Is 19 - Chuj San Sebastian Bible

A tas alb'il 'el 'a yib'n̈ Egipto

¹ Atn jun tzo'n̈ paxti tic 'ix alx can 'el 'a yib'n̈ Egipto: 'Iltec wal sjaw Jehová, wocn q'ue 'a yib'n̈ jun 'asun, caw ji'lti sb'eyi yic tz'at 'a Egipto. Caw wal tz'ib'x chan̈ jun tzo'n̈ comn dios yic Egipto yuj smay, caw tzxiw pax eb' 'aj chon̈b' chi yu'uj.

² Yuj cha, xyaln Jehová 'ixtic: 'Oj wac' spoj sb'a eb' 'aj Egipto cha, ax laj ya'n junjn eb' owal: A eb' swach'c'ojl sb'a, 'oj yac' eb' owal; ax eb' chon̈ab', 'oj yac' eb' owl yet' yit chon̈b'al, ax ya'n eb' yajl owl yet' eb' yit yajlil.

³ 'Oj wac' somchjoc 'el snab'en eb', man̈x 'oj nachjoc 'el yuj eb' tas 'aj tzc'och eb'. Yuj cha, ax sc'anb'n sb'a eb' 'a eb' comn dios, 'a eb' wayjel, 'a eb' tzc'umn spixn eb' chamnac yet' 'a eb' 'ajchum.

⁴ Palta an 'oj wa'ch junc yajl tu snab'en 'a Egipto; a jun rey cha, caw 'oj 'ixtxoc eb' 'anma chi yu'uj, xchi Dios.

⁵ A a niwn a tzcuch Nilo 'a Egipto, 'oj tup chan̈ a smasnil, 'oj tacjoc can 'aj tzb'ey a'.

⁶ A eb' a sc'ab' tzlaj 'elcni, 'oj tup chan̈ eb' a', ax yaj sjab' 'aj tzb'ey a cha. 'Ixta pax eb' te chay'aj yet' te b'alal 'a sti sb'e a cha, 'oj tacjoc 'el eb' te'.

⁷ A smasnil te b'alal yet' te 'awb'ente 'ay 'a sti a', 'oj tacjoc 'el eb' te', ax sat 'ejm te 'a yet'l cha.

⁸ Smasnil eb' yamn chay 'ayc' 'a sti a Nilo cha, yet' eb' tzlaj yac' 'ejm schim 'a yojl a', 'oj 'el yaw eb' yoc' yuj cusc'ojlal, ton̈j 'oj c'un cuschan̈ eb'.

⁹ Ax schab'c'ojlan sb'a eb' tzlaj xiyn te lino; 'oj somchjoc chan̈ pax snab'en eb' tzlaj ch'aln chan̈ te'.

¹⁰ 'Oj tac chan̈ sc'ojl eb' jalm nip cha, ax somchj chan̈ snab'en eb' munljum chi smasnil.

¹¹ Yel xo wal may snab'en eb' yajl yaj 'a chon̈b' Zoán, ax eb' 'a'm nab'en yaj 'a win faraón 'a Egipto, jun 'eln̈ej may jac yel'ch snab'en eb' cha. Cob' ste'wtzej sb'a eb' yaln 'ixtc 'a win faraón cha: An̈ tic on̈ yin̈tl on̈ can eb' jeln on̈, atn eb' ya'jnac reyl 'a yic pecti cha, xchi cob' eb'.

¹² Ach faraón, ¿'ajtil 'ay eb' tz'a'n a nab'enoc cha, sec tzch'ox eb' 'ayach mto tzyal eb' ab'i', tas nab'ilx 'a yib'n̈ a chon̈b' Egipto yuj Jehová tztac' yuj smasnil?

¹³ A eb' yajl yaj 'a chon̈b' Zoán, caw may snab'en eb'. A eb' yajl yaj 'a chon̈b' Menfis, 'ix schaj 'ixtxoc paxti sb'a eb'. A jun tzo'n̈ eb' yajl chi tzjucb'tzan jun tzo'n̈ xo eb' 'aj Egipto 'a tas man̈ tojloc.

¹⁴ A Jehová, 'ix ya'ch somc'ojlal 'a scal eb' yajl cha, yet' tas tzlaj sb'o eb'. Lajn xoj tzyutj sb'a eb' 'icha eb' 'u'm 'an̈ tztelw 'a yib'n̈ xej.

