Is 24 - Chuj San Sebastian Bible

A yailal 'a yib'n̈ lum lu'um

¹ A Jehová a 'ix aln 'ixtic: 'Iltec, an 'oj in mes sat lum lum tic, caw 'oj cancn jitn lum wu'uj, ax in chuln b'e'n lu'um, 'oj sactzic can 'at eb' cajn 'a sat lum wu'uj.

² A eb' ya'mal 'och sti eb' 'anma', lajn xoj 'oj 'ajcn eb' 'icha eb' comn 'anma'. Ax ewin patron̈, lajn 'oj 'ajcn eb' 'icha ewin moso, 'ixta pax eb' 'ix patron̈, lajn 'oj 'ajcn eb' 'ix 'icha eb' 'ix ya'mal servil. Ax eb' tzmanwji, lajn 'oj 'ajcn eb' 'icha eb' tzchon̈wji; lajnxoj 'oj 'ajcn eb' tz'a'n b'ocl junc tas 'icha eb' tz'och b'oquil.

³ 'Oj cancn jitn lum lum tic, yujto 'oj 'ijxoc 'at smasnil tas 'ay 'a lu'um, xchi.

⁴ A lum lum tic, caw 'oj tacjoc lu'um, man̈x wach'c yilx 'oj 'ajoc, smasnil yolyib'n̈q'uinl tic 'oj tacjoc 'eli, smasnil eb' niwc winac, caw 'oj cus chan̈ eb'.

⁵ Caw wal xjuw 'el lum lum tic yuj eb' cajn 'a 'a, yujto matz yiclj eb' 'icha tzyal ley, matz yiclj eb' jun tzo'n̈ checnb'il, caw xyixtj 'el eb' jun trato b'ob'il 'a jun 'ejmn̈ej.

⁶ Yuj wal cha, 'ix cotcn catb' 'a yib'n̈ lum lum tic, ax eb' cajn 'a sat lu'um, wan yab'n eb' syail, wan yemt sb'isl eb', jaywn̈ xoj eb' 'ayq'ui.

⁷ Man̈x 'a yal uva tzlaj b'o'i, xlaj sat 'ejmi, yujto xlaj 'och syab'il te snun uva cha. A eb' 'anma to tzaljc'ojlal yaji, ax ticnec cusc'ojlal xo yaj eb'.

⁸ Man̈x 'a q'uin̈ 'a 'aj tzlaj c'an̈ tinab', yet' arpa, caw man̈x 'a stzaljc'ojlal eb' tzsonn yet' jun tzo'n̈ yamc'ab' cha.

⁹ Man̈x 'a son, man̈x 'a b'it 'oj laj 'ochi yic ay 'u'l 'an̈, yujto a te 'an̈ cha, caw c'a xo yu'x te tzyab' eb' tzlaj 'u'n xon 'an̈.

¹⁰ A jun chon̈b' tenmtac cha, caw choc' x'aj slan̈chj 'ejmi, man̈x 'a n̈a 'aj tztac' yoch junc mach.

¹¹ A eb' 'anma', caw tz'oc' eb' 'a yoltc caye, yujto man̈x 'a yal uva. 'Ix lajw 'ejm smasnil tzaljc'ojlal, 'ix 'ochcn cusc'ojlal 'a sat lum lum tic.

¹² A jun chon̈b' 'ix 'ixtx 'el cha, tox xlaj poj spuertail.

¹³ 'Ixtan̈ej 'oj 'aj 'a smasnil nacion̈ 'ay 'a sat lum lum tic; jaywn̈xoj 'anma 'oj canoc. 'Icha wal xoj tz'ajcn junjnoc sat te olivo mto sat te uva yic tox 'ix 'ec' ch'inxoc sat te 'a scha'ejmal, 'ixta 'oj 'ajcn eb' 'anma cha.

¹⁴ A eb' 'oj can cha, caw 'oj ya'l eb' yaw yuj tzaljc'ojlal, ax sb'itnan eb' swach'c'ojlal Jehová, 'oj 'ab'xoc sjaj eb' 'a stojlal 'aj tz'em c'u.

¹⁵ An̈jtona yet' pax 'a stojlal 'aj tzq'uel c'u, yet' 'a jun tzo'n̈ nacion̈ 'ay 'a sti a mar, 'oj yal eb' wach' paxti 'a Jehová sDiosal Israel.

¹⁶ Caw 'oj 'ab'xoc sb'itn eb' 'a 'aj tzlajw c'och sti lum lu'um, yuj yijx chan̈ sb'i Dios, jun caw tojl snab'en. Palta xwaln 'ixtic: 'Oltacn wali, caw wan in lajw 'el tzwab'i. A eb' tu snab'en cha, caw tu tas tzb'o eb'.

¹⁷ A wal eb' cajn 'a sat lum lum tic, caw lajn 'oj 'aj eb' 'icha no noc' pechb'il yuj eb' pechm noc', 'ay smay tz'atcn no 'a yol junc xab', mto tzcan 'a junc ch'an̈ ya'al.

¹⁸ A mach tzyac' ganar yelcn 'a yol sc'ab' eb' tzpechn b'eyc'oc, ax 'a yol junc xab' tz'atcni. Toto tzyac' ganar sq'uepaxt 'a yol junc xab' cha, ax 'a junc ch'an̈ yal 'aj tzcanxi. 'Oj cot junc niwquil owl yaxn̈ab' 'a satcha'an̈, caw 'oj 'ib'xoc stzatzl yich lum lum tic yu'uj.

¹⁹ Yel xo wal caw 'oj 'ib'xoc lum lum tic si'mb'il, 'oj tzicb'tan̈xoc, caw choc' 'oj 'ajcn lu'um.

²⁰ 'Oj 'ec' ch'umch'noc lum 'icha junc 'u'm 'an̈. 'Oj 'ib'xoc lum 'icha junc pat tz'ib'x yuj 'ic'. Yujto a smul eb' 'anma', caw 'ec'b'al xo 'a yib'n̈ lu'um, yuj cha, 'oj telwc can 'ejmi, man̈x 'a b'a'n̈ 'oj q'uex wa'an.

²¹ A 'a yic jun c'ul cha, a Jehová a 'oj 'a'nc 'och yailal 'a yib'n̈ eb' demonio tz'ec' 'a scal 'ic', yet' 'a yib'n̈ eb' rey 'a sat lum lum tic.

²² 'Oj molb'tzaxc eb', ax yajx can 'ejm eb' 'a yol junc xab' olan, 'icha to tz'atcn eb' preso. Niwn tiempo 'oj macxoc 'ejm eb' ta', 'oj lajwc cha, ax yajx 'och syailal eb' b'i'an.

²³ A 'a jun c'ul cha, 'oj 'och q'uic'q'uinl 'a c'u yet' 'a 'uj, ax Jehová tztac' yuj smasnil, 'oj 'och Reyl 'a lum tzaln Sión 'a Jerusalén, ax sch'oxn stzictznil 'a sat eb' yichm wincal schon̈ab'.