx yet' sb'a'al.

²⁵ A chuc chon̈b'al 'aj xin joy a 'uc'b'il a xwuq'uej, xin te'n can tup smasnil a b'eymal a 'a yol yic Egipto, xcob' a chioc.

²⁶ ¿Tom may 'aj 'ix ab' yalxi to an ton Jehová in? Wujn̈ej tz'el'ch smasnil jun tzo'n̈ tic. Pecti xon nab'il can wu'uj to tz'el'ch jun tic, yuj cha, stac' a satn 'el jun tzo'n̈ nacion̈ caw wach' yajch smuroal, 'ix q'uecn b'uln sc'ajl o'oj.

²⁷ Man̈x 'a yip eb' 'anma cajn 'a jun tzon̈ chon̈b' cha, caw wal tzxiw eb', tzq'uixw eb'. Lajn xoj eb' 'icha te c'ultac, mto 'icha te 'itj caw wal yax latz'nac, mto 'icha c'ultc tzpa' chan̈ 'a yib'n̈ n̈a, tzma'x tacjoc can yuj 'ic', 'ixtnta yaj eb' 'anma cha.

²⁸ Wojc smasnil tas xlaj a say a b'o', yet' tas nab'il o'oj tzach 'eq'ui. Wojc paxi to xcot owl 'ayin.

²⁹ Yujto a 'ayn ach owx 'ochi, caw ch'an 'ix otj a b'a, yuj cha, 'icha to 'oj wa'ch jun argoya 'a a n̈i', yet' jun freno 'a a ti', ax ach wa'n meltzjc 'a a b'e 'aj ach coti, xchi Dios, xchi Isaías.

³⁰ Xlajw cha, 'ix yaln Isaías 'ixtc 'a Ezequías: 'Ay jun senya 'oj ch'oxxoc eyil yuj tastc tot 'oj ujoc: 'Oj e wa 'ixm trigo mun tzpac' 'a jun ab'il tic yet' 'a junx ab'il; palta ax 'a yoxl ab'il, ax xo 'oj eyawc tas 'a lu'um, ax e jach'w paxi, 'oj eyawc eyuva ax e lon sat.

³¹ A jaywn̈ocx ex tzex can 'a Judá, lajn 'oj eyaj 'icha junc te te tz'emx sch'an̈l yib' 'a yol lu'um, tzlajw cha, tzya'n sat muc'uc.

³² Ax jaywn̈ocx tzex can 'a Jerusalén yet' 'a tzaln Sión, 'oj e niwtj pax 'eli, ax e b'ut'n pax 'el e chon̈ab'. 'Ixta 'oj yutc Jehová jun cha, yujto 'ay schamc'ojlal 'ayex.

³³ Ax pax yuj win sreyl Asiria, 'ix yal Jehová yuj win 'ixtic: Ma'oj 'oxtoc 'a yol chon̈b' Jerusalén tic, may wal junc sjul-lab' 'oj ya'lc sjuln coti, ma'oj jawc yac' owl yet' smacl sat jul-lab', ma'oj sb'o pax chan̈ sb'achte 'a spatquil smuroal chon̈b' tic.

³⁴ An Jehová in, an tzwala. To a 'a sb'e 'aj 'ix jawi, ata 'oj meltzjoc paxi, caw ma'oj stac' xon yoch 'a yol chon̈b' tic.

³⁵ 'Oj in tan̈wc jun chon̈b' tic, ax in colni, yujto 'ay in chamc'ojlal 'a in checb' David, yuj pax in b'inaxi, xchi Dios, xchi Isaías.

³⁶ Ax jun yángel Jehová, a xmiln cham 185 mil eb' soldado asirio 'a scamplamento, ax yic sacb'el 'a junx c'u cha, chamnc xo eb' soldado chi smasnil.

³⁷ Xlajw cha, 'ix yi'n 'el Senaquerib sreyl Asiria scamplamento ta', axta xc'och 'a chon̈b' Nínive, 'ix can ta'.

³⁸ 'Ay jun c'ual 'ix 'at leslwoc 'a yatut jun sdiosal tzcuch Nisroc, axn 'ayc' chi ta', 'ix c'och chawn̈ eb' yunnal 'a 'a, atn Adramelec yet' Sarezer, 'ix smiln can eb'. 'Ix 'atcn eb' 'elc 'a yol yic Ararat. Ax junx yunnal scuch Esarhadón, a 'ix 'ochcn reyl sjeloc.