Is 3 - Chuj San Sebastian Bible

A yailal 'oj jawc 'a yib'n̈ Judá

¹ A ticnec, a Jehová tztac' yuj smasnil jab'xoj wal 'oj yi'l eb' 'anma to yipc'ojlal cob' yaj 'a Jerusalén tic, yet' pax 'a Judá, atn eb' tzwul 'a'nc can smasnil tas tzc'uxxi, yet' eb' tzwul 'a'nc can a a'.

² 'Oj yi'l pax Jehová eb' yajl yaj 'a eb' soldado, yet' eb' soldado caw jeln 'a owal, eb' juez, eb' schecb' Dios, eb' 'a'm nab'en yet' eb' yichm wincal chon̈ab',

³ yet' eb' capitan̈ yaj 'a junjn 50 eb' soldado, eb' niwn yel'chi, eb' 'a'm nab'en, eb' jeln sb'on junc tas yet' eb' tznan 'el paxti'.

⁴ Ax eb' quelmtac 'unin, a eb' 'oj 'och yajlil 'a e cal; a eb' 'oj eya'n mandar.

⁵ Ax eb' 'anma', 'oj q'ue b'uynjoc eb' yac' owal, 'oj laj yac' eb' owl yet' eb' cajn 'a stz'ey. Ax eb' quelmtac, 'oj yac' eb' owl yet' eb' 'ichmtac winc to 'ay yel'ch 'a sat eb' 'anma'.

⁶ A 'a jun tiempoal cha, ata 'oj yal junc mach 'ixtc 'a junc yican sb'a yet' smam: Ach tic, caw wach' ec' yet' a pichul, smoj wal tzach 'och qui yajloc, wach' cab' tzac' yajlil 'a yib'n̈ jun chon̈b' mac'b'il can 'ejm tic, 'oj schioc.

⁷ Ax win cha, 'oj yal win 'ixtic: Matz tac' in chan 'och jun 'opiso chi 'a wib'an̈, yujto may tas tzin c'ux 'a watut, may pax in pichl wach' wa'n 'ochi. Man̈ eya'ch jun 'opiso chi 'a wib'an̈, 'oj schic winac.

⁸ Man̈x 'a swach'l yilx Jerusalén, ax Judá 'oj sat 'ejmi, yujto a tas tzyal eb' 'anma', yet' tas tz'el sb'on eb', a chi tz'och 'ajc'ojlal 'a Jehová. Atn jun tzo'n̈ chi tzuntzn cot yowal.

⁹ A sat eb' 'anma chi tzch'oxn 'eli to b'an̈quintac eb', tzch'oxn 'el eb' to 'ay smul eb' 'icha eb' 'aj Sodoma, toc tzq'uixw eb' sb'on 'a sat 'anma'. 'Oltac wal eb', mun wal tzyij cot eb' yailal 'a yib'an̈.

¹⁰ Al yab' eb' 'anma wach' snab'en, to caw wach' yic eb', yujto 'oj tzaljoc eb' yiln 'och spac tas tzb'o'o.

¹¹ 'Oltac wal eb' 'anma tu snab'en, a maysch'olnil 'oj scha sb'a eb' yet'oc, a tas sb'ojnac eb', a chi 'oj 'ajxoc spacc 'a eb'.

¹² A eb' quelmtac winac a eb' tz'ixtn eb' wit chon̈ab', ax eb' 'ix 'ix, a eb' 'ix tzyac' yajlil 'a yib'n̈ eb'. Ex wit chon̈ab', a eb' tzex jucb'tzani, a eb' tzex 'ixtn paxti', tzex yij 'at eb' 'a b'eyb'al man̈ tojloc.

¹³ A Jehová 'ayc' 'a sdespacho yic tzb'eyc'ojlan eb' schon̈ab', lista yaj ya'n syailal eb'.

¹⁴ Ata 'oj sb'eyc'ojloc Jehová eb' yichm wincal chon̈ab' yet' eb' 'aych yajlil 'a scal eb', ax yaln 'a eb' 'ixtic: An Jehová in tztac' wuj smasnil, an tzwala: Ax am wal tic xe satl eb' in chon̈ab', 'icha 'awb'en uva, 'ixta yaj eb' 'ayin. Xeyelc'n tas 'ay 'a eb' meb'a', xlaj e c'ub'n 'el 'a yol eyatut.

¹⁵ ¿Tas eyaln eyic eyixtn eb' in chon̈b' tic, tzex q'ue chan̈ eyixtn pax eb' meb'a'? xchi Dios.

Yailal 'a yib'n̈ eb' 'ix 'aj Jerusalén

¹⁶ An̈jtona xyaln pax Jehová 'ixtic: A eb' 'ix 'ix 'aj Sión, caw wal b'an̈quintac eb' 'ix, tzlaj jetz'mj eb' yic tzlaj 'ec' eb', toc 'ayt sq'uixwel sat eb', tzlaj nitz nitzn eb' ya'n chan̈al yic tzb'ey eb', tzlaj chin̈lji jun tzo'n̈ q'uen 'aych yelwnub'loc yoc eb'.

¹⁷ Yuj ton wal cha, ax wa'n pucl xil sjolm eb' yuj yab'il, ax wa'n checljoc tas q'uixweltac yilx 'a eb', xchi Dios.

^18-23 A 'a jun c'u cha, c'uxn 'oj yi'cn 'el Dios jun tzo'n̈ tas 'aych yelwnub'loc sniwnal eb' 'ix 'ix cha: Atn jun tzo'n̈ 'aych 'a yoc eb', 'a sjolm eb' yet' 'a sjaj eb': q'uen ton̈, q'uen yumchiquin, q'uen brazalete, spotl sjolm eb', eb' q'uen cotc cadena tz'och 'a sjaj yoc eb', sjal-l snan̈l eb', sq'uenal sjolm eb', sperjuma eb', q'uen colc'ab', q'uen 'icha yumchicn tz'och 'a sn̈i eb', pichl caw wach' yilxi, spotl eb', scamx eb', spichl eb' 'ay sb'olsail, q'uen nen, pichl caw tzlab'b'i, sc'oxl sjolm eb', yet' sjal-l sjolm eb'.

²⁴ Ax sjel 'oj 'ajxoc 'a eb', atn tic: A tas caw tu sjab', a chi 'oj 'och sjelc perjuma; a lasu, a chi 'oj 'och sjelc jal-l caw wach'; ax jolm caw wach' tz'aj squichxi, 'oj pucoc; a pichl caw tzlab'b'i, a te n̈achtac 'oj 'ochcn sjeloc; ax sat eb' wach' yilxi, 'oj juwc can yilxi, tz'ib'intac 'oj 'ajcni.

²⁵ A yichmil eb' 'ix 'ix cha, 'oj cham eb' 'a owal, 'oj satl eb' winc caw jeln cha.

²⁶ Ax smasnil eb' 'aj Jerusalén, 'oj 'oc' eb' yuj scusc'ojlal, yujto sch'ocxoj eb' 'oj canoc.