Is 29 - Chuj San Sebastian Bible

¹ 'Oltac wal chon̈b' Jerusalén, tzcuch Yet'l Xajmb'al Yic Dios, 'aj 'e'nc cajn David. 'A junjn ab'il tznan jun tzo'n̈ q'uin̈ tz'eq'ui.

² 'Oj ya'ch Dios eb' 'anma cajn 'a chon̈b' chi 'a b'ilc'ojlal, 'a cusc'ojlal. 'Oj laj c'acljoc eb' yab'n syail. A jun chon̈b' cha, 'icha wal yet'l xajmb'al, 'ixta 'oj 'ajcn 'a sat Dios.

³ 'Oj schecb't Dios eb' soldado yic tz'at yoync 'och sb'a eb' 'a Jerusalén, ax sb'on chan̈ eb' junc muro 'oj 'och oyn 'a spatquil 'eli, ax sb'on pax 'och eb' sb'achte'al, sec tztac' ya'n eb' owl 'a jun chon̈b' cha.

⁴ Caw 'oj 'ijxoc 'ejm Jerusalén, 'icha to 'oj can t'ocn 'a sat lu'um, ax 'a sat lum chi 'oj paxtinc cha'an̈, toxn̈ej 'oj wulwnoc spaxtin 'a scal pococ, axn̈ej 'a yol lum 'oj paxtinc q'ueta, 'icha junc mach tzpaxtin yet' spixn junc chamnc 'anma'.

^5-6 Ax 'oj 'ajoc, a Jehová tztac' yuj smasnil, wal 'a yajn̈ej ax sjaw yet' yowl sc'ojol yic tzya'n 'och yailal 'a yib'n̈ eb' 'ajc'ojl yajch 'a Jerusalén. 'Oj c'an̈ c'u, ax yec' niwc quixcab'. 'Oj jawc niwc chacxuxm'ic', niwc yaxn̈ab', yet' junc niwquil c'ac' 'et'jnac chamel. A eb' 'ajc'ojl cha, man̈x yalnb'ilc sb'isl eb'. Lajn xoj 'oj 'ajcn eb' 'icha pococ. Caw choc' 'oj 'ajcn eb' 'a'm owl cha. 'Oj 'ijxoc 'at eb' 'icha tz'aj yijx 'at solcal 'ixm trigo yuj 'ic'.

⁷ Smasnil jun tzo'n̈ chon̈b' man̈x yalnb'ilc sb'isl cha, atn eb' tzyac' owl yet' jun chon̈b' tzcuch Yet'l Xajmb'al. 'Oj 'och oyn eb' 'a 'a, yic tzma'n lan̈chjoc eb' smuroal snani. A eb' cha, lajn 'oj 'aj eb' 'icha junc mach 'ay swejel yic tzwaycni.

⁸ A 'a 'ac'wl cha, tzwaychej swa'i, ax tz'el swayn̈ 'a jun rato cha, caw 'ayt swejel. Lajn pax 'icha junc mach tzcot stacn̈til 'a 'ac'wal, tzwaychej yu'n tas tzyuq'uej, ax tz'el swayn̈ cha, caw 'ayt stacn̈ti'al, tacn̈tzuynac yol sjaj. 'Icha jun 'anma cha, 'ixta 'oj 'aj smasnil jun tzo'n̈ chon̈b' chi 'oj yac' owl 'a tzaln Sión.

⁹ Ex 'aj Jerusalén, b'eyn̈ecn̈ej yet' e man̈ nab'enal, b'eyn̈ecn̈ej 'a 'icha to matz uj eyiln xon jab'oc. 'E'n̈ecn̈ej tectnoc 'icha junc 'u'm 'an̈, wach'xam man̈ ex 'u'moc 'an̈.

¹⁰ Yujto a Jehová, a 'ix a'n cot jun 'icha niwquil wayn̈ 'a eyib'an̈. Ax eb' schecb' Dios, a eb' tz'ilni tas tzjaw 'a eyib'an̈, palta 'ix smac Dios sat eb' schecb' cha, 'icha junc mach tzmacx sat yet' junc nip.

¹¹ Yuj cha, a smasnil spaxti eb' schecb' Dios, lajn 'oj 'ajcn 'ayx 'icha junc tas tz'ib'b'il 'a junc ch'an̈ un̈ chulb'ilb'ec'an, 'aych can pax seyo 'a 'a. Toto tz'ajx ch'an̈ 'a junc mach tztac' yiln u'un̈, tzalx 'a 'ixtic: 'Awtj jun un̈ tic, toto xchi jun cha; tzta'w junx chi 'a 'ixtic: Matz tac' wilni, yujto 'aych seyoal, xchi.

