Is 31 - Chuj San Sebastian Bible

Eb' tzsayn 'ec' scolwal Egipto

¹ 'Oltac wal ex tz'at e sayc' scolwal Egipto. A eb' soldado yet' schej, yet' scaruaje to caw niwn sb'isul, a chi tzeya'ch yipc e c'ojol, palta matz ex q'ue q'ueln jac 'a Jehová, atn jun Dios To Cojxni.

² A Dios caw jeln paxi, tztac' ya'n cot yailal 'a eyib'n̈ yuj tas maysch'olnil tze b'o'o. Matz 'ec' tas tzyalcn 'el 'a eyib'an̈, yet' 'a eb' cob' tzcolwj eyet'oc.

³ A eb' 'aj Egipto 'anman̈ej eb', man̈ diosoc eb', ax schej eb' caw chib'jn̈ej, man̈ espírituoc. A yic tzya'n 'och Jehová eyailal, yajn̈ej tzex 'em yet' eb' cob' tzex coln cha; junn̈j 'oj eyaj e cham yet' eb'.

⁴ A Jehová a 'ix aln 'ayn 'ixtic: 'Icha wal yel yaw junc no 'ichm león tztan̈wj schib'ej, wach'xam niwn eb' 'ilm calnelu tzyoy sb'a 'a no', wach'xam jantc yel yaw eb' xib'tn cob' no', toc tzxiw no yuj eb'. 'Ixta wal 'oj wutc in tan̈wni eb' in chon̈ab', yic 'oj wul wa'nc owl 'a lum tzaln Sión.

⁵ 'Icha wal tzyutj no ch'ic stan̈wni yune 'a yol so', tz'ec' jen̈n̈oc no 'a yib'an̈. 'Ixta wal 'oj wutc in tan̈wni chon̈b' Jerusalén, an Jehová in, an 'oj in tan̈woc, 'oj in colo', xchi Dios.

⁶ Ex yin̈tl can Israel, meltzjan̈c 'a jun mach 'ajtil caw tenmtac xeyutj e b'a.

⁷ Yujto 'ay jun c'ul 'oj jawoc, e masnil ax tic, c'uxn 'oj e jul-l jun tzo'n̈ yechel, atn jun tzo'n̈ b'ob'il yet' plata yet' oro, caw 'ochnc e mul e b'on jun tzo'n̈ cha.

⁸ 'Oj 'ejmc Asiria yuj q'uen espada, palta man̈ 'anmac 'oj utnc 'ixta yet' sjelnal. A jun owl chi 'oj pechnc 'at eb' 'anma 'a jun chon̈b' chi 'eloc, ax eb' quelmtac, 'oj 'ochcn eb' mosoal.

⁹ Yuj wal jun xiwlal cha, ax s'at win rey yet' eb' scapitan̈il eb' soldado 'eloc, ax yactn can eb' sbandera. A Jehová a tzaln jun tic, atn jun 'ay yic jun yet'l xajmb'al 'aych sc'a'l 'a tzaln Sión, a sc'a'l yowl sc'ojol, caw tzn̈ilchj 'a Jerusalén, yic tzya'n 'och yailal 'a eb' 'ajc'ojl yajch 'a 'a.