Is 17 - Chuj San Sebastian Bible

A tas tzalx 'el 'a yib'n̈ Damasco

¹ Atn jun tzo'n̈ paxti tic 'ix alx can 'el 'a yib'n̈ chon̈b' Damasco: A Damasco, man̈x chon̈b'oc, palta to cojxn yet'l checl 'oj 'ajcn chan̈ b'ulan.

² Ax jun tzo'n̈ chon̈b' 'a Aroer, 'oj can eb' 'a cusltacl 'a jun 'ejmn̈ej. 'Oj 'ochcn swalab'oc no cajb'en noc'. 'Oj wa e no noc' chi 'a tzaljc'ojlal ta', man̈x 'a tas 'oj xib'tn eb'.

³ A schon̈b' eb' yic Efraín, 'oj can sch'ocoj, man̈x 'a junc chon̈b' 'aych smuroal 'oj canoc. 'Ixta pax Damasco, man̈x yico'oc pax sb'a. A eb' 'aj Siria 'oj to canoc, 'oj q'uixwoc can 'el eb'; an̈jtona eb' israel, man̈x 'a yel'ch 'oj 'ajcn eb'. A Jehová tztac' yuj smasnil, a tzaln jun tzo'n̈ paxti tic.

Syailal chon̈b' Israel

⁴ A 'a jun tiempoal cha, a tas 'i'n tzb'an̈ sb'a eb' yin̈tl Jacob, 'oj 'ijxoc 'ec' 'a eb', ax sat 'ejm smasnil tas 'ay 'a 'a.

⁵ A schon̈b' eb' israel cha, lajn 'oj 'ajcn 'icha 'aj tzpolx 'ixm trigo yuj eb' munljum 'a lum pan̈n Refaim, 'icha tzyutj eb' si'n 'ixm schon tzlaj 'elcn 'a scal, 'ixta 'oj 'aj eb'.

⁶ Jaywn̈xoj eb' 'oj can 'a schon̈b' cha, 'icha pax tzyac' junc te 'awb'en olivo tz'ijx 'emt sat, t'un̈ctac xoj tz'ajcn chab' 'oxe'oc sat chi 'a sn̈i 'el sc'ab', mto cojxn chan̈ o'e'oc sat chi tzcan 'a jun te chi smasnil, 'ixta 'oj 'aj eb', xchi Jehová, atn sDiosal chon̈b' Israel.

⁷ A 'a jun c'ul cha, 'oj 'ochx q'ueln eb' 'anma chi jun 'ejm xo 'a jun mach b'ojnac eb', atn qui Diosal an̈ israel on̈c tic, jun Dios to Cojxni.

⁸ Man̈x 'oj 'at yil eb' jun tzo'n̈ yet'l xajmb'al b'ob'il yu'uj, atn jun tzo'n̈ tzya'ch eb' yipc sc'ojol. Man̈x 'a yel'ch jun tzo'n̈ te te sch'oxnb'il sdiosal eb' tzcuch Asera, yet' jun tzo'n̈ yet'l xajmb'al eb' 'aj tzn̈us incienso.

⁹ A 'a jun c'u cha, a jun tzo'n̈ chon̈b' caw wach' yajch smuroal, 'oj can eb' 'a cusltaquil, 'oj 'actx can eb' sch'ocoj, 'icha 'ajnc scan schon̈b' eb' heveo yet' eb' amorreo yuj eb' quit israelal 'a pecti'.

¹⁰ Yujto 'ix eyac' sat e c'ojl 'a qui Diosal coljnacn̈ec, ma'ix e na coti toto ata qui coljnaquec qui b'a. Yuj cha, wach'xam 'oj eyawc eyawb'ente caw wach' xlaj eyi' cot 'a chuc chon̈b'al.

¹¹ Wach'xam to 'oj q'uib' eyawb'ente chi mu'c 'a jun c'u cha, mto 'oj nichnoc muc'uc, palta ax yic 'oj jawc syab'il 'oj satnc 'eli, ata 'oj pucl sat eyawb'ente cha, yujto man̈x 'a yan̈il.

Ma'oj techjoc owl yuj eb' 'ajc'ojol

¹² 'Oltac wal eb' 'anma tzcot 'a jun tzo'n̈ xo nacion̈, caw wal tzc'an̈ cob' scot eb' yujto niwn sb'isl eb', lajn wal sc'an̈ scot eb' 'icha sc'an̈ sq'ue wan a mar. Caw wal cob' tz'el yaw eb' nacion̈ chi scoti, 'icha wal sc'an̈ yem pawnjoc a niwc a'.

¹³ Palta ax yic 'oj tenxoc 'och wan eb' yuj Dios, wach'xam tzc'an̈ yec' eb', palta ma'oj yil eb' s'at 'eloc, lajn 'oj 'aj eb' 'icha tz'aj yutz'x 'at solcal trigo yuj 'ic' 'a caltc te', mto 'icha tz'aj yutz'x chan̈ pococ yuj chacxuxm'ic', 'ixta 'oj 'aj eb'.

¹⁴ A 'a yemc'ul cha, caw wal 'ay smay eb' 'ajc'ojl cha, palta ax yic 'oj sacb'oc 'el 'a junx c'u, man̈x checloc 'aj 'ay eb'. 'Ixta wal 'oj 'aj eb' tzon̈ 'elc'nec, mto eb' tznib'j tzon̈ 'ixtnec.