¹² Toto tz'ajx pax ch'an̈ 'a junc mach matz tac' yiln u'un̈, tzalx 'a 'ixtic: 'Awtj jun un̈ tic, toto xchi; tzyaln junx chi 'a 'ixtic: Matz tac' wiln u'un̈, xchi.

¹³ Atn yuj cha, xyaln Jehová 'ayn 'ixtic: A eb' 'anma tic, tzcob' yal eb' to tzin yac' servil eb', tzyaln cob' eb' to 'ay wel'ch 'a sat eb', palta ax snab'en eb' caw najt yajl 'ayin. Tzcob' yal sb'a eb' 'ayn yalni, palta cojn jun tzo'n̈ checnb'il tzlaj spitzchan̈ eb' 'anma', a chi tzyac' eb' cuyxoc.

¹⁴ Yuj cha, a jun tzo'n̈ milagro satjub'tac yilxi, a chi 'oj in b'o 'a jun chon̈b' tic, 'oj sat sc'ojl eb' yilni. A sjelnal eb' jelan, yet' snab'en eb' 'ay snab'en, 'oj satcn 'eli, xchi Dios.

¹⁵ 'Oltac wal eb' tzc'ub'j 'el cob' sb'a 'a sat Jehová snani, tzc'ub'n 'el eb' tas tzna'a, c'ultacl tzb'o eb' maysch'olnil, tzyaln eb' 'ixtic: May mach tzon̈ 'ilni, may mach 'oj 'ojcanc 'eli, xchi cob' eb'.

¹⁶ Palta ax tic, jelp tzeyutej. ¿Toc wal lajn lum tz'acb'il lum yet' mach tz'acjnac? ¿Tom 'oj stac' yaln lum 'a jun tz'acjnac chi 'ixtic: Man̈oc ach tz'acjnac in, tom xchi lum 'a 'a? Mto tzyal lum 'ixtic: Ach tic man̈ ojcoc tas tza b'o'o, toc xchi lum 'a 'a.

Alb'il cani to 'oj colxoc 'el israel

¹⁷ Jab'xoj wal tiempo ax yoch eb' lum yaxc'ultc yic Líbano 'awlanb'il, ax eb' lum 'awlanb' cha, 'oj 'ochx can eb' lum yaxc'ultcal.

¹⁸ A 'a jun c'ul cha, a eb' matz uj yab'ni, 'oj yab' eb' yawtx junc un̈ 'a stz'ey, ax eb' matz uj yilni, 'oj stac' yiln eb', 'icha to tz'ijx 'elt eb' 'a scal q'uic'q'uinal.

¹⁹ A eb' 'emmquilal yeq'ui, 'oj tzaljoc chan̈ eb' 'a Jehová, ax eb' caw meb'a', 'oj tzaljoc chan̈ eb' 'a sDiosal Israel, atn jun Dios To Cojxni.

²⁰ A eb' may yel'ch yit 'anmal 'a sat, 'oj lajwc 'ejm eb'. Ax eb' ch'an tzyutj sb'a, man̈x 'a junc eb' 'oj can 'a pitznal. A eb' cojn maysch'olnil tzna'a, 'oj satl eb' smasnil,

²¹ atn eb' tzpitzn chan̈ 'es 'a yib'n̈ yit 'anma'il, eb' tztenn 'och wan win juez, sec matz 'och yailal 'a yib'n̈ eb' maysch'olnil. Tzya'n eb' 'es, sec man̈ tojloc tz'aj sb'oyaj eb' wach' snab'en.

²² Yuj cha, a Jehová sDiosal Israel, atn jun coljnac 'el Abraham, a tzaln 'ixtic: Ex yin̈tl Jacob, a ticnec yet' 'a yic b'aq'uin̈, man̈x 'a 'aj 'oj e q'uixw 'eli, man̈x 'a 'aj 'oj chacb'oc 'el e sat yuj q'uixwelal.

²³ Yujto a yic 'oj eyiln sniwtj eb' eyin̈til, 'oj eyal wach' paxti 'ayin, ax eyi'n chan̈ in b'i, to Cojxn In Ton Dios In.

²⁴ A eb' matz nachj 'el yu'uj, 'oj cuychjoc 'el jelnal yuj eb', ax eb' b'uchwjum, 'oj scha eb' yab' in cuynb'il, xchi Dios.