Is 22 - Chuj San Sebastian Bible

A tas alb'il 'el 'a yib'n̈ Jerusalén

¹ Yuj lum pan̈n 'aj tzch'oxx 'ilxoc jun tzo'n̈ tas 'a 'icha waychil, yuj cha, yalx can jun tzo'n̈ tic 'ixtic: Ex 'aj Jerusalén, ¿tas tzex 'i'ni, yuj cha, e masnil xoj tzex q'ue 'a yib'n̈ eyatut?

² Toxn̈ej tzex we'lji yel eyaw. A eb' 'anma chamnc 'a e cal, man̈ yujoc q'uen espada 'ix cham eb', man̈oc pax owal, palta xcham eb' yuj wejel yet' yuj yab'il.

³ Smasnil eb' eyajlil, 'oj 'at eb' 'eloc, palta 'oj yamchjoc eb' yic mantzac julwj eb'. Wach'xam caw najt 'oj 'at eb', palta 'oj yamchjocn̈ej eb'.

⁴ Yuj cha, tzwaln 'ixtic: 'Eln̈ec 'a in tz'ey, yujto tzin nib'j caw tzin 'oc' si'mb'il, man̈x eyac' pural eya'n sniwnal in c'ojl yuj yailal 'oj jawc 'a yib'n̈ qui chon̈b'ec tic.

⁵ Yujto a Jehová tztac' yuj smasnil, a 'ix alni, to 'oj jawc jun c'u yic 'ay niwquil xiwc'ojlal, somc'ojlal, yet' pax yailal 'a yib'n̈ lum pan̈n 'aj tzch'oxx 'ilxoc junc tas 'a 'icha waychil. 'Oj ma'xoc 'ejm lan̈chjoc smuroal chon̈ab', ax yab'x yel yaw eb' 'aj chon̈b' chi 'a lum jolmctac witz.

⁶ A eb' 'aj Elam, wan sb'on eb' sjul-lab', 'ayx 'och eb' 'a yol scaruaje, 'ayx q'ue pax eb' 'a yib'n̈ schej; ax pax eb' 'aj Kir, wan yi'n 'elt eb' smacl sat jul-lab' tzc'anlb'ej.

⁷ A eb' lum pan̈n 'a'lic caw wach' yilxi, eb' lum to eyic xoni, b'ut'jnacx 'el lum yuj caruaje, ax eb' 'ay q'ue 'a yib'n̈ chej, wan xo ya'n eb' owl 'a spuertail e chon̈ab'.

⁸ A tas 'aych cob' yipc sc'ojl chon̈b' Judá, tox 'ix lan̈chj 'ejmi. A 'a yic jun c'ul cha, eyiljnac jun tzo'n̈ yamc'ab' yic owl molb'il 'a jun niwquil n̈a tzcuch Calcte Yic Líbano,

⁹ eyiljnac pax jun tzo'n̈ sjatlil smuroal Schon̈b' David, atn Jerusalén, e b'ut'n pax 'ejm a a 'a yojl jun tanque yet'l a xon yaji, atn jun 'ay 'a yalan̈.

¹⁰ 'Ix eyamn 'och e say eyil jun tzo'n̈ n̈a 'ay 'a Jerusalén, 'ix e ma'n lan̈chjoc jaye'oc jun tzo'n̈ n̈a cha, yuj eya'n 'och yipnub'alc jun smuroal.

¹¹ A 'a snan̈l chab' muro, ata xe b'o jun niwquil c'ob'a', axta x'ejm can a a 'ay 'ejm 'a yojl jun 'ichm tanque. Palta ma'ix cham e nan yuj jun mach b'ojnac smasnil jun tzo'n̈ cha. A Dios najnac can yuj jun tzo'n̈ yailal chi 'a yic pecti', palta caw may jac yel'ch 'a e sat.

¹² A 'a yic jun c'ul cha, a Jehová tztac' yuj smasnil, a ex 'awtn coti, yuj eyoq'ui, yuj e cusi, yuj e joxn 'el xil e jolom, yuj pax eya'n 'och e pichl to n̈achtac sat, yic tze ch'oxn 'el e cusc'ojlal yuj e tu'al, palta ma'ix yal e c'ojol.

