Is 21 - Chuj San Sebastian Bible

A tas 'oj 'aj yejm Babilonia

¹ Alb'il can jun tzo'n paxti tic 'ixtc 'a yib'n̈ lum cusltac lum 'ay 'a sti a mar: 'Icha wal junc chacxuxm'ic' tz'ec' 'a lum Neguev, 'ixta 'oj 'aj scot eb' milwjum 'a lum cusltac lu'um, atn 'a lum caw 'ay smay.

² Caw wal 'ay xo smay jun tas x'ajx wil tic 'a 'icha waychil. A mach toxn to tu snab'en, caw tu tas tzb'o'o, a mach milwjum xoni, caw tzmilwjn̈ej. 'Ixquec mu'c 'a owl ex 'aj Elam, ex 'aj Media, 'ochn̈ec oyn 'a chon̈b' Babilonia. Smasnil jun tzo'n̈ yailal xya'ch Babilonia cha, c'uxn 'oj 'och wan yuj Jehová.

³ Caw tzyab' in niwnal syail, caw 'ayn 'och 'a in yailal, 'icha wal junc 'ix 'ix tzyab' syal yalj yune'. Tzin 'och 'a somc'ojlal yuj tas tzlaj wab'i, tzin xiw pax chan̈ yuj tas tzwila.

⁴ Caw somchjnac in nab'en, tu tz'aj in c'ojl yuj tas 'ay smay. May xon tas tzin na 'a junjn yemc'ual yic tzsicb' yoc c'u, palta ax ticnec, 'ix smeltztej 'och sb'a 'a xiwc'ojlal 'ayin.

⁵ Tox sb'o' 'ejm eb' te mexa, lista xo yaj 'aj tz'em wocn eb' 'anma swa'i, tzyu'n eb' tas tzyuq'uej, wanto wal cha, 'ix 'och jun 'aw 'ixtic: Q'uen̈ec wan ex syajlil eb' soldado, 'a'c lista e b'a yet' tas tzmacn sat jul-lab', xchi xwab'i.

⁶ A Cajlil a 'ix aln 'ayn 'ixtic: 'Ixic, 'at 'a'ch junc macwjum, sec wach' tzyal smasnil tas tzyila.

⁷ Toto tzyil scot junc caruaje toc'b'il yuj chawn̈oc no chej, mto 'anma 'ay q'ue 'a yib'n̈ b'uru, mto 'a yib'n̈ cameyo, toto 'ixta', tzcham wal smaclni yila' tas yilxi, xchi.

⁸ Ax xwab'ni, xq'ue 'awjoc jun macwjum chi 'ixtic: A 'aj tzin macwj tic Mamin, caw 'ayn 'ec' n̈ej 'a junjn c'u, yet' 'a junjn 'ac'wal.

⁹ Ax ticnec, tzwil scot jun winc yet' jun caruaje toc'b'il yuj chawn̈ no chej, xchi. Xlajw cha, xyaln jun winc ajun 'a jun caruaje chi 'ixtic: 'Ix 'ejm Babilonia, 'ix lajw 'ejmi. Smasnil jun tzo'n̈ yechl comn dios 'a jun chon̈b' cha, choc' x'ajcn spoj 'a sat lu'um, xchi.

¹⁰ 'Ab'c wal ex wit chon̈ab', caw ex te'x 'ejm yuj eb' 'aj Babilonia, 'icha tz'aj ste'x 'ixm trigo. A tas 'ix wab' yaln Jehová tztac' yuj smasnil, atn qui Diosal an̈ israel on̈c tic, a tzwal eyab'i.

A tas alb'il 'el 'a yib'n̈ Edom

¹¹ Alb'il can 'el jun tzo'n̈ paxti tic 'ixtc 'a yib'n̈ chon̈b' Edom: 'Ay jun mach 'ix 'awj cot 'ayn 'a Seir, 'ix yaln 'ixtic: Ach macwjum, ¿jantc to wal sacb' ticnec tzela? xchi.

¹² In ta'w 'a 'a: Wan sacb'i, palta 'oj jawc pax 'ac'wl jun 'ejm xo. Toto tza nib'j tza c'anb'j pax jun 'ejm xo, meltzjan̈, wul c'anb'j jun 'ejm xo, xin xchi 'a 'a.

A tas alb'il 'el 'a yib'n̈ Arabia

¹³ A jun tzo'n̈ tic alb'il can 'ixtc 'a yib'n̈ Arabia: Ex chon̈wjum 'aj Dedán, ex to tz'ec' 'ac'wl eyuj 'a calcte 'a Arabia:

¹⁴ 'Eln̈ect e cha eb' caw 'ay stacn̈ti'al, altjec a a yuc' eb'. Ex cajn ex 'a chon̈b' Tema, 'eln̈ect 'a sat eb' tz'at 'eloc, altjec tas tzc'ux eb'.

¹⁵ Yujto wan s'at eb' 'elc 'a q'uen espada caw jay ye, yet' 'a jul-lab' to wan sjulx 'eli, atn 'a 'aj caw ow ya'n owal.

¹⁶ 'Ix yaln Jehová 'ayn 'ixtic: Yab'n 'ixtc junab', 'icha wal junc munljum tzb'isa jantc xo tiempo smunlji, 'ixta wal sb'isx sc'ual yic 'oj lajwc 'ejm sb'inab'ilal chon̈b' Cedar.

¹⁷ A eb' 'aj Cedar jeln sjulwji, jaywn̈xoj eb' 'oj canoc. An Jehová sDiosal in Israel, an tzwala, xchi Dios.