¹⁵ Man̈x 'a xon junc eb' 'oj stac' scoln schon̈b' cha, toxn̈ej rico mto meb'a', toxn̈ej to niwn yel'chi mto may xon yel'chi, may xon junc eb' 'oj ste'wtzoc sb'a.

A eb' 'aj Egipto yet' eb' 'aj Asiria*r* 'oj yac' servil eb' Jehová

¹⁶ A 'a jun tiempoal cha, smasnil eb' 'aj Egipto lajn xoj 'oj yutc sb'a eb' 'icha eb' 'ix 'ix. Caw 'oj 'ib'xoc chan̈ eb' yuj xiwlal yic 'oj yilnc eb' sjaw syailal yuj Jehová tztac' yuj smasnil.

¹⁷ 'Oj xiw chan̈ eb' 'aj Egipto chi yuj eb' 'aj Judá; cojn yic 'oj snanc cot eb' tas 'oj yutc Jehová sc'anlb'an eb' 'aj Judá yuj tas nab'il yuj cha, ax xiw chan̈ eb'.

¹⁸ A 'a jun tiempoal cha, 'ay o'e chon̈b' 'a Egipto 'oj yal sti eb' hebreo, ax ya'n eb' sti 'a Jehová tztac' yuj smasnil. A 'a scal eb' chon̈b' cha, ata 'ay jun chon̈b' 'oj 'ajxoc sb'ic, Chon̈b' C'u.

¹⁹ A 'a jun tiempoal cha, 'ay jun yet'l xajmb'al yic Jehová 'oj b'o 'a yol smacb'en Egipto. Ax 'a sla'nil smon̈jon Egipto cha, ata 'oj lin̈xoc can chan̈ junc q'ue'en, yuj yi'nb'ilc chan̈ sb'i Jehová.

²⁰ A jun chi 'oj 'och ch'oxnb'il yuj Jehová, chajtlto 'ay mach tz'och 'emmquilal 'a Dios 'a yol yic Egipto cha. A yic 'oj 'el yaw eb' 'anma chi yuj eb' tz'ixtn eb' cha, ax ya'n cot Dios jun scolmal eb' sec tzcolchj eb'.

²¹ 'Ixta wal 'oj yutc Jehová sch'oxn sb'a 'a eb' 'aj Egipto sec tz'ojcax 'el yuj eb', yuj cha, ax ya'n 'ejm sb'a eb' 'a 'a. 'Oj laj yac' eb' xajmb'al yet' yofrenda, ax laj ya'n can eb' sti 'a Jehová to yowlal 'oj syiclc eb'.

²² Yujto 'oj ya'ch Jehová syailal eb' 'aj Egipto, yuj cha, 'oj laj meltzj eb' 'a 'a, ax yo'ch sc'ojl 'a eb', 'oj b'ox can sc'ojl eb' yu'uj.

²³ A 'a jun tiempoal cha, 'ay jun niwn b'e 'oj 'at 'a Egipto masnto 'oj c'och 'a chon̈b' Asiria. A eb' 'aj Asiria 'oj stac' sc'och eb' 'a Egipto, 'ixta pax eb' 'aj Egipto 'oj stac' sc'och pax eb' 'a Asiria cha. A chab' nacion̈al eb' 'anma tic, 'oj smol alc sb'a eb' 'a Jehová.

²⁴ A 'a jun c'u cha, 'oj ya'ch sb'a eb' israel yet' eb' 'aj Egipto yet' pax eb' 'aj Asiria, junxn̈ej 'oj yutc sb'a 'oxe nacion̈ tic, yuj cha, ax ya'n Dios swach'c'ojlal 'a yib'n̈ smasnil chon̈b' 'ay 'a yolyib'n̈q'uinl tic.

²⁵ A Jehová tztac' yuj smasnil, 'oj yac' swach'c'ojlal 'a yib'n̈ eb' nacion̈ cha, ax yaln 'ixtic: 'Oj wac' in wach'c'ojlal 'a yib'n̈ in chon̈b' Egipto, yet' 'a yib'n̈ Asiria, atn in b'ob'en, yet' 'a yib'n̈ Israel, atn jun chon̈b' to wic xon yaji, 'oj schioc.