¹³ A eyico', cojn tzaljc'ojlal tze b'o 'a e q'uin̈, tze miln cham no wacax yet' no calnelu. Tze chi wal chib'ej, tzeyu'n pax 'an̈. Tzeyaln 'ixtic: Wa coyec, cu'c 'an̈, toq'ue ax q'uic'an tzon̈ chamec, xe chi.

¹⁴ Ax Jehová tztac' yuj smasnil, a 'ix sch'ox sb'a 'ayin, 'ix yaln 'ayn 'ixtc 'a stojlal: Ma'oj wac' niwnc'ojlal 'a eb' 'anma tic yuj stenmtacl cha, palta to 'oj cham eb' yu'uj, xchi.

A jun mayltoma 'a yatut win rey

¹⁵ A Jehová tztac' yuj smasnil, a 'ix aln 'ayn 'ixtic: 'Ixc 'at 'ilt win Sebna, win mayltoma yaj 'a yatut win rey, tzaln 'ixtc 'a winac:

¹⁶ ¿Tas tza b'o 'a tic? ¿Mach 'ix 'a'n opiso yic tza b'on jun yet'l chamnc 'anma tic 'a lum tzaln tic, tzoln 'och a b'a 'a sat q'uen q'uen 'aj 'oj a can tic a nani?

¹⁷ Wach'xam caw niwn el'ch alni, palta an Jehová in, an 'oj ach in julcn 'at 'a caw najat. Yet' wal smasnil wip ax ach in yamni,

¹⁸ 'oj ach in julcn 'at c'olc'noc 'icha junc pelota, caw najt 'oj a 'ati, ata 'oj a c'ochcn 'a jun lum lum caw lewn sat. Ata 'oj a chami, ax yoch wan jun tzo'n̈ caruaje tz'i'n chan̈ a b'inab'ilal, caw 'oj ac' sq'uixwloc eb' et munljuml 'ayc' 'a yatut win ajlil.

¹⁹ An 'oj ach wi'l 'a opiso 'aj 'aych 'ochi, ax ach in juln can 'el 'aj 'aych 'ec' tic.

²⁰ A 'a yic jun c'ul cha, 'oj wawtc cot jun in checab', atn Eliaquim win yunnal Hilcías;

²¹ a jun tzo'n̈ a pichl tza'ch 'a opiso, a 'oj wa'ch 'a 'a, yet' jun a sincha yic a b'inab'ilal, ax wa'n can opiso chi 'a 'a. 'Icha wal junc mamb'il, 'ixta 'oj 'aj 'a eb' cajn 'a Jerusalén yet' 'a eb' 'aj Judá.

²² A 'a yol sc'ab', ata 'oj wa'ch syaveal yatut eb' rey yin̈tl can David; may junc mach 'oj stac' smacn puerta to a 'oj jacnoc, may pax junc mach 'oj stac' sjacn puerta to a 'oj macnoc.

²³ Caw wach' 'oj wutc wa'n can 'och 'a yopiso, ax sb'inax 'a scal eb' yican smam, 'icha wal stzatzl tz'ajcn 'och junc lawx 'a junc tas, 'ixta 'oj wutc can 'a yopiso cha.

²⁴ A smasnil eb' yican smam yet' eb' yin̈til, eb' 'unnab'il yet' eb' 'ichicnab'il, a tz'ochcn 'ajcuentail 'a eb' cha, caw 'al 'oj 'ajcn 'och eb' 'a 'a. Lajn 'icha yal-l tz'ajch locn nan̈loc xalu mto nan̈loc chen 'a junc ch'oc, 'ixta 'oj 'ajch eb' 'a 'a.

²⁵ A 'a yic jun c'ul cha, a jun ch'oc wach' yaj 'a yet'ul, a 'oj to'xoc 'emta, ax yem lan̈njoc 'a sat lum yet' smasnil tas locn 'och 'a 'a, ax smasnil jun tzo'n̈ cha, c'uxn 'oj pojoc, xchi Dios 'ayin, xchi Isaías.