Is 18 - Chuj San Sebastian Bible

A tas alb'il 'el 'a yib'n̈ Etiopía

¹ ¡'Oltac wal jun nacion̈ 'a 'aj toxn̈ej tzt'al-li sc'axl jun tzo'n̈ no cotc noc'! Atn jun nacion̈ 'ay 'a sti 'ec' a niwn a yic Etiopía.

² Tzlaj ya't eb' schecb' yet' te barco 'a yib'n̈ a niwn a tzcuch Nilo, tz'at eb' 'a yib'n̈ a yet' te' barco b'ob'il 'a te chay'aj. Ex checab', meltzjan̈c 'a e chon̈ab', atn 'aj niwc stel eb' 'anma', eb' n̈el-li stz'umal sniwnal, eb' caw wal tec'an, atn eb' 'ay smay 'a yib'n̈ jun tzo'n̈ xo chon̈ab'. Tzlaj 'em jun tzo'n̈ chon̈b' yuj eb'. Ata cajn eb' 'a lum lum pojquixtac yaj yuj a niwc a'.

³ E masnil ex wit 'anmal cajn 'a yolyib'n̈q'uinl tic, 'ab'ec, sec 'oj eyil yajx q'ue jun bandera 'a lum jolm witz, ax eyab'n yutz'x trompeta ta'.

⁴ A Jehová, a 'ix aln 'ayn 'ixtic: 'Ayn 'ec' 'a wet'ul, xwiln cot eb' 'anma tic, sictacn̈ej waji yic tzwiln cot eb', 'icha yilx yoc c'u 'a yic cuaresmail, 'icha pax yilx chicb'chan̈ tz'em 'a 'ac'wal yic 'elnc sat smasnil 'awb'ente', 'ixta waji, xchi Dios.

⁵ A yic wan xo spucl snich te uva, tzcheclj can te sat cha, a yic mantzac molx chan̈ sat te 'awb'ente cha, ata 'oj lajwc 'el eb' 'aj Etiopía. 'Icha tz'aj slot'x 'el sc'ab' te snun uva yet' texlex, tzlaj lot'x can 'eli, tzsi'x can monto 'a yet'ul, 'ixta 'oj 'aj eb' 'anma cha.

⁶ 'Oj can sniwnal eb' schi smasnil no noc' 'a lum jolmctac witz cha. 'Oj jawc no 'usej, no xulem yet' smasnil no chiwjum noc' ta', ata 'oj 'ec' cuaresma yuj no 'usj cha, mto no xulem. A 'a n̈ab'lq'uinal, an̈j no calte'al noc' chi 'ayc' ta'.

⁷ A 'a jun tiempoal cha, 'oj yi' cot eb' 'anma chi yofrenda 'a lum tzaln Sión, atn 'aj tz'och 'emmquilal 'a Jehová tztac' yuj smasnil. A eb' 'anma niwc stel cha, n̈el-li yilx stz'umal eb', caw 'ay smay eb' 'a yib'n̈ jun tzo'n̈ xo chon̈ab', caw jeln eb', til wal chon̈b' tz'em yuj eb', atn eb' cajn 'a jun lum lum pojquixtac yaj yuj a niwc a'.