Is 23 - Chuj San Sebastian Bible

A tas alb'il 'el*r* 'a yib'n̈ Tiro yet' Sidón

¹ Alb'il can 'el jun tzo'n̈ paxti tic 'ixtc 'a yib'n̈ Tiro: Ex 'i'mb'ey barco yic Tarsis, 'el cab' eyaw yuj somc'ojlal, yujto 'ix lan̈chj 'ejm chon̈b' Tiro, man̈x 'a xon junc n̈a xcani, man̈x 'a 'aj wach' spixx can te barco. A yic ex jaw 'a Chipre, 'ix eyab'n speclal jun cha.

² Ex cajn ex 'a sti a mar yet' ex chon̈wjum 'a Sidón, sictac ex 'ajcni. A 'a yic yalan̈, xlaj e checb't eb' e manwjum 'a sc'axpil 'ec' a mar.

³ Tzc'och eb' e manwjum chi 'a Sihor, tzmann eb' 'ixm trigo ta', atn 'ixm tz'el 'a sti a Nilo, tzlajw cha, tzchon̈n 'at eb' 'a jun tzo'n̈ xo nacion̈, atn ta tzeyij tas tzeyac' ganar.

⁴ Q'uixwan̈c ex 'aj Sidón, ex to b'inab'il e chon̈b' 'a sti' a mar yuj e jelnal. 'Oj e q'uixw 'el 'icha junc 'ix 'ix may xon yune'.

⁵ A wal yic 'oj c'och yab'xil jun tic 'a Egipto, caw 'oj 'och eb' 'anma 'a somc'ojlal yuj tas 'ix 'uj 'a Tiro.

⁶ 'El cab' eyaw yuj cusc'ojlal ex cajn 'ec' 'a sti a mar. C'axwan̈c 'ec' 'a Tarsis.

⁷ ¡'In a jun e chon̈b' tic 'ayc' xon 'a yic pecti', jun 'aj til wal xon yoch q'uin̈ yet' tzaljc'ojlal! ¡Atn jun tic 'aj til wal s'at eb' 'anma', yic tz'at sb'onc 'ejm sb'a eb' 'a jun tzo'n̈ xo chon̈b' 'a najat!

⁸ ¿Mach xnan chan̈ jun tic 'a yib'n̈ Tiro? A jun chon̈b' tic yicn̈ej eb' rey yaji, a eb' chon̈wjum caw niwc wincn̈ej eb', caw b'inab'il eb' 'a smasnil yolyib'n̈q'uinal.

⁹ A Jehová tztac' yuj smasnil, a 'ix nani, yic tz'ijx 'ejm smasnil eb' tzb'an̈ sb'a, eb' jeln tzyutj sb'a 'a sat lum tic.

¹⁰ Ex 'aj Tarsis, tox 'ix lajw can 'ejm jun puerto 'aj tzex xit'c chon̈wjoc, ax ticnec munljan̈c 'a sat e lu'um, 'icha wal tzyutj sb'a eb' 'aj Egipto.

¹¹ 'Ix ya't Jehová sc'ab' 'a yib'n̈ a mar, 'ix ya'n 'ib'xoc smasnil nacion̈, xyaln paxi to tzma'x 'ejm lan̈chjoc smasnil smuroal eb' chon̈b' 'ay 'a yol yic Canaán.

¹² Xyaln Dios 'ixtc 'a eb' 'aj Sidón: 'Actjec eya'n 'och jun tzo'n̈ e q'uin̈, yujto tox ex juw 'el 'icha junc cob's 'ix, wach'xam tzex c'axw 'ec' 'a Chipre, palta an̈jtona ma'oj eyilj xon jac ta', xchi.

¹³ 'Iltec wal x'aj lum Tiro, jun chon̈b' to an̈j 'a tic tzjaw te barco, palta ax eb' 'aj Babilonia 'ix laj b'onc chan̈ jun tzo'n̈ torre 'a spatquil 'el chon̈ab', xlaj sma'nc lan̈chjoc eb' jun tzo'n̈ niwc despacho, 'ix satn can 'el eb'. A eb' 'aj Babilonia 'ixta xmunlji, man̈oc eb' 'aj Asiria.

¹⁴ Ex ch'umn barco yic Tarsis, 'el cab' eyaw yuj cusc'ojlal, yujto tox 'ix lan̈chj 'ejm jun chon̈b' 'aych cob' yipc e c'ojol.

¹⁵ A 'a yic jun tiempoal cha, a chon̈b' Tiro 'oj 'atcn 'a satc'ojlal 'a 70 ab'il, 'icha sq'uinl junc rey. At yic 'oj lajwc 70 ab'il cha, atta 'oj jawc 'a yib'n̈ Tiro 'icha tzyal jun b'it tzb'itnax 'a jun 'ix 'ajmul 'ix, 'a 'aj tzyal 'ixtic:

¹⁶ Ach 'ajmul 'ix, man̈x 'a mach tzach nan coti, 'ij 'at a arpa, 'ixc b'eyc'oc 'a yoltc chon̈ab', caw wach' tzotj a'n 'och a son, niwn b'it tza b'itnej, toq'ue 'ayt mach tzach nan coti, xchi jun b'it cha.

¹⁷ A yic 'oj lajwc 70 ab'il cha, ax ya'n pax Jehová chon̈wjoc eb' 'aj Tiro jun 'ejm xo, ax syamn pax 'och eb' sb'on maysch'olnilal yet' eb' rey 'a sat smasnil lum lum tic.

¹⁸ Palta a jantc tas 'oj yac' ganar eb', 'oj 'ochcn yico'oc Jehová, may tas ton̈j 'oj molxoc, to 'oj 'ajxoc 'a eb' tz'a'n servil Jehová, yic wach' niwn tas tzman eb' sc'uxu', tzmann pax eb' spichl to caw wal wach'.