Is 34 - Chuj San Sebastian Bible

Ya'jnac 'och Dios yailal 'a Edom

¹ Ex chon̈ab', nitzc cot e b'a yic tzex 'ab'xni, ex nacion̈ macljec eyab' tas 'oj alxoc. Yab' cab' pax yolyib'n̈q'uinl tic yet' smasnil tas 'ay 'a 'a.

² Yujto a Jehová caw 'ay cot yowl 'a jun tzo'n̈ xo nacion̈, yet' 'a smasnil eb' soldado. Tox 'ix snalb'ej satn 'el eb', ax scham eb' smasnil.

³ 'Oj 'actxoc can b'uln eb' chamnc cha, til wal stul 'oj 'ec' sjab' jun tzo'n̈ niwnal cha, 'icha wal sb'ey eb' a a', 'ixta 'oj b'ey chic' 'a eb' lum jolmctac witz.

⁴ Smasnil c'anal 'ay 'a satcha'an̈, 'oj tzicb'tan̈x 'a yet'ul, ax satcha'an̈, 'oj chulxocb'e'n 'icha junc ch'an̈ u'un̈. 'Oj cot smasnil c'anal, lajn 'oj 'aj eb' yem 'icha tz'aj stacj 'el xil te uva, tzpuc 'ejm 'a yich, mto 'icha tz'aj yem sat te 'awb'ente 'a yich.

⁵ A 'a satcha'an̈ ata 'oj sch'ox cot Jehová yespada, ax 'a yib'n̈ Edom 'oj 'emoc, yujto a jun chon̈b' cha, tox 'ix 'ajx 'och chaml 'a yib'an̈.

⁶ Chi'ctac 'oj 'aj yespada Jehová, xeputac pax 'oj 'ajoc, 'icha tzyac' q'uen cuchlub' yic tzmilx no quelm calnelu yet' no chiwo xajmb'alil. A 'a lum Bosra 'oj sb'o Jehová junc xajmb'al, caw niwn eb' 'aj Edom 'oj chamoc.

⁷ A eb' syajlil eb', caw wal 'ay smay eb' 'icha no simron wacax, no quelm wacax, yet' no mam wacx caw ow; palta junn̈j 'oj 'aj eb' scham yet' eb' comn 'anma'. Caw 'oj macchjoc 'el sat slum eb' yet' schiq'uil, 'oj 'atcn xepual eb' 'a scal spoccal lum lu'um.

⁸ Atn wal 'a jun c'ul chi 'oj yac' Jehová spac 'a eb' 'aj Edom. A 'a jun ab'il chi 'oj yi'cn 'el yowl sc'ojl yuj tas x'aj chon̈b' Sión yuj eb'.

⁹ A smasnil a a tzb'ey 'a lum ch'olctac 'a yol yic Edom cha, 'oj 'ochcn a asfaltoal, ax lum pococ, oj 'ochcn lum azufreal; a lum lum cha, 'oj n̈ilchjoc chan̈ sc'a'l lu'um.

¹⁰ Sc'ual yac'wlil sn̈ilchj sc'aq'uil, 'oj q'uen̈j wan stab'l 'a smasnil tiempo, 'oj 'actxoc can 'a jun 'ejmn̈ej; man̈x 'a b'a'n̈ 'ay junc mach 'oj 'ec' ta'.

¹¹ Ata 'oj 'aj cajn no cujub', no chulpop, no joj, yet' no tucul, ata 'oj sb'o e no so'. Cusltac 'oj 'ajcn jun chon̈b' chi yuj Dios.

¹² Man̈x 'a b'a'n̈ 'oj 'och junc xo rey yic tzya'n yajlil 'a yib'n̈ jun chon̈b' cha; smasnil eb' yajal, 'oj satcn 'el eb'.

¹³ Axn̈ej te q'uix 'oj pa' chan̈ 'a sdespacho eb'. A te sac q'uix 'oj pa' chan̈ 'a yol scuartel eb'. Axn̈ej no 'ocs 'oj 'aj cajn ta', yet' no avestruz.

¹⁴ Ata junn̈j 'oj 'aj no wax yet' no 'oques, ax smol 'at e no say wa sb'a. Ata 'oj can cajn no calte'al chiwo, ax yawtn sb'a e no ta'. Ata 'oj 'aj cajn jun tzo'n̈ tas tzxib'tw 'a 'ac'wal, ata 'ay yet'l eb' 'aj 'oj 'iljoc.

¹⁵ Ata 'oj sb'o no cujb' so', ata 'oj yac' no sn̈olob', ax sman̈n 'elt no yune chi ta', ax stan̈wni sb'a no'. Ata 'oj smolb'tzoc pax sb'a no c'uc'um, mojnn̈ej 'oj 'aj junjn c'aj no', jun no smam jun pax no snun.

¹⁶ Sayc eyil 'a ch'an̈ libro yic Jehová, 'awtjec ch'an̈ 'aj tzyal 'ixtic: A smasnil no noc' tzb'inax tic, may junc no man̈ 'ayc 'ec' ta', may junc no to may no snun 'ayc' yet'oc, yujto a Jehová 'ix nani, to 'ixta 'oj 'aj smolb'tzan sb'a e no yuj Yespíritu Dios.

¹⁷ Junjn no', checl yaj yet'l no', a Dios ch'oxjnac yet'l no 'aj tz'aji, ata 'oj 'aj cajn no 'a jun 'ejmn̈ej, xchi.