Is 28 - Chuj San Sebastian Bible

Yab'xil chon̈b' Samaria

¹ 'Oltac wal Samaria, niwquil chon̈b' yaj 'a sat eb' 'u'm 'an̈ 'a yol yic Efraín, yelwnub'l jun niwn 'a'lic caw wach' yilx 'a Samaria cha. Ax ticnec, lajn xoj 'icha junc corona cob' nichtetac yilxi, palta tacn̈ xo, yujto a jun chon̈b'al eb' 'anma tic to cojn 'u'l 'an̈ tzc'an eb' yila'.

² 'Ay jun winc sic'b'il 'el yuj Jehová, a jun cha caw wal 'ay yip, caw jeln 'a owal. 'Oj jawc yet' yip 'icha tz'aj sjaw yaxn̈ab' yet' sacb'atil, 'icha pax tz'aj sjaw chacxuxm'ic' yic tzyutz'n telwc smasnil tas, 'icha pax yic tzya'n yowl a b'eymal a sb'eyi. Yuj wal yip cha, ax slan̈chj can 'ejm Samaria smasnil.

³ A jun chon̈b' caw wal tzb'an̈ eb' 'u'm 'an̈ 'ay 'a yol yic Efraín, 'oj te'xoc can 'ejm yuj jun winc to caw wal 'ay yip cha.

⁴ A jun chon̈b' 'ay 'a pan̈n caw wach' yilx cha, lajn yaj 'icha junc tacn̈ corona 'oj satxoc 'eli. Lajn 'oj 'aj 'icha sat te higo tzb'ab'l 'el-li, yajn̈ej tzlox yuj junc mach tz'ilni.

⁵ A 'a yic jun c'ul cha, a Jehová tztac' yuj smasnil, 'icha junc corona caw wach' yilxi, 'ixta 'oj 'aj 'a jaywn̈ocx eb' schon̈b' 'oj can cha, 'icha wal tzyutj sb'an̈n sb'a junc mach yet' scorona, 'ixta 'oj 'aj 'a eb'.

⁶ A 'oj 'a'nc sna eb' juez yic tzb'eyc'ojlwi eb' 'a stojlal, 'oj yac' yip eb' soldado yic tztan̈wni eb' schon̈ab'.

A tas alb'il 'el 'a yib'n̈ Jerusalén

⁷ An̈jtona', 'ay jun tzo'n̈ xo eb' 'anma tztectn 'ec' yuj te 'an̈ cha, tzlaj sicb' 'el eb' yuj yowl te'; atn eb' ya'mal 'och sti eb' 'anma', yet' eb' tzyalch sb'a schecb'oc Dios. A yic 'u'm 'an̈ eb' cha, caw wal tzsomchj snab'en eb', yuj cha man̈xtzac tznachj 'el yuj eb' tas tzyal Dios, man̈ wach'c tzyutj eb' sb'on yaj eb' 'anma'.

⁸ Smasnil mexa, b'ut'jnac 'el sat yuj xej eb', caw tu sjab'.

⁹ Tzyaln eb' wuj 'ixtic: ¿Mach laj tznib'j jun winc tic scuyu'? ¿Am eb' 'unn tzat 'el 'a yim?

¹⁰ ¿Tom an̈ tic 'oj on̈ scuyu'? 'in junn̈j cuynb'ilal tzyala, junn̈j b'eyb'al tzyala, junn̈j checnb'il tzyala, xchi eb'.

¹¹ Yuj cha, toto matz nib'j eb' yab' tas tzwala, a yet' chuc til 'oj yac' Dios alxoc 'a eb', chuc chon̈b'al junc 'anma 'oj yac' paxtinc 'a jun chon̈b' tic.

¹² Atn 'a eb' tic yaljnac can Dios 'ixtic: Yaj 'iljelal 'a tic, a mach c'unb'nac, 'iljan̈ec, 'a'c sicb' e c'ojl 'a tic, xchi 'a eb'. Palta ma'ix schaj eb' yab'i'.

¹³ Yuj cha, a spaxti Jehová 'a eb' chuc chon̈b'al, 'ay eb' 'oj alnoc yu'uj, to 'icha spaxti eb' cotc 'unin, 'ixta yaj jun tzo'n̈ cuynb'il chi 'a eb', junn̈j tas tzyala, junn̈j b'eyb'al tzyala, junn̈j pax checnb'ilal tzyala. Yuj cha, a 'oj 'a'nc telwc eb', 'oj lajwc eb', ax syamchj eb' yuj 'icha junc ya'al.

Eb' tzcol sb'a 'a tas man̈ yeloc

¹⁴ Ex yajl eyaj 'a Jerusalén, caw wal b'uchmtac ex, 'ab'c wal spaxti Jehová.

¹⁵ Yujto eyaljnac ab' 'ixtic: 'Ay jun qui trato qui b'ojnac yet' syajlil chamel, a yic 'oj jawc jun tas tzon̈ satn 'eli, ma'oj jawc jun chi 'ayn̈ec, yujto xca' qui trato yet' chamel, to a 'es yet' tas man̈ yeloc a tzon̈ colnec, xe chi.

¹⁶ Yuj cha, tzyaln Jehová 'ixtic: An 'oj wa'cn 'och jun mach yipnub'alc 'a Sión, lajn jun chi 'icha junc q'ue'en. A jun cha to niwn yel'chi, sic'b'il 'el wu'uj yic tz'och 'a schicn n̈a. May b'an̈ 'oj satl jun yich 'aycn 'ejm cha. A eb' tzya'ch jun mach chi yipc sc'ojol, may b'a'n̈ 'oj somchjoc eb'.

¹⁷ 'Ixtc 'oj wutc in b'on jun 'icha n̈a cha, a 'in tojlal 'oj wa'lb'oc 'a 'a, 'icha tz'aj sc'anx q'uen plomo mto nivel, xchi. A 'a 'es yet' 'a tas man̈ yeloc, ata xe say e colnb'il, palta a q'uen sacb'at a q'uen 'oj satnc 'eli; ax jun 'icha 'elmal a', a 'oj satnc 'el jun eyet'l 'aj tze col cob' e b'a cha.

¹⁸ A e trato xe b'o yet' syajlil chamel, 'oj sat 'ejmi, 'oj jawc chaml 'a eyib'an̈, ax e cancn 'a yaln̈ yu'uj.

¹⁹ A yic 'oj jawc 'a junjn 'ejem, 'oj e jucx b'ey yu'uj, 'oj jawc 'ayx 'a junjn sq'uin̈b'ial. Sc'ual yac'wlil 'oj eyib'x can chan̈ yu'uj, yic 'oj eyab'nc yab'xil.

²⁰ Lajn 'oj eyajcn 'icha mach tzway 'a sat junc ch'at yune ste'il, matz tac' sjiln 'at yoc 'a sat; yet' junc c'u yune sat, matz tac' spichn 'och 'a 'a.

²¹ 'Icha wal xyutj Jehová ya'n owl 'a lum jolm witz Perazim yet' 'a lum pan̈n 'a'lic yic Gabaón, 'ixta 'oj yutc sb'a. Wach'xam matz nib'ej, palta 'oj yac' satxoc 'el schon̈ab'.

²² A ticnec 'an, man̈x ex b'uchwjoc, sec wach' ma'oj niwtjoc yailal 'a eyib'an̈. 'Ix wab' tas 'ix yal Jehová tztac' yuj smasnil, tox 'ix sna'a to 'oj yac' lajwc smasnil tas 'ay 'a yol smacb'en jun nacion̈ tic.

A tas tz'aj sb'o munljel

²³ Macljec eyab' tas 'oj wala', tzcham wal e nani tas jun tzo'n̈ 'oj wal tic.

²⁴ A yic tzb'on junc munljum winc 'aj tz'awi, man̈ cojnoc t'ocj lum tzc'an sb'o', mto stojlb'tzan sat slum chi yet' q'uen rastrillo.

²⁵ Cojn yic tztojlb'i sat lum yu'uj, tzyamn 'och yawn te eneldo, te comino; tzlajw cha, jit'mtac tzyutj yawn 'ixm trigo. Ax 'a stitc 'aj tz'el'ch cha, ata tzyawj 'ixm cebada yet' te centeno.

²⁶ A Dios tzch'oxni, tas tz'aj sb'o junjn c'aj munljel.

²⁷ A te eneldo cha, matz te'x 'el sat te', matz tac' yec' pax junc careta 'a yib'n̈ te comino, palta ton̈j tztenx 'el te eneldo chi yet' junc te', ax te comino cha, ton̈j tzma'x 'el yet' junc jixc'ab'te'.

²⁸ A 'ixm trigo tzte'xi, tztac' yec' junc careta 'a yib'n̈ 'ixim, palta toto 'elnc xo 'ixm sat cha, 'an̈ja yec' jun careta chi 'a yib'an̈, to 'ixta', tzpoj 'ixm sat cha.

²⁹ An̈jtona', 'ixta pax jun tzo'n̈ jelnal tic, ata tzcot 'a Jehová tztac' yuj smasnil, caw wal satjub'tac yilx smasnil tas nab'il yu'uj, tzya'n 'el'choc yet' sjelnal.